ހަނގުރާމައަށް ފުރިހަމަ ނިމުމެއް އަތުވެދާނެކަމުގެ ކޮޅުމަތިވެސް ފެންނަން ނެތް ޔަމަނުގެ ވެރިރަށް ސަންއާގައި ހިންގާ ކުޑަކުޑަ ވޯރކްޝޮޕެއްގެ ތެރޭގައި ކޮޅުކޮޅު މައްޗަށް އަލިފާން ކަނިތައް ބުރައިގެންދާ މަންޒަރު، ބަލާލަން ކިތަންމެހާވެސް ހިތްގައިމެވެ.

އެ ވޯކްޝޮޕް ތެރޭގައި މަސައްކަތްތެރިން އަވަދިނެތި، ނަމަވެސް ފަރުވާތެރިކަމާއެކު މަސައްކަތްކުރަމުންދަނީ، ޔަމަނުގެ ސަގާފަތާ ގުޅިފައިވާ ޚާއްސަ ހަންޖަރުތައް ތައްޔާރުކުރަން ބޭނުންވާ ތިލަތައް ތޫނުކުރުމަށެވެ.

އެއްފަރާތަކަށް ބަޅުކޮށް، ވަރުގަދައަށް ޒީނަތްތެރިކޮށްފައި ވާ މި ހަންޖަރު ނުވަތަ "ޖަމްބިއާ"އަކީ ޔަމަނުގެ ސަގާފަތާ މީގެ އެތައް ހާސް އަހަރެއް ކުރިއްސުރެ ގުޅިފައިވާ އެއްޗެކެވެ.

އެންމެ އިހުގައި، ހަނގުރާމަވެރިން ގެންގުޅުނު ހަތިޔާރަކަށް ވީނަމަވެސް، މިއަދު އެ ރީތި ހަންޖަރު ރަމްޒުކޮށްދެނީ އެ ހިފައިގެން ނުވަތަ އަޅައިގެން ހުންނަ މީހާގެ ހައިބަތާއި މުހިންމުކަމެވެ.

ތަފާތު އެކި ބާވަތުގެ ޖަމްބިއާ ހުރެއެވެ. ވިޔަފާރިވެރިއެއްކަމަށްވާ އައްމާރު ގަބްސް ކިޔައިދިން ގޮތުގައި، ސައިފާނީ، ކަރްކް އަދި މައްސޫއީ ފަދަ ޖަމްބިއާ ހަންޖަރު ހުރެއެވެ.

ސައިފާނީ ހަންޖަރު ހަދަނީ ރައިނޮސޯރަސްގެ ދަޅުން ކަމަށްވާއިރު ކަރްކް ހަދަނީ މީގޮނުގެ ދަޅުންނެވެ. މައްސޫއީ ޖަމްބިއާ ހަދަނީ ފީންޏެއްހެން އޮންނަ ކެރިބޫ ދަޅުންނެވެ.

ސައިފާނީ، ކަރްކް އަދި މައްސޫއީފަދަ ޖަމްބިއާ ހަންޖަރުތަކުގެ ތެރެއިން އެންމެ އަގު ހުންނަނީ ސައިފާނީ ޖަމްބިއާގައެވެ. ސައިފާނީ ހަންޖަރު ހަދަނީ ރައިނޮސޯރަސްގެ ދަޅުން ކަމަށް ވީނަމަވެސް، މިއަދު އެ ޖަނަވާރުގެ ދަޅު ބޭނުން ކުރުމަކީ މަނާކޮށްފައި އޮންނަ ކަމެކެވެ. އެހެންކަމުން، މި ބާވަތުގެ ޖަމްބިއާގެ އަދަދުވެސް މަދެވެ. އަދަދު މަދުވުމާއެކު އަގުވެސް އިންތިހާއަށް އުފުލިގެންދެއެވެ. ސައިފާނީ ޖަމްބިއާއެއްގެ އަގު، އެތައް ސަތޭކަ ހާސް ޑޮލަރަކަށްވެސް އަރާފާނެއެވެ.

ވިޔަފާރީގައި ރައިނޮސޯރަސްގެ ދަޅު ބޭނުންކުރުން މަނާކުރުމުން، ޔަމަނުގެ ރައްޔިތުން ވަނީ ހަންޖަރުގެ މުއްގަނޑު ތައްޔާރުކުރުމަށްޓަކައި އެހެން ބާވަތްތަކުގެ ޖަނަވާރުތަކަށް ބަރޯސާވާން ފަށާފައެވެ. އެގޮތުން ފުއްލާ، ކެރިބޫ އަދި މީގޮނުފަދަ ޖަނަވާރުތަކުގެ ދަޅު ބޭނުންކުރެއެވެ.

ގަބްސް ބުނިގޮތުގައި މީގޮނުގެ ދަޅުން ތައްޔާރުކޮށްފައި ހުންނަ ޖަމްބިއާއަށް އެދޭ މީހުންގެ އަދަދު، މި ފަހަކަށް އައިސް، ދަނީ އިތުރު ވަމުންނެވެ.

މި ހަންޖަރުތަކަކީ ޔަމަނުގައި ފިސާރި އަގުހުރި މުދަލަކަށް ވަނީ ވެފައެވެ. އާއިލާގެ ތެރޭގައި އެއް ޖީލުން އަނެއް ޖީލަށް ހަދިޔާކުރާ ތަރިކަ މުދަލެއްގެ ދަރަޖައިގައެވެ.

ޔަމަނުގެ ޓީވީ ހޮސްޓުންވެސް އެއް އަރިއަކުން ހަންޖަރު ފެންނަން ހުންނާނެހެން ހެދުން އެޅުމަށް ޑިމާންޑްކުރެއެވެ. އެކަން ވެފައި އޮންނަނީ ހޮސްޓުންގެ އަމިއްލަވަންތަކަމުގެ ރަމްޒަކަށެވެ.

ހަންޖަރެއްގެ އަގު، އާންމު ގޮތެއްގައި ބަރޯސާވަނީ އެއަށް ވީ ދުވަހާއި، އެ މިލްކުކޮށްފައިވާ ގަބީލާއާއި، މުއްގަނޑު ތައްޔާރުކޮށްފައިވާ ޖަނަވާރުގެ މައްޗަށެވެ.