އިސްލާމިކް ސޮލިޑާރިޓީ ގޭމްސްގައި ރާއްޖޭގެ ޗެފް ޑި މިޝަންއަކަށް އައިޝަތު ޝިފާނާ ވަޖީހު ހަމަޖައްސައިފިއެވެ.

ފިޓްނަސް ދާއިރާގައި މަސައްކަތްކޮށްފައިވާ ޝިފާނާ ޗެފް ޑި މިޝަންއަކަށް ހަމަޖެއްސިކަން މޯލްޑިވްސް އޮލިމްޕިކް ކޮމެޓީން ހާމަކުރީ މިއަދުއެވެ. އެއާއެކު ޝިފާނާ ވެގެންދާނީ ރާއްޖޭގެ ކޮންޓިންޖެންޓުގެ ޗެފް ޑި މިޝަންކަން ކުރާ ފުރަތަމަ އަންހެން މެމްބަރަށެވެ.

މި ގޭމްސް ކުރިއަށް ދާނީ މިއަހަރުގެ އޮގަސްޓު މަހުގެ 8-18 އަށް ތުރުކީގެ ކޮންޏާގައެވެ. މިއީ މި ގޭމްސްގައި ރާއްޖެއިން ވާދަކުރާ ދެ ވަނަ ފަހަރެވެ. މީގެ ކުރިން ރާއްޖެއިން ވަނީ 2017 ވަަނަ އަހަރު އޮތް ގޭމްސްގައި ވެސް ބައިވެރިވެފައެވެ. އެ އަހަރުގެ ގޭމްސް އޮތީ އަޒަރުބައިޖާންގެ ބަކޫގައެވެ.

އޮލިމްޕިކް ކޮމެޓިން ބުނީ ޝިފާނާއާއެކު މި ގޭމްސްގައި ރާއްޖެއަށް ރަނގަޅު ކާމިޔާބީއެއް ލިބޭނެކަމަށް ދެކޭކަމަށެވެ. މިއަހަރުގެ ގޭމްސްގައި ޝިފާނާގެ ޒިންމާއަކީ އެތުލީޓުންނަށް ބޭނުންވާ ކަންކަން ހަމަޖެއްސުން ކަމަށް އޮލިމްޕިކް ކޮމެޓީން ބުނެއެވެ. އޭގެ ތެރޭގައި އެތުލީޓުންގެ ހުރުމުގެ އިންތިޒާމުތަކުގެ އިތުރުން ދަތުރުފަތުރުގެ ކަންކަން ބަލަހައްޓާނީ ޝިފާނާއެވެ.

މިއަހަރުގެ ގޭމްސްގައި ރާއްޖެއިން ބައިވެރިވާނީ ހަތަރު ކުޅިވަރެއްގައެވެ. އެއީ ސްވިމިން، ބާސްކެޓު ބޯޅަ އަދި އެތުލެޓިކްސްގެ އިތުރުން ޓޭބަލް ޓެނިސް (ޓީޓީ)އެވެ. މިއަހަރު ރާއްޖެއިން ބައިވެރިވާން ނިންމާފައިވާ ތިން ގޭމްސްއެއް ވަނީ ފަސްކޮށްފައެވެ. އެއީ އޭޝިއަން ޔޫތު ގޭމްސް، އޭޝިއަން ގޭމްސް އަދި ޗިލްޑްރެން އޮފް އޭޝިއަން ގޭމްސްއެވެ.

މިއަހަރު ދެން ރާއްޖެއިން ވާދަކުރާނެ ގޭމްސްއަކީ ކޮމަންވެލްތް ގޭމްސްއެވެ. ކޮމަންވެލްތު ގޭމްސް ކުރިއަށް ދާނީ އަންނަ މަހުގެ 28 ން އޮގަސްޓު މަހުގެ 8 ވަނަ ދުވަހާ ހަމައަށެވެ. މިއަހަރުގެ ކޮމަންވެލްތު ގޭމްސް ކުރިއަށް ދާނީ އިންގްލެންޑްގެ ބާމިންހަމްގައެވެ.