ނޫސްވެރިންނަކީ ދުނިޔޭގެ ކޮންމެ ހިސާބަކަށްވެސް އަދި ކޮންމެ ދައުލަތަކަށްވެސް ވަރަށް މުހިންމު ބައެކެވެ. އެއީ ދައުލަތެއްގެ ހަތަރުވަނަ ބާރެވެ. ނޫސްވެރިންގެ މަސައްކަތަކީ މުޖުތަމައަކަށް ވަރަށް ބޮޑު ބަދަލެއް ގެނުވާ މަސައްކަތެކެވެ. ނޫސްވެރިން ކުރާ މަސައްކަތަކީ މުޖުތަމައުން ބަލައިގަންނަންޖެހޭ މަސައްކަތެކެވެ. ނޫސްވެރިންނަށް މިނިވަންކަމާއެކު އެމީހުންގެ މަސައްކަތް ކުރިއަށްގެންދިއުމުގެ ފުރުސަތު ދެވެންޖެހެއެވެ.

އެހެންނަމަވެސް މިއީ ގިނަ މުޖުތަމައުތަކުން ނުފެންނަ މަންޒަރެކެވެ. ގިނަ ގައުމުތަކުގައި ނޫސްވެރިން އެމީހުންގެ ވަޒީފާ އަދާކުރަމުންދަނީ ފިއްތުންތަކެއްގެ ތެރޭގައެވެ. އެތައް ގޮންޖެހުމަކާ ކުރިމަތިލާންޖެހެއެވެ. ގިނަ ފަހަރަށް އަމިއްލަ ފުރާނަ އަތްމައްޗަށް ލައިގެން އުޅެންޖެހެއެވެ. އެކި ފަރާތްތަކުން އެތައް އިންޒާރެއް ދެއެވެ. ނޫސްވެރިން އަދާކުރާ މަސައްކަތުގެ ސަބަބުން، އެތައް ނޫސްވެރިއަކު ދުނިޔެ ދޫކޮށް ގޮސްފައިވެސް އެބަހުއްޓެވެ. މިއީ ނޫސްވެރިކަމުގެ މިނިވަންކަންތޯއެވެ؟

ކޮންމެ އަހަރެއްގެވެސް މެއި މަހުގެ 3 ވަނަ ދުވަހަކީ ބައިނަލްއަގުވާމީގޮތުން ނޫސްވެރިކަމުގެ މިނިވަންކަމުގެ ދުވަހުގެ ގޮތުގައި ފާހަގަކުރަމުން އަންނަ ދުވަހެވެ. މިއީ މީޑިއާގެ މިނިވަންކަމުގެ މުހިންމުކަމާއި، ކުރިމަތިވާ ގޮންޖެހުންތަކަށް މުޖުތަމައުގެ ހޭލުންތެރިކަން އިތުރުކުރުމަށް މަސައްކަތްކުރުމަށް ޚާއްސަ ދުވަހެކެވެ. މިދުވަސް ދުނިޔޭގެ އެކި ކަންކޮޅުތަކުގެ ނޫސްވެރިން ހޭދަކުރަނީ އެމީހުންނަށް ގެއްލިފައިވާ ހައްގުތަކުގެ ވާހަކަ ދެއްކުމުގައެވެ. އެކަންކަން ރައްޔިތުންނަށް ކިޔައިދިނުމުގައެވެ. އަދި މި މަސަައްކަތުގައި އުޅެނިކޮށް ދުނިޔެ ދޫކޮށް ގޮސްފައިވާ ނޫސްވެރިންނާއި، އަނިޔާ ލިބުނު ނޫސްވެރިންގެ މަތިން ހަނދާން އައުކުރުމަށްވެސް މި ދުވަހު މަސައްކަތްކުރެއެވެ.

ދިވެހިރާއްޖޭގައި އޮތް ނޫސްވެރިކަމުގެ ދިގު ތާރީޚަށް ބަލާއިރު، މިހާ ހިސާބަށް އައިއިރު އެކި ދުވަސްވަރު މަތިން ނޫސްވެރިންނަށް ވަނީ އެތައް ގޮންޖެހުމަކާއި ތުރާލެއް ކުރިމަތިވެފައެވެ. ނޫސްވެރިންނާއި، މީޑިއާތަކަކީ އެތައް ބަޔަކު ބާރުފޯރުވަން މަސައްކަތްކުރާ ތަންތަނެވެ. ނޫސްވެރިންގެ މަސައްކަތަށް ހުރަސް އަޅަން ކުރާ މަސައްކަތަކީ ޚުދު އެއިރެއްގައި އޮންނަ ސަރުކާރަކުންވެސް ކުރާ ކަމެކެވެ. މިގޮތުން ކުރީގެ ރައީސް އަބްދުﷲ ޔާމީންގެ ސަރުކާރުގައި ނޫސްވެރިންނާއި މީޑިއާތަކަށް އެ ކުރިމަތިކުރުވި ގޮންޖެހުންތަކުގެ ވާހަކަތަކަކީ ދިވެހި ނޫސްވެރިން އަބަދުވެސް ދައްކާނެ ވާހަކަތައްކަން ޔަގީނެވެ.

