ރެފްރީކަން ކުރުމުގައި ލިބިފައިވާ ތަޖުރިބާތައް ރާއްޖޭގެ ރެފްރީންނާއި ހިއްސާކުރާނެކަމަށް ފީފާއިން ހޮވާ އެންމެ މޮޅު ރެފްރީގެ މަޤާމް ތިންފަހަރު ހޯދާފައިވާ މާކަސް މާރކް ބުނެފިއެވެ.
މޯލްޑިވްސް ސްޕޯޓްސް އެވޯޑްސް 2022 ގައި ބައިވެރިވުމަށް ރާއްޖެ އައުމަށްފަހު ދިން އިންޓަރވިއުގައި މާކަސް ބުނީ ރެފްރީކަން ކުރުމުގެ ދާއިރާގައި އޭނާއަށް ލިބިފައިވާ ތަޖުރިބާތައް ރާއްޖޭގެ އެތުލީޓުންނާއި ހިއްސާކުރާނެކަމަށެވެ.
ރާއްޖޭގައި ބާއްވާ މި ބޮޑު ކުޅިވަރު ހަފްލާއަށް އާދެވުމަކީ ލިބުނު ވަރަށްބޮޑު ޝަރަފެއްގެ ގޮތުގައި ފާހަގަކޮށް މާކަސް ބުނީ މިއީ އޭނާއަށް ލިބުނު ވަރަށް ބޮޑު އުފަލެއް ކަމަށެވެ.
މާކަސްއަކީ ފީފާއިން ހޮވާ އެންމެ މޮޅު ރެފްރީގެ މަޤާމް ތިންފަހަރު ހޯދާފައިވާ ރެފްރީއެކެވެ. އަދި ބުންޑަސްލީގުގެ އެންމެ ގިނަ މެޗަށް އިންސާފްކުރި ރެފްރީއަކީވެސް މާކަސްއެވެ. އޭނާ ވަނީ ޖަރުމަނުގެ އެންމެ މޮޅު ރެފްރީގެ އެވޯޑް ހަ ފަހަރު ހޯދާފައެވެ.
ހަފްލާގައި ބައިވެރިވުމަށް މާކަސް ރާއްޖެއައީ އޭނާގެ އަންހެނުންނާ އެކުގައެވެ.
