މާލޭ ރައްޔިތުންނަށް ގޯތި ދޫކުރަން ނިންމުމަކީ ސަރުކާރުން ކޮށްދިން ވަރަށް ބޮޑު ހެޔޮކަމެއްކަމަށް މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ވިދާޅުވެއްޖެއެވެ.

މި ސްކީމްތައް ލޯންޗުކުރުމަށް އާދިއްތަ ދުވަހު ބޭއްވި ރަސްމިއްޔާތުގައި ވާހަަކަފުޅުދައްކަވަމުން ފަލާހު ވިދާޅުވީ، ރާއްޖެއަކީ ދުނިޔޭގައި ޖަޒީރާގެ ގޮތުން އެންމެ ބޮޑު ގައުމަށް ވިޔަސް ބިމުގެ ގޮތުން ރާއްޖެއަކީ ވަރަށް ފަގީރު ގައުމެއްކަމަށެވެ.

ޒަމާނުއްސުރެން އޮންނަ ސަގާފަތަކީ، ބަންޑާރައިން ދޭ ގޯތީގައި އާއިލާ ބިނާކުރުން ކަމަށާއި، މާލެ ފުރި ތޮއްޖެހިދާނެކަމަށް އެއްވެސް މީހަކު ގަބޫލުނުކުރާކަމަށެވެ.

މިހާރު މީހުން ދިރިއުޅެމުންދާ ހާލަތަށް ބަލާއިރު، ބޮޑެތި ގެތައް ބައިބައިކޮށްފައި ހުންނަނީ 300 އަކަފޫޓަށާއި 200 އަކަފޫޓަށްކަން ފަލާހު ފާހަގަކުރެއްވިއެވެ. އަދި މިކަމުގެ ސަބަބުން އިޖްތިމާއީ އެތައް މައްސަލަތައް ނުކުންނަކަމަށްވެސް އޭނާ ވިދާޅުވިއެވެ.

މާލޭގައި އިތުރަށް މީހުން ދިރިއުޅޭކަމުގައިވާނަމަ ކައިރި ފަޅުތައް ހިއްކައިގެން ނޫނީ ނޫޅެވޭނެކަމަށް ފަލާހު ވިދާޅުވިއެވެ. މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލު ހޯދުމަށް ސަރުކާރުން ކުރިއަށްގެންދާ "ގެދޮރުވެރިން" ޕްރޮގްރާމުގެ ތެރެއިން، މާލޭގެ ރައްޔިތުންނަށް ގޯތި ދިނުމަށް ހިންގާ "ބިންވެރިޔާ" ސްކީމާއެކު ކުރިއަތް އޮތް 6 މަސް ދުވަހުގެ ތެރޭގައި ރައްޔިތުންނަށް ބިން ލިބޭނެ ކަމުގެ އުންމީދު އައުވެގެން ހިނގައްޖެކަމަށް ފަލާހު ވިދާޅުވިއެވެ.

ރިޔާސީ ދައުރު ނިމޭއިރު، ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވައުދުވެވަޑައިގެންނެވި ގޮތަށް ބޯހިޔާވަހިކަމުގެ މައްސަލައަށް ހައްލު ލިބިގެންދާނެކަމަށް ފަލާހު ވިދާޅުވިއެވެ. ބިންވެރިޔާ ސްކީމުގެ ދަށުން ގޯތި ދޫކުރަން ކަނޑައަޅާފައިވާ ބިމުގެ ޖުމްލަ ބޮޑުމިނަކީ 3750000 (ތިން މިލިޔަން ހަތް ލައްކަ ފަންސާސް ހާސް) އަކަފޫޓެވެ. ގޯތީގެ އަދަދު ކަނޑައެޅޭނީ ގޯތި ލިބުމަށް ހޮވޭ ވަކިވަކި އެޕްލިކޭޝަންތަކަށް ދޫކުރާނެ ގޯތީގެ ބޮޑުމިން ކަނޑައެޅުމުން ކަމަށް ހައުސިންގ މިނިސްޓްރީން ވަނީ ބުނެފައެވެ.

ސަރުކާރުން މި ޕްރޮގްރާމްގެ ދަށުން ހުޅުވާލާފައިވަނީ 4000 ފްލެޓާއި، 3000 ގޯއްޗަށް ކުރިމަތިލުމަށެވެ.