ޢަވައްޓެރި އިންޑިއާ އާއި ދެކޮޅަށް ކުރަމުންދާ ކެމްޕޭނަށް ޗައިނާއިން ޚަރަދުކުރާ ކަމުގެ އަޑުތައް އަނެއްކާވެސް ގަދަވެއްޖެއެވެ.

ކުރީގެ ރައީސް އަބްދުﷲ ޔާމީނު އިސްކޮށް ހުންނަވައި ކުރިއަށްގެންދަވާ އިންޑިއާ އައުޓް ޙަރަކާތަކީ އިންޑިއާ އާއި ވާދަވެރިކަން އޮންނަ ޗައިނާއިން ފަންޑުކޮށްގެން ކުރިއަށްގެންދާ ޙަރަކާތެއްކަމަށް މީގެ ކުރިންވެސް އަޑު ފެތުރިފައިވެއެވެ.

ބޭރުގެ ބައެއް ނޫސްތަކުންވެސް މި ޚަބަރުތައް ގެންދަނީ ރިޕޯޓު ކުރަމުންނެވެ. އެގޮތުން އުތުރުތިލަފަޅު އެއްބަސްވުމާއި ގުޅުވައިގެން އިދިކޮޅުން ދައްކަމުންގެންދާ ‘ޙަޤީޤަތާ ޚިލާފު’ ވާހަކަތަކަކީ އޭގެ މިސާލެއްކަމަށް ނޫސްތަކުން ރިޕޯޓު ކޮށްފައިވެއެވެ. ވަކިން ޚާއްސަކޮށް، އެ އެއްބަސްވުމުގައި ޤައުމީ ސަލާމަތަށް ނުރައްކާވާނެ ކަމެއް ނެތްކަމަށް ކަމާއި ގުޅުންހުރި އިދާރާތަކުން ހާމަކޮށްފައިވާއިރުވެސް، އިދިކޮޅު ފަރާތްތަކުން އެކަމުގެ ޙަޤީޤަތް އޮޅުވާލައި ޚަބަރުތައް ފަތުރަމުން ގެންދަނީ ވަކި އެޖެންޑާއެއްގެ ދަށުން ކަމުގެ ތުހުމަތުތައް ވަނީ އިތުރުވެފައެވެ.

ބޭރުގެ މީޑިއާތަކުން ރިޕޯޓު ކޮށްފައިވާ ގޮތުން ކުރީގެ ރައީސް އަބްދުﷲ ޔާމީން ވެރިކަމަށް ވަޑައިގަތީއްސުރެ އިންޑިއާ އާއި އެކަހެރިވުމުގެ ވިސްނުންފުޅު ބަހައްޓަވައި، އެގޮތަށް ގެންދެވީ އަމަލު ކުރައްވަމުންނެވެ. ޗައިނާ ފަރސްޓް ޕޮލިސީގެ ދަށުން ހަމައެކަނި ޗައިނާ އާއި ގާތް ގުޅުމެއް އުފައްދަވައި، އޭގެ ނަތީޖާއެއްގެ ގޮތުން ޗައިނާ ރުއްސުމަށްޓަކައި ޚާރިޖީ ސިޔާސަތުތައްވެސް އެ މަގުން ބައްޓަން ކުރައްވާފައިވާކަމަށް ވެއެވެ.

ރައީސް ޔާމީނުގެ ވެރިކަމުގައި ޗައިނާއިން ގާތްގަނޑަކަށް 1.3 ބިލިއަން ޑޮލަރުގެ ލޯނު ނަގާފައިވެއެވެ. އެ ލޯނުގެ އެހީގައި ކުރިއަށް ގެންދިޔަ އެންމެ ބޮޑު އެއް މަޝްރޫއަކީ ސިނަމާލޭ ބްރިޖް މަޝްރޫއެވެ.

