މިހާރު ކުރިއަށްދާ ފީފާ ވޯލްޑް ކަޕް 2022 ގެ ކޮލިފައިންގައި ރަނގަޅު ނަތީޖާއެއްނެރެ ކެނެޑާއިން މުބާރާތުގެ ޖާގައެއް ކަށަވަރުކޮށްފިއެވެ.

މިއީ ކެނަޑާ މުބާރާތަށް ކޮލިފައިވި ދެވަނަ ފަހަރެވެ. މީގެ ކުރިން ކެނެޑާ މުބާރާތަށް ކޮލިފައިވީ 1986 ވަނަ އަހަރުއެވެ. އެފަހަރު މުބާރާތް ބާއްވާފައި ވަނީ މެކްސިކޯގައެވެ. ނަމަވެސް ކެނަޑާއަށް އެފަހަރު މުބާރާތުގެ ގްރޫޕް ސްޓޭޖް ފަހަނައަޅާ ކުރިއަށް ދެވޭ ގޮތެއް ނުވިއެވެ. އެހެންކަމުން މިއީ ފުރަތަމަ ފަހަރަށް މުބާރާތުގެ ގަދަ 16 ގައި ކުޅުމަށް ކެނަޑާއަށް ލިބުނު ރަނގަޅު ފުރުސަތަކަށް ވާނެއެވެ.

މުބާރާތުގެ ޖާގައެއް ކެނަޑާއިން ޔަގީންކުރީ ކޮލިފިކޭޝަން މެޗުގައި ޖަމެއިކާ ބަލިކޮށްގެންނެވެ. މި މެޗުން ކެނެޑާ ކުރިހޯދީ 4-0 ގެ ތަފާތު ބޮޑު ނަތީޖާއަކުންނެވެ. މެޗުގެ 13 ވަނަ މިނެޓުގައި ކެނަޑާއަށް ލީޑު ނަގައިދިނީ ކައިލް ލާރިންއެވެ. އޭގެ ފަހުން ފުރަތަމަ ހާފު ނިމުމުގެ ކުރިން އެޓީމަށް ލީޑު ފުޅާ ކޮށްދިނީ ޓަހޯން ބިއުކަނަންއެވެ. ކެނެޑާގެ ތިންވަނަ ލަނޑު ޖޫނިއަރ ހޮއިލޭ ކާމިޔާބުކޮށްދިން އިރު، އެޓީމުގެ ހަތަރު ވަނަ ލަނޑަކީ ޖެމެއިކާގެ އެޑްރިއަން މަރިއައްޕާ އަތުން ބައިކޮޅަށް ވަން ލަނޑެކެވެ.