އދ. ފެންފުށީގައި ހިނގި ހާދިސާގައި މަރުވި ޒުވާނާގެ އާއިލާއަށް ރައީސުލް ޖުމްހޫރިއްޔާ އިބްރާހިމް މުޙައްމަދު ސޯލިހު ތައުޒިޔާ ވިދާޅުވެއްޖެއެވެ.
ރައީސް ތައުޒިޔާ ވިދާޅުވީ ހުކުރު ދުވަހުގެ ރޭ ފެންފުށީ ކައުންސިލްއަށް ގުޅުއްވާފައެވެ. ރައީސް ވަނީ ޒުވާނުންތަކެއް ގެނބި ހިނގައިދިޔަ ހާދިސާއާ ގުޅިގެން ފެންފުށީ ކައުންސިލްގެ ރައީސަށް ފޯނުން ގުޅުއްވައި ހާލަތު އޮޅުންފިލުއްވާފައެވެ.
މި ފޯންކޯލުގައި ފެންފުށީ ކައުންސިލްގެ ރައީސް ވަނީ، ހާދިސާގެ މައުލޫމާތު ރައީސުލްޖުމްހޫރިއްޔާއަށް ހިއްސާކުރައްވައި އުދައެރުމުގެ ސަބަބުން ރަށަށް ލިބުނު ގެއްލުންތަކާއި ގުޅޭ މައުލޫމާތުވެސް ހިއްސާކުރައްވާފައެވެ.
ރައީސްގެ ވާހަކަފުޅުގައި މި ހިތާމަވެރި ހާދިސާގައި މަރުވި ޒުވާނާގެ އާއިލާއަށް ތައުޒިޔާ ވިދާޅުވެ ފެންފުއްޓަށް އުދައަރައި ދިމާވި ކަންކަމާއި ގުޅިގެން ސަރުކާރަށް ކޮށްދެއްވެންހުރި ހުރިހާކަމެއް ކޮށްދެއްވާނެ ކަމުގެ ޔަގީންކަން ދެއްވިއެވެ.
ފެންފުށީގައި ހުކުރު ދުވަހުގެ ހަވީރުގެ ވަގުތެއްގައި ދެ ޒުވާނަކު ރާޅާ ދަމައިގެން ގޮސް، އޭގެ ތެރެއިން އެކަކު ވަނީ މަރުވެފައެވެ. މި ހާދިސާގައި މަރުވީ ތ. ދިޔަމިގިލީ އުމުރުން 23 އަހަރުގެ އީސާ ޖުނާހުއެވެ.
މި ހާދިސާގައި ރާޅާ ދަމައިގެން ދިޔަ ދެވަނަ ކުއްޖާއަށް މިހާރުވެސް ދަނީ އެ އަތޮޅު މަހިބަދޫ ހޮސްޕިޓަލުގައި ފަރުވާ ދެމުންނެވެ.
