މަސްވެެރިން ބާނާ މަހަށް ހަމަ އަގުު ހޯދުމަށް ވެފައިވާ ވައުދު ތަންފީޒުނުވެ، މަސްވެރިންނަށް އިހުމާލުވާކަމަށް ބަޔާންކޮށް ރައްޔިތުންގެ މަޖިލީހުގެ މަޑަވެލި ދާއިރާގެ މެމްބަރު ހުސެއިން ފިރުޝާން ހުށައެޅުއްވި މައްސަލަ ބަލައިގަނެ އިގްތިސާދީ ކޮމިޓީއަށް ފޮނުވައިފިއެވެ.

މެމްބަރު ފިރުޝާން ހުށައެޅުއްވި މައްސަލައިގައި ބުނެފައިވަނީ ސަރުކާރު ވެރިކަމަށް އައުމަށް އެކުލަވާލި މެނިފެސްޓޯއާއި، އެޖެންޑާ 19ގައިވެސް އެންމެ ބޮޑު އެއް ވައުދެއްގެ ގޮތުގައި ހިމެނޭ މަސްވެރިންނަށް ހަމަ އަގު ދިނުމުގެ ވައުދު ފުއްދުމަށް ސަރުކާރުން އެއްވެސް ކަމެއް ނުކުރާކަމުގެ ޝަކުވާއަކީ މަސްވެރިންގެ ބޮޑު ޝަކުވާއެއްކަމަށެވެ.

މަސްވެރިންގެ ކަންބޮޑުވުންތަކަށް ހައްލު ހޯދައި ދިނުމަށް ދިވެހިރާއްޖޭގެ މަސްވެރިކަމުގެ ޤާނޫނު ފާސްކޮށްފައިކަމަށާއި، ނަމަވެސް އެ ޤާނޫނު ތަންފީޒު ކުރުމަށް ސަރުކާރުން ފަހަތު ފަޔަށް ބުރަވެފައިވާ ކަމަށް މިމައްސަލައިގައި ބުނެފައިވެއެވެ. މަސްވެރިކަމުގެ ގާނޫނުގެ 18 ވަނަ މާއްދާގައި ބަޔާންކުރާ މަސްވެރިކަމުގެ މެނޭޖްމެންޓް ޕްލޭންތައް ހަދައި ތަންފީޒު ކުރަން ސަރުކާރުން ފަސްޖެހޭކަމަށްވެސް ބުނެފައިވެއެވެ.

މަސް ޕްރޮސެސް ކުރާ ތަންތަނާއި ގޭދޮށު މަސް ފެކްޓްރީތަކާއި އައިސް ޕްލާންޓްތައް އެޅުމަށާއި އެކަމުގައި އަމަލު ކުރަންވީ ގޮތް މަސްވެރިކަމުގެ ގާނޫނުގައި ތަފްސީލުކޮށް ބަޔާންކޮށްފައި އޮތް ނަމަވެސް، އެމަގަށް ޖާގަފަހިކޮށް ނުދީ އޮތުމަކީ ކަންބޮޑުވުމެއްކަމަށާއި، އެކަން އެގޮތަށް ހިނގަނީ މަސް ބަންދުކުރާ ފެކްޓްރީތައް ހިންގުމުގައި އުޅޭ ސަރުކާރާއި ގުޅުން ހުރި ބޮޑެތި ވިޔަފާރިވެރިންގެ ބާރާއި ނުފޫޒުންކަމަށްވެސް މިމައްސަލައިގައި ވަނީ ބުނެފައެވެ.

މަސްވެރިންނަށް ބައްދަލުވެ ވާހަކަދައްކާލުމުން އެމީހުންގެ އެންމެ ބޮޑު ކަންބޮޑުވުމަކަށް ވެފައި އޮތީ، މަހަށް ހަމަ އަގު ނުލިބުމާއި ތެލުގެ އަގާއި އެއްވަރަށް މަހުގެ އަގު ނުއުފުލުމުގެ ސަބަބުން ތެލަށް ލާރި ދެއްކުމުން އެވްރެޖްކޮށް މަސްވެރިންނަށް ބަހާނެ ފައިސާ ނެތުމާއި، ރެއާ ދުވާލު މަސައްކަތްކޮށް އެ މަސް ކިރާނެ ބޯޓުތައް ނެތުމާއި ފެސިލިޓީތައް ނެތުމުގެ ޝަކުވާކަމަށް މެމްބަރު ފިރުޝާން ވިދާޅުވިއެވެ. މެމްބަރު ފިރުޝާން ވިދާޅުވީ، 19ވަނަ މަޖިލީހުންގެ ކުރެވުނު އެންމެ ބޮޑު މަސައްކަތަކީ މަސްވެރިކަމުގެ ގާނޫނުގެ މަސައްކަތް ކަމަށެވެ. ފިރުޝާން ވިދާޅުވީ، ދޯނިތަކުން މަސް ކިރަން ނަމްބަރު ނެގުމަށް އެތައް މޭލެއް ދަތުރުކުރަމުން ގެންދާކަމަށާއި، އޮންލައިކޮށް މިފަދަ އިންތިޒާމްތައް ހަމަޖެހިގެން ދިޔުމަކީ، ކުޑަ ކަމަކުން ލިބިގެންދާނެ ބޮޑު ލުޔެއް ކަމަށެވެ.

މި މައްސަލަ ދާއިމީ ކޮމިޓީއަކުން ދިރާސާ ކުރުމަށް ފާސްވީ 30 މެމްބަރުންގެ ވޯޓުންނެވެ.