ރާއްޖޭގެ އިގުތިސާދަށް ކުއްލި އިންގިލާބީ ބަދަލެއް އައީ ފަތުރުވެރިކަމުގެ ސަބަބުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރާއްޖޭގެ ފަތުރުވެރިކަމަށް 50 އަހަރު ފުރުން ފާހަގަކުރުމަށް ކުރުނބާ މޯލްޑިވްސްގައި އާދީއްތަ ދުވަހު މަޓީން ބޭއްވި އެވޯޑް ހަފްލާ ޝަރަފުވެރިކުރައްވައި ވާހަކަފުޅުދައްކަވަމުންނެވެ. އެ ޖަލްސާގައި ރައީސް ވިދާޅުވީ، ރާއްޖޭގައި ފަތުރުވެރިކަމުގެ ކުރިން އިގުތިސާދީ ހަރަކާތްތައް ހިންގިނަމަވެސް، އިގުތިސާދަށް ކުއްލިއަކަށް ބޮޑު އިންގިލާބީ ބަދަލެއް އައީ ފަތުރުވެރިކަން ފެށުމުންކަމަށެވެ.
ރައީސް ވިދާޅުވީ ފަތުރުވެރިކަން ފެށުމާއެކު ރާއްޖޭގައި ކުރިން ކުރަމުން އައި އިގުތިސާދީ ހަރަކާތްތަކަށް ވެސް ކުރިއެރުން ލިބިފައިވާކަމަށެވެ. އެގޮތުން، ދަނޑުވެރިކަމާއި މަސްވެރިކަމަށް އިތުރު މާރކެޓްތައް ލިބި، އިމާރާތްކުރުމުގެ ދާއިރާވެސް ފުޅާވެފައިވާކަން ރައީސް ފާހަގަކުރެއްވިއެވެ.
މީގެއިތުރުން، ރާއްޖޭގައި ފަތުރުވެރިކަން ފެށުމާއެކު، ރާއްޖޭގައި ކުރިން ނެތް އެތަކެއް ދާއިރާއަކުން ވަޒީފާގެ ފުރުސަތުތައް ހުޅުވިގެން ދިޔަކަމަށްވެސް ރައީސް ވިދާޅުވިއެވެ. އަދި އެ ދާއިރާއާ ގުޅުނު ފަރާތްތަކުގެ ބުރަ މަސައްކަތުން، "މޯލްޑިވްސް" އަކީ މިއަދު މުޅި ދުނިޔޭގެ ފަތުރުވެރިކަމުގައި ބްރޭންޑެއް ކަމަށްވެސް ރައީސް ފާހަގަކުރެއްވިއެވެ.
ހަގީގަތުގަ އަޅުގަނޑުމެން މިއަދު މިފާހަގަކުރަނީ ހަމައެކަނި ފަތުރުވެރިކަމަށް 50 އަހަރު ފުރުމުގެ މުނާސަބަތެއް ނޫން. އަޅުގަނޑުމެން މި ފާހަގަކުރަނީ ރާއްޖެ އެންމެ ބޮޑަށް ބަދަލުކޮށްލި 50 އަހަރު. މި ފާހަގަ ކުރެވެނީ ދިވެހިންގެ ދިރިއުޅުމުގެ ވައްޓަފާޅިއަށް އިންގިލާބީ ބަދަލުތަކެއް ގެނައި 50 އަހަރު. ތަރައްގީއާމެދު އޮތް ވިސްނުންވެސް ބަދަލުކޮށްލި 50 އަހަރު. ފަތުރުވެރިކަން ރާއްޖެއަށް ތައާރަފުކުރިއިރުވެސް ރާއްޖޭގައި އިގުތިސާދީ އެހެން ހަރަކާތްތައް ކުރިއަށް ގެންދިޔަ. އަދި ފަތުރުވެރިކަން ފުޅާވަމުން ދިޔަ ވަރަކަށް ދަނޑުވެރިކަމާ މަސްވެރިކަމުގެ މާކެޓުތައް ފުޅާވެގެންދިޔަ. އަދި އިމާރާތްކުރުމު ދާއިރާ ފުޅާކުރަންޖެހުނު.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ރައީސް ވިދާޅުވީ ރާއްޖެ މިއަދު މި ދެކޭ ދުވަސްތަކަކީ ފަތުރުވެރިކަމުގެ ދާއިރާގައި އިސްކޮށް ހަރަކާތްތެރިވާ ބޭފުޅުންނާއި އެ ދާއިރާ ތައާރަފުކުރުމުގައި އުޅުއްވި ބޭފުޅުންގެ މިންނެތް މަސައްކަތްކަމަށެވެ. އެހެންކަމުން ސަރުކާރު އޮތީ އެ ފަރާތްތަކާއެކު ކަމަށާއި، ސިނާއަތް ކުރިއެރުވުމަށް ކުރާ މަސައްކަތުގައި ސަރުކާރުން އެއްބާރުލުން ދެއްވާނެކަމަށްވެސް ރައީސް ވިދާޅުވިއެވެ.
ދުނިޔޭގެ ފަތުރުވެރިކަމުގެ ބާޒާރުގަ ދިވެހިރާއްޖެ މިއަދު ދަމަހައްޓަމުން މި ގެންދާ މަގާމު މިގޮތުގަ މިއޮތީ، ރާއްޖެއަށް ފަތުރުވެރިކަން ތައާރަފުކުރެއްވި ބޭފުޅުންގެ ވަރުގަދަ އަޒުމާ، ކުރެއްވި ބުރަ މަސައްކަތުން. މިއަދު މި އިންޑަސްޓްރީގަ ތިއްބެވި ބޭފުޅުން ކުރައްވަމުން ގެންދަވާ މިންނެތް މަސައްކަތުގެ ސަބަބުން. ތިޔަ ބޭފުޅުންނަކީ މި މުހިންމު ސިނާއަތް ކުރިއަށް އޮތް ޖީލުތަކަށް ފޯރުކޮށްދެއްވުމުގަ އެންމެ ރަނގަޅު ޚިޔާލު ނެރެދެއްވޭނެ މާހިރުން.ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު
ރައީސް ވަނީ ރާއްޖޭގައި ފަތުރުވެރިކަން ތައާރަފު ކުރެއްވުމަށް ހެލްތު މިނިސްޓަރ އަހުމަދު ނަސީމާއި ހުސައިން އަފީފާއި މުހައްމަދު އުމަރު މަނިކު (އެމްޔޫ މަނިކު) އަދި ޖޯޖް ކޯބިން ކުރެއްވި މަސައްކަތަށްޓަކައި އެބޭފުޅުންނަށް ޝުކުރު އަދާކުރައްވާފައެވެ. އަދި މިއީ އެ ބޭފުޅުން ރާއްޖެއަށް ކުރެއްވި އަގުހުރި ޚިދުމަތެއް ކަމަށާއި، އެ ޚިދުމަތުގެ ހަގީގީ އަގު ވަޒަން ނުކުރެވޭނެ ކަމަށާއި، މުޅި ގައުމު މިވަނީ އެ ބޭފުޅުންގެ ޚިދުމަތަށް ދަރަނިވެރިވެފައި ކަމަށް ރައީސް ވިދާޅުވިއެވެ.
