މޯލްޑިވްސް ބްލަޑް ސަރވިސަސްއަށް ލޭ ހަދިޔާކުރުމުގެ ޕްރޮގްރާމެއް, ރާއްޖޭގައި ހުންނަ ސްރީލަންކާގެ ހައިކޮމިޝަނުން ފަށައިފިއެވެ.

މި ޕްރޮގްރާމް ފެށުމުގެ ރަސްމިއްޔާތު ޝަރަފުވެރިކޮށްދެއްވާފައިވަނީ ހެލްތު މިނިސްޓްރީގެ ސްޓޭޓް މިނިސްޓަރ ޑރ. ޝާހު މާހިރެވެ.

މި ޕްރޮގްރާމަކީ ރާއްޖޭގައި ދިރިއުޅޭ ސްރީލަންކާ މީހުން ލޭ ހަދިޔާކުރުމުގެ ގޮތުން ލަންކާ އެމްބަސީން އިސްނަގައިގެން ފަށާފައިވާ ޕްރޮގްރާމެކެވެ. ހޮނިހިރު ދުވަހު ކުރިއަށްގެންދިޔަ މި ޕްރޮގްރާމުގައި ހެނދުނު 9:00ން މެންދުރު 14:00ށް ލޭ ހަދިޔާކުރުން ވަނީ ކުރިއަށްގެންގޮސްފައެވެ.

ރާއްޖޭގައި ހުންނަ ސްރީލަންކާ އެމްބަސީން ބުނީ، މިއީ ސިލްސިލާކޮށް ކުރިއަށްގެންދިއުމަށް ފަށާފައިވާ ޕްރޮގްރާމެއް ކަމަށެވެ. މިގޮތުން ކޮންމެ ތިން މަހަކުން މި ޕްރޮގްރާމް ކުރިއަށްގެންދިއުމަށް ރާވާފައިވާކަމަށެވެ.

މި ޕްރޮގްރާމުގެ ސަބަބުން ދެ ގައުމުގެ ގުޅުން އިތުރަށް ރަނގަޅުވުމަށް މަގުފަހިވެގެންދާނެ ކަމަށް އެމްބަސީން ބުނެފައިވެއެވެ.

މި ޕްރޮގްރާމް ޝަރަފުވެރިކޮށްދެއްވައި ވާހަކަދައްކަވަމުން ސްޓޭޓް މިނިސްޓަރ ޑރ. ޝާހު މާހިރު ވަނީ، ރާއްޖެއާ ލަންކާއާ ދެމެދު އޮތް ޒަމާންވީ ގުޅުމުގެ މައްޗަށް އަލިއަޅުވާލައްވާފައެވެ. އަދި ލަންކާގެ ފަރާތުން ކުރިއަށްގެންދާ މި ޕްރޮގްރާމަށް ޑރ. ޝާހު ވަނީ ޝުކުރުއަދާކުރައްވާފައެވެ.