އުތުރުތިލަފަޅުގައި ތަރައްގީކުރާ ކޯސްޓްގާޑް ބަނދަރާއި ޑޮކްޔާޑްގެ ކުރެހުން ކަމަށް ބުނެ ދައުރުކުރަމުންދަނީ ސައްހަ ކުރެހުންތަކެއް ނޫން ކަމަށް ޑިފެންސް މިނިސްޓްރީން ބުނެފިއެވެ.

އުތުރު ތިލަފަޅުގައި ތަރައްގީކުރާ އަސްކަރީ މަރުކަޒުގެ ފޮޓޯތަކެއް ލިބިފައިވާ ކަމަށްބުނެ ރާއްޖޭގެ އޮންލައިން ނޫހަކުން ވަނީ ފޮޓޯތަކެއް އާންމުކޮށްފައެވެ. މި ފޮޓޯތަކުން ބަނދަރެއްގެ ކުރެހުމެއް ފެންނައިރު، އެ ކުރެހުމުގައި އެއަރ ފީލްޑަކާއި، ކޯސްޓްގާޑް ހާބަރަކާއި، ޓާމިނަލްއެއްގެ އިރުރުން އަލްޓަރނޭޓިވް މެޑިސިން ސެންޓަރަކާއި، ވޯޓަރ ޕާކެޓެއްގެ އިތުރުން ޔޮޓް ކައިރިކުރުމަށް ޚާއްސަ ބަނދަރެއް ހިމެނެއެވެ.

މި ފޮޓޯތަކާއި ގުޅިގެން ޑިފެންސް މިނިސްޓްރީން ބުނީ ބައެއް މީޑިއާތަކުގައި ދައުރުކުރާ ކުރެހުންތަކަކީ، މިހާރު ސޮއިކޮށްފައިވާ އެގްރީމަންޓްގެ ޕްރޮޖެކްޓްގެ ކުރެހުންތަކެއް ނޫން ކަމަށެވެ.

މި ކުރެހުންތައް އާންމުކޮށްފައިވާއިރު، އުތުރު ތިލަފަޅުގައި އިންޑިޔާ ސިފައިންނަށް ގާއިމުވެ ތިބެވޭ ގޮތަށް ހަދާފައިވާ އެއްބަސްވުމުގެ ކޮޕީއެއް ކަމަށް ބުނާ ލިޔުމެއްވެސް މިދިޔަ އަހަރުގެ މާރޗް މަހުގެ ތެރޭގައި އާންމުކޮށްފައިވެއެވެ. އެ އެއްބަސްވުމުގެ ކޮޕީއެއް ކަމަށްބުނާ ލިޔުން ބައެއް މީޑިއާތަކުންނާއި، ކުރީގެ ހޯމް މިނިސްޓަރު އުމަރު ނަސީރުވެސް ހާމަކުރައްވާފައެވެ.

އުތުރުތިލަފަޅުގައި ޑޮކްޔާޑަކާއި ބަނގަރެއް ތަރައްގީކުރުމުގެ އެއްބަސްވުމުގެ ދަށުން އިންޑިޔާގެ ސިފައިންގެ އުޅަނދުފަހަރަށް އެ ތަނުގައި ގާއިމުކުރާ ވަސީލަތްތައް އެއްވެސް ހުރަހެއް ނެތި ބޭނުންކުރެވޭނެ ކަމަށާއި ދެ ދައުލަތުގެ އަސްކަރީ މީހުންނާއި، ކަނޑުގެ އަދި ވައިގެ އުޅަނދުތަކަށް އެތަން ބޭނުންކުރެވޭނެ ކަމަށާއި އެތަނުގައި ގާއިމުކުރާ މުވާސަލާތީ ނިޒާމުތައް ވެސް ދެ ގައުމަށް ބޭނުންކުރެވޭނެ ކަމަށް ވެސް ބުނެފައިވެއެވެ. މީގެ އިތުރުން އެއެއްބަސްވުމުގެ މުއްދަތަކީ 30 އަހަރު ކަމަށް ބުނެ ބައެއް މީޑިއާތަކުން ވަނީ އެ ދޮގުލިޔުން ހިއްސާކޮށްފައެވެ.

ރާއްޖޭގެ ކޯސްޓް ގާޑުގެ ކެރިކުޅަދާނަކަން އިތުރުކުރުމަށްޓަކައި މާލެއަތޮޅު އުތުރު ތިލަފަޅުގައި އިންޑިޔާގެ އެހީގައި "ސިފަވަރު" ގެ ނަމުގައި ގާއިމްކުރާ ކޯސްޓްގާޑް ބަނދަރާއި ސާރވިސް ޑޮކްޔާޑުގައި ބޭރުގެ އަސްކަރީ އެއްވެސް ބަޔަކު ނުތިބޭނެކަމުގެ ޔަގީންކަން ސިފައިން ވެސް ވަނީ ދީފައެވެ. ދިވެހި ސިފައިން ބުނެފައިވަނީ މި ބަނދަރުގައި ތިބޭނީ ދިވެހި ސިފައިންނާއި ދިވެހި މުވައްޒަފުން ކަމުގައެވެ. ބަނދަރަކީ ރާއްޖޭގެ ކޯސްޓްގާޑުގެ އުޅަނދުތައް ބަނދަރުކޮށް މަރާމާތުކުރުމަށް ހަދާ ތަނެއްކަމަށާއި ބޭރުގެ އަސްކަރީ އެއްވެސް ބަޔަކު ގާއިމުވެގެން ނުތިބޭނެކަން ވެސް ސިފައިން ފާހަގަކޮށްފައިވެއެވެ.

އޭގެ އިތުރުން، ކޯސްޓްގާޑް ބަނދަރާއި ޑޮކްޔާޑަކީ 2013 ވަނަ އަހަރުން ފެށިގެން ކުރެވުނު މަސައްކަތަށްފަހު، 2016 ވަނަ އަހަރުގެ އެޕްރީލް މަހު ކުރީގެ ރައީސް ޔާމީން އިންޑިއާއަށް ކުރެއްވި ދަތުރުފުޅުގައި ސޮއިކުރެވުނު ޑިފެންސް އެކްޝަން ޕްލޭން އޮން ޑިފެންސް ކޯޕަރޭޝަނުގެ ތެރޭގައިވެސް ހިމެނޭ ކަމެކެވެ.