ރަމަޟާންމަހު އިސްލާމީ މަރުކަޒުގައި އަންހެނުން ނަމާދުކުރުމަށް ބޮޑު ޖާގައެއް އިސްލާމިކް މިނިސްޓްރީން ހަމަޖައްސައިފިއެވެ.

ރާއްޖެމްއެމްވީއަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވީ, ކުރިއަށް އޮތް ރޯދަމަހަށް ތައްޔާރުވުމުގެ ގޮތުން މިނިސްޓްރީން ގިނަ މަސައްކަތްތައް ކުރަމުންދާ ކަމަށެވެ. އެގޮތުން މިހާރު އިސްލާމީ މަރުކަޒު އާބާތުރަފިލުވުމުގެ މަސައްކަތްތައް ކުރިއަށްދާކަން ފާހަގަކުރެއްވިއެވެ. އަދި އެންމެ ބޮޑު ބަދަލެއްގެ ގޮތުގައި މިނިސްޓަރު ވިދާޅުވީ އިސްލާމީ މަރުކަޒުގައި އަންހެނުންނަށް ނަމާދުކުރެވޭނެ ގޮތަށް ބޮޑު ޖާގައެއް ޚާއްސަކޮށްފައިވުމެވެ.

މިނިސްޓަރު ވިދާޅުވީ, އިސްލާމީ މަރުކަޒުގެ ގްރައުންޑް ފްލޯރ (ވަންނައިރު ވާތް ފަރާތް) ސަރަހައްދުގެ އެއްބައި އަންހެނުން ނަމާދު ކުރުމަށް ޚާއްސަކޮށްފައިވާ ކަމަށެވެ. އަދި ދެވަނަ ފްލޯރ ވެސް އަންހެނުންނަށް ޚާއްސަކޮށްފައިވާ ކަމަށެވެ. އަދި ރަމަޟާންމަހު, ފިރިހެނުން ނަމާދުކުރުމަށް ދެވަނަ ފްލޯރ ބޭނުންކުރާނީ ހުކުރު ނަމާދުގައި އެކަނި ކަމަށެވެ. ދެފަރާތުގައި ކާޕެޓް އަޅާފައިވާކަން ފާހަގަކުރައްވައި މިނިސްޓަރު ވިދާޅުވީ ފަހި ފުރުސަތުތައް ފަހިކޮށްދިނުމާއި، އާއްމު ރައްޔިތުންނަށް ލުއި ފަސޭހަ އިންތިޒާމްތައް ހަމަޖައްސައިދިނުމަށް މަސައްކަތްކުރަމުން ދާކަމަށެވެ.

ރޯދައަށް ޚާއްސަކޮށް ގިނަ މަސައްކަތްތައް މިނިސްޓްރީން ކުރަމުންދާއިރު، ކުރީއަހަރު ތަކެކޭވެސް އެއްގޮތަށް މިއަހަރުވެސް ގިނަ ޕްރޮގްރާމްތަކެއް ކުރިއަށް ގެންދިއުމަށް ހަމަޖައްސާފައިވެއެވެ. އެގޮތުން މިއަހަރުވެސް ރަމަޟާން މަހަށް ޚާއްސަ ކޮށްގެން ދަރުސް ޕްރޮގްރާމްތައް ބޭއްވުމާއި، މިނިސްޓްރީގެ އިސްލާމިކް ސްޓޫޑިއޯއިން އުފައްދާ ޚާއްސަ ޓީވީ ޕްރޮގްރާމްތަކާއި ކުޑަކުދިންނަށް ޚާއްސަ ޓީވީ ޕްރޮގްރާމާއި، ދީނީގޮތުން ހޭލުންތެރިކުރުމުގެ ރޭޑިއޯ ޕްރޮގްރާމްތަކާއި، އަދި ކޮންމެ އަހަރަކުވެސް ރަމަޟާންމަހުގެ ރޭތައް އިހްޔާކުރުމުގެގޮތުން ކުރިޔަށްގެންދާ އިހްޔާ ފޯރަމް ބާއްވާގޮތަށް ހަމަޖެހިފައިވެއެވެ.

ނަމަވެސް ކުރީއަހަރުތަކާ ޚިލާފަށް މިއަހަރު އިހްޔާ ފޯރަމްތައް މާލެސިޓީގެ އިތުރުން އަތޮޅުތެރޭގެ 4 ރަށެއްގައިވެސް ކުރިޔަށް ގެންދަން ރާވާފައިވާކަމަށް އިސްލާމިކް މިނިސްޓްރީން މައުލޫމާތުދެއެވެ.