ގުޑްސް އަދި ސަރވިސް ޓެކްސް (ޖީއެސްޓީ) 8 އިންސައްތައަށް ބޮޑުކޮށް، ޓުއަރިޒަމް ގުޑްސް އެންޑް ސަރވިސް ޓެކްސް (ޖީއެސްޓީ) 16 އިންސައްތައަށް ބޮޑުކުރަން ނިންމާފައިވާ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ރާއްޖޭގެ އިގުތިސާދީ އަދި ފިސްކަލް ހާލަތުގެ އެންމެ ފަހުގެ މައުލޫމާތު ފޯރުކޮށްދިނުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ މެދުރާސްތާގެ ފިސްކަލް ހާލަތު ދެމެހެއްޓިނިވި މިންގަނޑެއްގައި ބެހެއްޓުމަށް ފިސްކަލް އެންކަރތައް ކަނޑައެޅިފައިވާ ކަމަށެވެ. ބަދަލުވެފައިވާ ދުނިޔޭގެ އިގުތިސާދީ އަދި މާލީ ހާލަތާއެކު، މި ފިސްކަލް އެންކަރތައް ދެމެހެއްޓުމަށް ފިޔަވަޅުތައް އަޅަންޖެހޭ ކަމަށާއި، އެގޮތުން އާމްދަނީ އަދި ޚަރަދުގެ ފިޔަވަޅުތަކެއް އެޅުމަށް ނިންމާފައިވާ ކަމަށެވެ.
އާމްދަނީގެ ފިޔަވަޅުތަކުގެ ތެރޭގައި ޓީޖީއެސްޓީ ރޭޓު 16 އިންސައްތައަށް ބޮޑުކުރުމަށް ނިންމާފައިވާ ކަމަށް މިނިސްޓަރު ވިދާޅުވިއެވެ. އަދި ޖީޖީއެސްޓީ ރޭޓު 8 އިންސައްތައަށް ބޮޑުކުރުމަށް ނިންމާފައިވާ ކަމަށެވެ.
އާމްދަނީ އިތުރުކުރުމަށް ކަނޑައަޅާ ކަންތައްތަކުގެ ތެރޭގައި ޓީޖީއެސްޓީ ރޭޓް ގާތްގަޑަކަށް 4 އިންސައްތައަށް އިތުރުކުރުން، ޖީއެސްޓީ ރޭޓް 6 އިންސައްތައިން 2 އިންސައްތައަށް އިތުރުކޮށް 8 އިންސައްތައަށް ބޮޑުކުރުން އެއީ މަޝްވަރާ ކުރަމުންދާ ކަމެއް. އޭގެ އިތުރުން ހަރަދު ކުޑަކުރުމުގެ ގޮތުން އަޅުގަނޑުމެން ފިޔަވަޅުތަކެއް އަޅާނަން. ސަބްސިޑީ ރިފޯމް އަޅުގަނޑުމެން ގެންނާނަން. އަދި އޭގެ އިތުރުން ސަރުކާރު ހިއްސާވާ ކުންފުނިތައް އިތުރަށް ހަރުދަނާކޮށް ސަރުކާރުގެ ބަޖެޓަށް ބަރޯސާވާ މިންވަރު ކުޑަކުރުމަށްޓަކައި މިހާރު ވެސް މަސައްކަތްތަކެއް އެބަކުރަން. އޭގެ އިތުރުން ރައީސް ފާހަގަކުރެއްވިހެން، މިހާރު އިއުލާންކޮށްފައިވާ މަޝްރޫއުތަކުގެ އިތުރުން އިތުރު މަޝްރޫއުތައް މަޑުޖައްސާލުމަށް އަޅުގަނޑުމެން ނިންމާފައިވާނެ. މިއީ އަޅުގަނޑުމެން ކުރަން ނިންމާފައިވާ ކަންތައްތަކަކީއިބްރާހިމް އަމީރު / ފިނޭންސް މިނިސްޓަރު
މިނިސްޓަރު ވިދާޅުވީ ފިސްކަލް ހާލަތު ރަނގަޅުކުރުމަށްޓަކައި އަޅާ ފިޔަވަޅުތަކުގެ އިތުރު ތަފްސީލު ކުރިއަށް އޮތް ފިސްކަލް ސްޓްރެޓެޖީ އަދި ބެޖެޓާއެކު ހާމަކުރައްވާނެ ކަމަށެވެ. އަދި ޖީއެސްޓީއާއި ޓީޖީއެސްޓީ ބޮޑުކުރުމަށް ނިންމާފައިވީ ނަމަވެސް، އެކަމަށް އަމަލުކުރަން ފަށާނީ އަދި 6 މަސް ދުވަސް ފަހުން ކަމަށް ވެސް މިނިސްޓަރު ވިދާޅުވިއެވެ.
މީގެއިތުރުން މިނިސްޓަރު އަމީރު ވިދާޅުވީ 2019 ގައި ރާއްޖޭގެ އިގްތިސާދު ދިޔައީ 7 އިންސައްތައިން ކުރިއަރަމުން ކަމަށެވެ. 2019 ގެ އަންދާޒާތަކަށް ބަލާއިރު މިއަހަރު ރާއްޖޭގެ އިގްތިސާދު އޮންނާނީ ގާތްގަޑަކަށް 120 ބިލިއަންގެ އިގްތިސާދެއް ކަމަށެވެ. އަދި ދަރަނި ހުންނާނި ގެރެންޓީ ހިމަނައިގެން ގާތްގަނޑަކަށް 60 އިންސައްތައިގައި ކަމަށެވެ.
ނަމަވެސް ކޮވިޑާއެކު މަޖުބޫރުވީ ރައްޔިތުންނަށްޓަކައި އެއިރު ފިސްކަލް ރިޒާވެއް ނެތި ދުނިޔޭގެ އެހެނިހެން ގައުމުތަކުން ވެސް ކުރަމުންދާ ކަހަލަ އިންޓަރވެންޝަންތަކެއް ގެންނަން ކަމަށް މިނިސްޓަރު ވިދާޅުވިއެވެ.
