މުސާރަ ކުޑަވުމުގެ ސަބަބުން ގިނަ އަދަދެއްގެ ޕްރިންސިޕަލުން ބޮޑެތި މުސާރަތައް ލިބޭ ވަޒީފާތަކަށް ބަދަލުވި ކަމަށާއި ސަރުކާރުން މުސާރައިގެ އޮނިގަނޑަށް ގެނައި ބަދަލާއެކު އެ ޕްރިންސިޕަލުން އެނބުރި އަންނަން ބޭނުންވާ ކަމަށް ރެހެންދި ސްކޫލުގެ ޕްރިންސިޕަލް ނާޒިމް އަބްދުﷲ ވިދާޅުވެއްޖެއެވެ.

ނާޒިމް މިހެން ވިދާޅުވީ ރާއްޖެ ޓީވީގެ ފަލަ ސުރުޚީ ޕްރޮގްރާމްގައި ވާހަކަދައްކަވަމުންނެވެ. އޭނާ ވިދާޅުވީ މި ސަރުކާރުން ތައުލީމީ ދާއިރާގެ އޮނިގަނޑަށް ގެނައި ބަދަލަކީ ވަރަށް ރަނގަޅު ބަދަލެއް ކަމަށާއި އޭގެ އަސަރު މިހާރުވެސް ފެންނަމުންދާ ކަމަށެވެ. އެގޮތުން، ކުރިން ސްކޫލްތައް ހިންގުމުގައި މަސައްކަތް ކުރި މީހުން އެނބުރި އެ މަޤާމުތަކަށް އަންނަން ބޭނުންވާ ކަމަށް އޭނާ ވިދާޅުވިއެވެ.

ނާޒިމް ވިދާޅުވީ ކުރީގެ އޮނިގަނޑުގައި މުސާރަ ކުޑަވުމުގެ ސަބަބުން ޕްރިންސިޕަލުންނާއި ޑެޕިއުޓީ ޕްރިންސިޕަލުން ހޯދަން ދަތި ކަމަށެވެ. ނަމަވެސް އޮނިގަނޑަށް ގެނައި ބަދަލުތަކާއެކު ޕްރިންސިޕަލުންގެ މުސާރަ ބޮޑުވެ، އެ ދާއިރާއަށް މީހުން ނުކުންނަން ޝައުގުވެރިވާނެ ކަމަށް ވެސް އޭނާ ވިދާޅުވިއެވެ. އަދި މީގެ ސަބަބުން ޕްރިންސިޕަލުުންނާއި ޑެޕިއުޓީ ޕްރިންސިޕަލުން އިތުރުވާނެ ކަމަށް ވެސް އޭނާ ވިދާޅުވިއެވެ.

ނާޒިމް ވިދާޅުވީ ޕްރިންސިޕަލުންގެ އިތުރުން ފެންވަރު ރަނގަޅު ޓީޗަރުންވެސް ކުރިއަށް އޮތްތަނުގައި ތައުލީމީ ދާއިރާގައި އިތުރުވާނެ ކަމަށެވެ. އެގޮތުން، މިހާރުވެސް ގިނަ ޓީޗަރުން ޑިގްރީއާ ހަމައަށް ކިޔަވަމުން އަންނަ ކަމަށާއި އެހިސާބަަށް ނުކިޔަވައި ތިބި ޓީޗަރުންވެސް މުސާރައިގެ އޮނިގަނޑަށް ގެނައި ބަދަލާއެކު ކިޔަވަން ޝައުގުވެރިކަން ފާޅުކުރަމުން އަންނަ ކަމަށެވެ.

މީގެ އިތުރުން މި ބަދަލާއެކު ކުރިއަށް އޮތްތަނުގައި ރާއްޖޭގެ ތައުލީމީ ނިޒާމު އިތުރަށް ފުރިހަމަވެ، ޓީޗަރުން މިހާރަށްވުރެ ޒިންމާދާރުވާނެ ކަމަށް އުއްމީދު ކުރައްވާ ކަމަށް ވެސް ނާޒިމް ވިދާޅުވިއެވެ.

ނާޒިމް ވަނީ ތައުލީމީ ދާއިރާގެ މުވައްޒަފުންގެ މުސާރަތަކަށް މި ސަރުކާރުން ގެނައި ހެޔޮ ބަދަލު ފާހަގަކުރައްވާ ރައީސުލްޖުމްހޫރިއްޔާ އިބްރާހިމް މުޙައްމަދު ސާލިހަށް ޝުކުރު އަދާކުރައްވާފައެވެ.