ރާއްޖެއިން ބޭރުން 100 އަށްވުރެ ގިނަ ކުޅުންތެރިން ވާދަކުރާ ޖޫނިއަރ ޗެސް މުބާރާތެއް ރާއްޖޭގައި ބާއްވަން ޗެސް އެސޯސިއޭޝަނުން ތައްޔާރުވާން ފަށައިފިއެވެ. ރާއްޖޭގައި ބާއްވަނީ ވެސްޓަން އޭޝިޔަން ޖޫނިއަރ ޗެސް ޗެމްޕިއަންޝިޕެވެ. މުބާރާތުގައި ރާއްޖެއާއެކު ނުވަ ޤައުމުން ވާދަކުރާނެކަމަށް ޗެސް އެސޯސިއެޝަނުން މައުލޫމާތުދެއެވެ.
ޗެސް އެސޯސިއޭޝަންގެ ރައީސް ހުސެއިން ޝިޔާން ވިދާޅުވީ މުބާރާތް ބާއްވާނީ އއ.އުކުޅަހުގައި ކަމަށެވެ. އޭނާ ވިދާޅުވީ މާލެއިން ބޭރުގައި މުބާރާތް ބޭއްވުމަކީ ޔޫތު މިނިސްޓަރު އަހުމަދު މަހުލޫފްގެވެސް ވަރަށްބޮޑު އެދިވަޑައިގަތުމެއް ކަމަށެވެ. މުބާރާތް ބާއްވާނީ އުކުޅަހުގައި ހުންނަ ކޮންވެސްޝަން ސެންޓަރުގައެވެ. އެއީ އެކަމަށް ވަރަށް އެކަށީގެންވާ ތަނެއްކަމަށާއި, ކުޅުންތެރިންގެ އެކޮމަޑޭޝަން ފަދަ ކަންކަންވެސް އުކުޅަހުގައި ހަމަޖެހެން އެބަހުރިކަން އެސޯސިއޭޝަނުން ފާހަގަކުރިއެވެ.
މުބާރާތުގައި ރާއްޖެއިންވެސް ފަނަރަ ވަރަކަށް ކުޅުންތެރިން ވާދަކުރާނެއެވެ. ރާއްޖޭގެ އަމާޒަކީ ބައެއް ކެޓަގަރީތަކުން ލޯ މެޑަލް ހޯދުމެވެ.
ބައެއް ކެޓަގަރީތަކުން މިވިސްނަނީ ލޯ މެޑަލް ހޯދަން. މިހާރު ކުރެވެމުން އަންނަ ޖޫނިއަރ މަސައްކަތްތަކަށް ބަލާއިރު އަޅުގަނޑުމެންގެ ކުދިން ޗެލެންޖް ކުރާނެ.ހުސެއިން ޝިޔާން/ ޗެސް އެސޯސިއޭޝަންގެ ރައީސް
ޝިޔާން ވިދާޅުވީ ސަރުކާރުގެ ސިޔާސަތުގެ ސަބަބުން ކުދި ކުޅިވަރުތަކުންވެސް ރާއްޖޭގައި ތިބެގެން ދިވެހި ކުޅުންތެރިންނަށް ވާދަކުރުމުގެ ފުރުޞަތު ލިބުމަކީ ވަރަށްބޮޑު ހިތްހަމަޖެހުމެއް ކަމަށެވެ. ކުދި ކުޅިވަރުތަކުންވެސް އިންޓަރނޭޝަނަލް މުބާރާތްތައް ރާއްޖޭގައި ބާއްވަން ލިބޭކަން އޭނާ ފާހަގަކުރެއްވިއެވެ. އޭގެ ސަބަބުން ރާއްޖޭގެ ކުޅުންތެރިންނަށް ލިބެނީ ވަރަށްބޮޑު ފުރުޞަތަކާއި, ތަޖުރިބާއެއްކަމަށް އޭނާ ވިދާޅުވިއެވެ.
