ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ކުއްލި ކޮންގްރެސެއް މިއަަދު ބާއްވަން ނިންމައިފިއެވެ.

އެފްއޭއެމުން ބުނި ގޮތުގައި އެ އެސޯސިއޭޝަންގެ ކޮންގްރެސް ބާއްވަނީ މިއަދު ހަވީރުއެވެ. ކޮންގްރެސް ބާއްވަން ހަމަޖެހިފައި އޮތީ ހ.މީރުމާގައެވެ. ކޮންގްރެސް އޮންނަކަން އެފްއޭއެމުން މީޑިއާތަކަށް އަންގާފައިވަނީ މިއަދު 12 ޖަހަން އުޅެނިކޮށެވެ. ކޮންގްރެސްގައި ކުރިއަށް ދާނެ ކަންކަމުގެ މައުލޫމާތެއް އެފްއޭއެމުން ހާމަކޮށްފައެއް ނުވެއެވެ.

ބެލެވޭ ގޮތުގައި މިއަދުގެ ކޮންގްރެސްގައި ވިކްޓްރީ ސްޕޯޓްސް ކުލަބުގެ ސަސްޕެންޝަން އުވާލާނެއެވެ. ދާދި ފަހުން ވިކްޓްރީން ވަނީ އެ ކުލަބަށް ކުޅެފައިވާ ދިވެހި ކުޅުންތެރިންނާއި ބިދޭސީ ކުޅުންތެރިންނަށް ދޭންޖެހޭ މުސާރަ ދިނުމަށްޓަކައި އެފައިސާ އެފްއޭއެމްއާ ހަވާލުކޮށްފައެވެ. އަދި އެ ފައިސާ މިހާރު ކުޅުންތެރިންނަށް ދެމުންދާކަމަށް ވިކްޓްރީއިން ވަނީ ބުނެފައެވެ.