ހުސްވި ހަފްތާގައި މުޅި ރާއްޖެއިން ކޮވިޑް-19ށް ޕޮޒިޓިވްވެފައިވަނީ 91 މީހުންކަމަށް ހެލްތު ޕްރޮޓެކްޝަން އެޖެންސީ(އެޗްޕީއޭ)ން ހާމަކޮށްފިއެވެ.

އެޗްޕީއޭއިން ހާމަކޮށްފައިވާ ތަފާސްހިސާބުތަކަކީ މެއި 22ން މެއި 28ށް ޕޮޒިޓިވްވެފައިވާ މީހުންގެ ތަފާސްހިސާބެވެ. މިތަފާސްހިސާބަށް ބަލާލާއިރު މީގެތެރޭގައި ހިމެނެނީ މާލެ ސަރަހައްދުން ޕޮޒިޓިވްވި40 މީހުންނާއި އަތޮޅުތަކުން ޕޮޒިޓިވްވި24 މީހުންނާއި އެހެނިހެން ހިސާބުތަކުން ޕޮޒިޓިވްވި27 މީހުންނެވެ. އޭގެކުރީ ހަފްތާގައި ޕޮޒިޓިވްވެފައިވާ އަދަދުތަކަށް ބަލާލާއިރު އެހަފްތާގައި މުޅި ޖުމްލަ 102 މީހުން ޕޮޒިޓިވްވެފައިވެއެވެ. އެއީ މާލެ ސަރަހައްދުން 25 މީހުންނާއި އަތޮޅުތަކުން 58 މީހުންނާއި އެހެނިހެން ހިސާބުތަކުން 19 މީހުންނެވެ. ފާއިތުވި ހަފްތާއަކީ ދުވަސްތަކަކަށްފަހު މާލެ ސަރަހައްދުން ޕޮޒިޓިވްވީ މީހުންގެ އަދަދު އަތޮޅުތަކަށްވުރެ ގިނަވި ހަފްތާއެކެވެ.

ފާއިތުވި ހަފްތާގައި މާލެ ސަރަހައްދުން އެންމެ ގިނަ މީހުން ޕޮޒިޓިވްވެފައިވަނީ މެއި 24 ގައެވެ. އެއީ 8 މީހުންނެވެ. އެންމެ މަދުން މީހުން ޕޮޒިޓިވްވެފައިވަނީ މެއި 28ގައެވެ. އެއީ 3 މީހުންނެވެ.

އަތޮޅުތަކަށް ބަލާލާއިރު ފާއިތުވި ހަފްތާގައި އެންމެ ގިނަ މީހުން ޕޮޒިޓިވްވެފައިވަނީ މެއި 24 ވަނަ ދުވަހުއެވެ. އެއީ 11 މީހުންނެވެ. އަތޮޅުތަކުން އެއްވެސް މީހަކު ޕޮޒިޓިވްނުވާ ތިން ދުވަސް ރިކޯޑްކޮށްފައިވެއެވެ. އެއީ މެއި 22، 23 އަދި 27 ވަނަ ދުވަހުއެވެ.

މުޅި ރާއްޖެއަށް ބަލާލާއިރު ފާއިތުވި ހަފްތާގައި އެންމެ ގިނަ މީހުން ޕޮޒިޓިވްވެފައިވަނީ މެއި 24 ގައެވެ. އެދުވަހު ޕޮޒިޓިވްވެފައިވަނީ 23 މީހުންނެވެ. އެންމެ މަދުން މީހުން ޕޮޒިޓިވްވެފައިވަނީ މެއި 22 އަދި 23 ވަނަ ދުވަހުއެވެ. އެ ދެދުވަހު ޕޮޒިޓިވްވެފައިވަނީ 8 މީހުންނެވެ.

މިއާއެކު މުޅި ރާއްޖެއިން ކޮވިޑް-19ށް ޕޮޒިޓިވްވީ މީހުންގެ އަދަދު ވަނީ 179،753ށް އަރާފައެވެ. ފާއިތުވި ހަފްތާގައި ވަނީ އެކަކު މިބަލީގައި ނިޔާވެފައެވެ. އެއާއެކު މިބަލީގައި ނިޔާވި މީހުންގެ އަދަދު ވަނީ 299ށް އަރާފައެވެ.

ވެކްސިންގެ ތަފާސްހިސާބުތަކަށް ބަލާއިރު ފުރަތަމަ ޑޯޒް ޖެހި މީހުންގެ އަދަދު ވަނީ 398،682ށް އަރާފައެވެ. ދެޑޯޒް 384،183 މީހުން ޖަހާފައިވާއިރު ބޫސްޓަރ ޑޯޒް ޖެހި މީހުންގެ އަދަދު ވަނީ 160،911ށް އަރާފައެވެ.