ސްރީލަންކާގައި ދަރިވަރުންތަކެއް ފެން ބޮޑުވެފައިވާ ކްލާސްރޫމެއްގައި އޯ-ލެވެލް ކަރުދާސް ހަދާފައިވާއިރު، އެމައްސަލަ ބަލާނެކަމަށް އެގައުމުގެ އެޑިއުކޭޝަން މިނިސްޓްރީން ބުނެފިއެވެ.
ލަންކާގެ ސްކޫލެއްގައި މިއަހަރު އޯ-ލެވެލް ހަދާ ދަރިވަރުންތަކެއް ވަނީ ވާރޭވެހި ފެންބޮޑުވެފައިވާ ކްލާސްރޫމެއްގައި ޓެސްޓު ހަދާފައެވެ. އެދަރިވަރުން ޓެސްޓު ހަދަން ތިބި ވަގުތުވެސް އެކްލާސްރޫމަށް ވާރޭ ވިއްސާފައިވެއެވެ.
ކުޑަ ހިފައިގެން އިމްތިހާން ކަރުދާސް ހަދަން ތިބި ދަރިވަރުންގެ މޭޒުމައްޗާއެކު އިމްތިހާން ކަރުދާސް ވަނީ ތެމިފައެވެ.
މިމައްސަލަ ފެންމަތިވެފައިވާއިރު، އެޑިއުކޭޝަން މިނިސްޓްރީން ވަނީ އިމްތިހާނުގައި ކުދިން ބައިތިއްބަން ކްލާސްރޫމްތައް ކަނޑައެޅި އިރު، އެފަދަ ކްލާސްރޫމެއް ކަނޑައެޅި މައްސަލައާއި، އެހެން ކްލާސްރޫމަކަށް ކުދިން ބަދަލު ނުކުރި މައްސަލަ ބަލާނެ ކަމަށް ބުނެފައެވެ.
މީގެ އިތުރުން މި މައްސަލަ މިނިސްޓްރީއަށް ރިޕޯޓުކޮށްފައި ނުވަނީ ކީއްވެގެންތޯވެސް ބަލާނެ ކަމަށް އެމިނިސްޓްރީން ވަނީ ބުނެފައެވެ.
މިމައްސަލަ ބަލާނީ ލަންކާގެ އެޑިއުކޭޝަން މިނިސްޓްރީގެ އިމްތިހާނުތަކާބެހޭ ޑިޕާޓްމަންޓުން ނެވެ.
