މިހާރު ކުރިއަށްދާ ވެސްޓަރން އޭޝިއަން ޖޫނިއަރ ޗެސް ޗެމްޕިއަންޝިޕްގެ ރެޕިޑް ރައުންޑުގައި އިންޑިއާއިން ބޮޑު ކާމިޔާބީއެއް ހޯދައިފިއެވެ.

ރެޕިޑް ރައުންޑުގައި އިންޑިއާގެ 10 ކުޅުންތެރިން ވަނީ ގަދަ ތިނެއްގައި ހިމެނިފައެވެ. އޭގެތެރެއިން ފަސް ކުދިން ވަނީ އެކުޅުންތެރިން ބައިވެރިވި އުމުރުފުރާގެ ޑިވިޝަނުން އެއްވަނަ ހޯދާފައެވެ. އަދި އެކި އުމުރުފުރާތަކުގެ ޑިވިޝަންތަކުން ހަތަރު ކުޅުންތެރިއަކު ދެވަނަ ހޯދާފައި ވާއިރު، އެއް ކުޅުންތެރިއަކު ވަނީ ތިންވަނަ ހާސިލްކޮށްފައެވެ.

އިންޑިއާގެ އިތުރުން މުބާރާތުގެ ރެޕިޑް ރައުންޑުގެ ވަނަތައް ހާސިލްކޮށްފައިވަނީ އުޒްބެކިސްތާން، ކަޒަކިސްތާން، ސްރީލަންކާ، ބަންގްލަދޭޝް އަދި ކިރިގިސްތާންގެ ކުޅުންތެރިންނެވެ.

މުބާރާތުގައި ހުކުރު ދުވަހުން ފެށިގެން ބުދަ ދުވަހުގެ ނިޔަލަށް ކުރިއަށްދާނީ ސްޓޭންޑާޑް ޗެސް ރައުންޑުގެ މެޗުތަކެވެ. ބުރާސްފަތި ދުވަހު އޮންނާނީ ބީޗް ބްލިޓްޒް ރައުންޑެވެ.

ތަފާތު ނުވަ ގައުމެއްގެ ޓީމުތައް ވާދަކުރާ މި މުބާރާތް ކުރިއަށް ގެންދަނީ އއ. އުކުޅަހުގައެވެ.