ލޯކަލް ކައުންސިލްތަކަށް ކޯޓްތަކުގައި ދައުލަތް ތަމްސީލު ނުކުރެވޭނެކަަމަށް ހައިކޯޓުން ކުރި ހުކުމް ދައުލަތުން ސުޕްރީމް ކޯޓުގައި އިސްތިއުނާފް ކުރުމުން އެމައްސަލަ ދައުލަތާއި އެއްކޮޅަށް ނިމިއްޖެއެވެ.

އދ. ފެންފުށީ ބިމެއްގެ މައްސަލައިގައި 2021 ވަނަ އަހަރުގެ ސެޕްޓެމްބަރު މަހުގެ 8 ވަނަ ދުވަހު ހައިކޯޓުން ނިންމީ ކައުންސިލްތަކަށް ކޯޓުތަކުގައި ދައުލަތް ތަމްސީލު ނުކުރެވޭނެ ކަމަށާއި ދައުލަތް ތަމްސީލު ކުރެވޭނީ އެޓާނީ ޖެނެރަލްގެ އޮފީހަށް ކަމަށެވެ. އެހެންކަމުން ރަށެއްގެ ބިމުގެ މައްސަލަތަކުގައި ވެސް ވަކާލާތު ކުރެވޭނީ އެޓާނީ ޖެނެރަލްގެ އޮފީހަށް ކަމަށް އެހުކުމުގައިވެއެވެ.

ނަމަވެސް އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު ބުނާ ގޮތުން ލޯކަލް ކައުންސިލްތަކަކީ އަމިއްލަ ނަމުގައި ދައުވާ ކުރުމާއި ދައުވާ ލިބިގަތުމުގެ ބާރު ލިބިގެންވާ ގާނޫނީ ޝަހްސެކެވެ.

މިކަމާއި ގުޅިގެން އެޓާނީ ޖެނެރަލްގެ އޮފީހުން އޭރު ވަނީ އެހުކުމް ދައުލަތުގެ ފަރާތުން ސުޕްރީމް ކޯޓްގައި އިސްތިއުނާފުކޮށް ހައި ކޯޓުން އެގޮތަށް ކަނޑައެޅި ބައި ތަންފީޒުކުރުން ފަސްްކުރުމުގެ އަމުރަކަށްވެސް އެދިފައެވެ.

އެ ހުކުމް އިސްތިއުނާފުކުރި ސަބަބަކީ ލޯކަލް ކައުންސިލްތަކަކީ އަމިއްލަ ނަމުގައި ދަޢުވާކުރުމާއި، ދަޢުވާ ލިބިގަތުމުގެ ބާރު ލިބިފައިވާ އަދި އަމިއްލަ ނަމުގައި މުޢާމަލާތުކުރުމުގެ ހައިސިއްޔަތު ލިބިފައިވާ ވަކި ސިއްކައެއް އޮންނަ ގާނޫނީ ޝަޚުސެއް ކަމަށް ވާތީއެވެ. މީގެއިތުރުން ކައުންސިލްތަކުގެ އިހުތިސާސްގެ ތެރޭގައި ހިމެނޭ ބިންތަކަކީ އެ ކައުންސިލްތަކުގެ މިލްކިއްޔާތުގެ ތެރޭގައި ހިމެނޭ ތަންތަން ކަމަށް އިދާރީ ދާއިރާތައް ލާާމަޒުކަޒީ އުސޫލުން ހިންގުމުގެ ގާނޫނުގައި އޮންނަ އޮތުމަކީ ވެސް އެޓާނީ ޖެނެރަލް އޮފީހުން އެމައްސަލަ ސުޕްރީމްކޯޓުގައި އިސްތިއުނާފްކުރި ސަބަބެކެވެ.

ފެންފުށީގެ ބިމަކާއި ގުޅިގެން، އެ ރަށު ކައުންސިލާއި ދެކޮޅަށް ހައި ކޯޓަށް މައްސަލަަ ހުށަހެޅި ކަމިގައިވީ ނަމަވެސް، ކައުންސިލުން ބުނެފައިވަނީ، އެ މައްސަލައިގައި ވަކާލާތު ކުރެވޭނެ ވަކީލަކު އެ ކައުންސިލްގައި ނެތް ކަމަށެވެ. އެހެންކަމުން ފެންފުށީ ކައުންސިލްގެ ފަރާތުން ޖަވާބުދާރީވާން އެޓާރނީ ޖެނެރަލްގެެ އޮފީހަށް ހައި ކޯޓުން އެންގުމުން އެޓާރނީ ޖެނެރަލްގެ އޮފީހުން ހައި ކޯޓަށް ޖަވާބު ދިނީ ކައުންސިލްތަކަކީ މިނިވަން ގާނޫނީ ޝަހްސަކަށް ވާތީ ކައުންސިލްތައް ތަމްސީލު ކުރުމުގެ ބާރު އެ އޮފީހަށް ނެތް ކަމަށެވެ.

ނަމަވެސް ހައި ކޯޓުން ނިންމީ އެޓާރނީ ޖެނެރަލްގެ ފަރާތުން އެ މައްސަލައިގައި ޖަވާބުދާރީވާން ޖެހޭނެ ކަމަށެވެ. އެހެންކަމުން އެ މައްސަލަ ހައި ކޯޓުން ކުރިއަށް ގެންގޮސްފައިވަނީ އެޓާރނީ ޖެނެރަލްގެ އޮފީހާއި ފެންފުށި ކައުންސިލް ބައިވެރިކޮށްގެންނެވެ.

މި މައްސަލައިގައި އަންގާރަ ދުވަހު ސުޕްރީމް ކޯޓުން ނިންމާފައިވަނީ ކައުންސިލްތަކަށް ދައުލަތް ތަމްސީލު ނުކުރެވޭނެ ކަމަށް ކުރި ހުކުމް ބާތިލު ކުރުމަށެވެ. ސުޕްރީމް ކޯޓުގައި މި މައްސަލަ ނިންމެވީ ފަނޑިޔާރު ހުސްނުއްސުއޫދާއި، ފަނޑިޔާރު އަލީ ރަޝީދު ހުސައިންގެ އިތުރުން، ފަނޑިޔާރު ޑރ އަޒްމިރަލްދާ ޒާހިރެވެ.