ބޭރުގެ ނޫސްތަކުން ރިޕޯޓު ކުރާ ގޮތުން ރައީސް ޔާމީނު އަލުން ވެރިކަމަށް ވަޑައިގެންފިނަމަ ޗައިނާއާއެކު ކުރިއަށް ގެންދަވާ އިންވެސްޓްމަންޓުތައް އަނެއްކާވެސް އިތުރުވެގެންދާނެއެވެ. އެކަމުގެ ސަބަބުން ޗައިނާއަށްވެސް ދުރު މުސްތަޤުބަލުގައި އެކަމުގެ ފައިދާ ކުރާނެތީ ޗައިނާއިންވެސް ގެންދަނީ އިންޑިއާ އައުޓް ޙަރަކާތްތައް ޕްރޮމޯޓު ކުރާ ނޫސްތަކަށް އެކި ގޮތްގޮތުން ފަންޑު ކުރަމުންދާކަމުގައި ބޭރުގެ ނޫސްތަކުން ރިޕޯޓް ކުރަމުންދެއެވެ.

އިންޑިއާ އައުޓް ކެމްޕޭނަކީ ކުރީގެ ރައީސް އަބްދުﷲ ޔާމީން ގެންގުޅުއްވާ ހުރިހާ ނޭއްގާނީ ސިފަތައް އެކުލެވޭ، އެމަނިކުފާނުގެ ވެރިކަމުގައި ހިންގާފައިވާ މަރުތަކާއި، ޚިޔާނަތްތަކުގެ އަޑު ކަނޑުވާލުމަށް ހިންގާ ހީލަތްތެރި ކެމްޕޭނެއް ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވަނީ ވިދާޅުވެފައެވެ.

ވަކި ޤައުމަކާމެދު ނަފްރަތު އުފެއްދުމަކީ ރާއްޖެއިން ބަލައިގެންފައިވާ ބައިނަލްއަޤުވާމީ މުއާހަދާތަކާވެސް ދެކޮޅު ކަމެއްކަމަށް ފޮރިން މިނިސްޓްރީންވެސް ވަނީ ބުނެފައެވެ. އެގޮތުން އިންޑިއާގައި އުޅޭ ދިވެހިންގެ އަދަދުތަކަށް ބަލާއިރު، 1000 އާއި 1500 އާއި ދެމެދުގެ އަދަދުތަކެއްގައި އަބަދުވެސް ދިވެހިން އެ ޤައުމުގައި އުޅޭކަމަށް ފޮރިން މިނިސްޓްރީން ފާހަގަކުރެއެވެ.

އަދި އަހަރަކު 70،000 އަށް ވުރެ ގިނަ ދިވެހިން ތަފާތު އެކި ބޭނުންތަކުގައި އިންޑިއާއަށް ދަތުރުކުރާއިރު، އިންޑިއާއިންވެސް އެހާ ގިނަ ރައްޔިތުން ރާއްޖެއަށް ދަތުރުފަތުރުކޮށް އުޅޭ ކަމަށް ފޮރިން މިނިސްޓްރީން ބުނެއެވެ.

ފޮރިން މިނިސްޓްރީން ވަނީ އިންޑިއާ އައުޓް ޙަރަކާތުގެ ސަބަބުން ސީދާ ގޮތުންނާއި ނުސީދާ ގޮތުން އޭގެ އަސަރު ދިވެހިންގެ ދިރިއުޅުމަށް ކުރާކަން ފާހަގަކޮށްފައެވެ. މިފަދަ ޙަރަކާތްތައް ފުޅާވެ، ފަރުދުންގެ ސަލާމަތާއި ރައްކާތެރިކަމަށް ގޮންޖެހުންތައް ކުރިމަތިވެދާނެ ޙާލަތެއް އައިސްފިނަމަ އިންޑިއާގައި އުޅޭ ދިވެހިންނަށް އެކަމުގެ އަސަރު ކުރާނެ ކަމަށްވެސް މިނިސްޓްރީގެ ބޭފުޅުން ފާހަގަކުރެއްވިއެވެ.