ވެސްޓަރން އޭޝިއަން ޖޫނިއަރ ޗެސް ޗެމްޕިއަންޝިޕްގައި ބައިވެރިވުމަށް ކުޅުންތެރިން ރާއްޖެއަންނަ ފަށައިފިއެވެ.

މުބާރާތުގައި ބައިވެރިވުމަށް އަންގާރަ ދުވަހު ރާއްޖެއައިސްފައިވަނީ އުޒްބެކިސްތާން، ކަޒަކިސްތާން އަދި ޕާކިސްތާނުގެ ޓީމެވެ. މުބާރާތުގައި ބައިވެރިވުމަށް އުޒްބެކިސްތާނުން ރާއްޖެ އައީ 31 ކުޅުންތެރިންނެވެ. މީގެ އިތުރުން ކަޒަކިސްތާނުން 29 ކުޅުންތެރިން އަދި ޕާކިސްތާނުން ދެ ކުޅުންތެރިން މުބާރާތުގައި ބައިވެރިވުމަށް ވަނީ ރާއްޖެއައިސްފައެވެ. ބާކީ ތިބި ޓީމުތައް ރާއްޖެއައުމަށް ހަމަޖެހިފައިވަނީ މާދަމާއެވެ.

މި ކުޅުންތެރިންނާއެކު އެފަރާތްތަކުގެ އާއިލާގެ މެމްބަރުންނާއި ޓީމުތަކުގެ އޮފިޝަލުންވެސް އައިސްފައިވެއެވެ.

މި މުބާރާތުގައި ޖުމްލަ ނުވަ ގައުމަކުން ބައިވެރިވެފައިވެއެވެ. ރާއްޖޭގެ އިތުރުން މުބާރާތުގައި ބައިވެރިވަނީ ކަޒަކިސްތާން، ކިރިގިސްތާން، އުޒްބަކިސްތާން، ބަންގްލަދޭޝް، އިންޑިއާ، ނޭޕާލް، ޕާކިސްތާން އަދި ސްރީލަންކާއެވެ.

މިއީ ރާއްޖޭގައި މިހާތަނަށް ބާއްވާ ފުރަތަމަ އިންޓަރނޭޝަނަލް ޗެސް މުބާރާތެވެ. އަދި މިއީ އެންމެ ގިނަ އަދަދެއްގެ ގައުމުތަކުން ބައިވެރިވެގެން ރާއްޖޭގައި މިހާތަނަށް ކުރިއަށް ގެންދާ އިންޓަރނޭޝަނަލް މުބާރާތްވެސްމެއެވެ.

އަންހެން ޑިވިޝަނާއި ފިރިހެން ޑިވިޝަން ހިމެނޭ ގޮތަށް މުބާރާތް ކުރިއަށް ގެންދާނީ ހަ އުމުރުފުރާއަކަށް ބަހާލައިގެންނެވެ. މުބާރާތް އޮންނާނީ މި މަހުގެ 16ން 23ށް، އއ. އުކުޅަހުގައެވެ.