ސަރުކާރާ ދެކޮޅު ޚަބަރެއް ލިޔާ ނޫސްވެރިއަކަށް އޭރު ކުރިމަތިލާންޖެހޭ ތަކުލީފުތައް ގިނައެވެ. ނޫސްވެރިން ހައްޔަރުކުރުމާއި، މީޑިއާތައް ޖޫރިމަނާކުރުން ފަދަ ކަންކަމަކީ ރައީސް ޔާމީންގެ ސަރުކާރުން ކޮށްފައިވާ ކަންކަމުގެ ތެރޭގައި ހިމެނޭ މަދު ކަމެކެވެ. މިއަދު ގިނަ ނޫސްވެރިން ގެންދަނީ އެމީހުންނަށް ކުރިމަތިވި ގޮންޖެހުންތަކުގެ ވާހަކަތައް ހިއްސާކުރަމުންނެވެ. އުނދަގޫ ދުވަސްތަކަކަށްފަހު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ސަރުކާރު ވުޖޫދުވުމާއެކު، މިހާރު މީޑިއާތަކަށް ކުރިމަތިވާ ފިއްތުންތައް ވަނީ ވަރަށް ބޮޑަށް ކުޑަވެފައެވެ. އެހެންނަމަވެސް އަދިވެސް ނޫސްވެރިންނަށް ފުރިހަމަ މިނިވަންކަން ލިބިފައިވާކަމަށް ބުނެވޭނެ ކަމަކަށް ގިނަ ނޫސްވެރިން ގަބޫލެއް ނުކުރެއެވެ. އެހެންކަމުން އެކަމުގައި އެކި ނޫސްވެރިންގެ ޚިޔާލު ހުރި ގޮތް މިއަދު ދަނީ ހިއްސާކުރަމުންނެވެ.

ކޮންމެ ގައުމެއްގައިވެސް މީޑިއާތައް ތަމްސީލުކުރާ އެކި އިދާރާތައް ހުރެއެވެ. މިފަދަ އިދާރާތަކުންވެސް މިއަދު ގޮވާލަމުންދަނީ ނޫސްވެރިންނަށް މިނިވަންކަން ކަށަވަރުކޮށްދިނުމަށެވެ. އެހެންނަމަވެސް ރާއްޖެއިން މިއަދު ފެންނަނީ ތަފާތު މަންޒަރެކެވެ. ދުވަހާގުޅިގެން މި އިދާރާތަކުން ހިންގާ ހަރަކާތްތަކުގެ ތެރޭގައި، ނޫސްވެރިކަމުގެ މިނިވަންކަމާ އެއްވެސް ވަރަކަށް ގުޅުމެއް ނެތް ހަރަކާތްތަކެއް އެބަހުއްޓެވެ. މިގޮތުން ލޭ ހަދިޔާކުރުމަށް ފަށަން ނިންމާފައިވާ ހަރަކާތަށް ނޫސްވެރިންގެ ފާޑުކިޔުން ވަނީ އަމާޒުވެފައެވެ. މިކަމާ ނޫސްވެރިކަމުގެ މިނިވަންކަމާ އޮތީ ކޮން ގުޅުމެއްތޯ ދަނީ ސުވާލު އުފައްދަމުންނެވެ. މިދުވަހު މި އިދާރާތަކުން ގޮވާލަންޖެހެނީ ނޫސްވެރިކަމުގެ މިނިވަންކަމަށެވެ. ނޫސްވެރިންނަށް އަދިވެސް ކުރިމަތިވާ ގޮންޖެހުންތައް އެބަހުއްޓެވެ. އެކަންކަން ދެނެގަނެ އެކަންކަމަށް ހައްލު ހޯދުމަށް މަސައްކަތްކުރަންޖެހޭކަމަށް ނޫސްވެރިން ދަނީ ބުނަމުންނެވެ.