ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއި އެމަނިކުފާނުގެ އަނބިކަނބަލުން ފަޒްނާ އަޙްމަދު ސިންގަޕޫރަށް ކުރެއްވި ނުރަސްމީ ދަތުރުފުޅު ނިންމަވާލެއްވުމަށްފަހު އާދީއްތަ ދުވަހުގެރޭ ރާއްޖެވަޑައިގެންފިއެވެ.
ޑޮކްޓަރުގެ ލަފާގެމަތިން ތައިރޮއިޑް ފަރުވާއަކަށް އެމަނިކުފާނު ސިންގަޕޫރަށް ވަޑައިގަތީ 23 ފެބްރުއަރީ 2022ގައެވެ. އެގޮތުން ސިންގަޕޫރުގައި ކުރިއަށްދިޔަ މި ސަރޖަރީއަށްފަހު ކުރެއްވި ޓްވީޓެއްގައި އެމަނިކުފާނު ވިދާޅުވީ، ސަރޖަރީ ނިމިއްޖެކަމަށާއި ހާލުކޮޅު ރަނގަޅުވަމުން އަންނަކަމަށެވެ.
ރައީސް ޞާލިޙު ގެންދަވަނީ އެމަނިކުފާނުގެ ހާލުކޮޅާގުޅޭ މައުލޫމާތު ޓްވިޓަރ މެދުވެރިކޮށް އަމިއްލަފުޅަށް ހިއްސާ ކުރައްވަމުންނެވެ. އެގޮތުން އަންގާރަ ދުވަހު ކުރެއްވި ޓްވީޓެއްގައި ވަނީ ހޮސްޕިޓަލުން ދޫކޮށްލެއްވިކަން އިއުލާނު ކުރައްވާފައެވެ. އަދި ހާލުކޮޅު ރަނގަޅުކަމަށާއި، ކުޑަ ދުވަސްކޮޅެއްގެ ތެރޭގައި އެނބުރި ރާއްޖެވަޑައިގަންނަވާނެ ކަމަށްވެސް ރައީސް ވިދާޅުވިއެވެ. ރައީސް ވަނީ އެމަނިކުފާނަށް އަވަސް ޝިފާއަކަށް އެދުނު ހުރިހާ ފަރާތްތަކަށް ޝުކުރު އަދާކުރައްވާފައެވެ.
ރައީސް ސަރޖަރީ ކުރައްވާތީ 25 ފެބްރުއަރީގައި ރައީސުލްޖުމްހޫރިއްޔާގެ ޒިންމާތަކާ ނައިބު ރައީސް ފައިސަލް ނަސީމް ވަގުތީ ގޮތުން ހަވާލުވެވަޑައިގަތެވެ. އަދި އޮޕަރޭޝަނަށްފަހު ރައީސް ވަނީ, ރައީސުލްޖުމްހޫރިއްޔާގެ މަސްއޫލިއްޔަތުތަކާއި ވާޖިބުތަކާ އެދުވަހު ހަވާލުވެވަޑައިގެންފައެވެ.
