ފެނަކަ އިނސްޓިޓިއުޓުން ޓެކްނިކަލް ދާއިރާތަކާއި ގުޅޭ އިތުރު ކޯސްތައް ފެށުމަށް ތައްޔާރުވަމުންދާ ކަމަށާއި، ބައިނަލްއަގުވާމީ ފެންވަރަށް މަސައްކަތް ކުރުމަށް އަމާޒު ހިފައިވާ ކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު ވިދާޅުވެއްޖެއެވެ.

ހޮނިހިރު ދުވަހުގެ ރޭ ފެނަކަ އިންސްޓިޓިއުޓް ފޯރ ޓްރެއިނިންގ އެންޑް ރިސާރޗް އިން ކުރިއަށް ގެންދިޔަ ފުނަރު ޕްރޮގްރާމްގެ ދަށުން އިންޖީން ރިޕެއަރ އެންޑް މެއިންޓެނެންސްގެ ދަރިވަރުން ދަސްވެނިވުމުގެ ރަސްމިއްޔާތު ވަނީ ބާއްވާފައެވެ. މި ރަސްމިއްޔާތުގައި ވާހަކަދައްކަވަމުން ސައީދު ވިދާޅުވީ އައު ހޯދުންތައް ހޯދުމަށް ފެނައިން ގިނަ މަސައްކަތްތައް ކުރަމުންދާ ކަމަށެވެ. އެގޮތުން މިހާރު މަސައްކަތް ކުރަމުންދަނީ ޓެކްނިކަލް ދާއިރާއިންނާއި، ފެނާއި ކަރަންޓާއި ނަރުދަމާ ނިޒާމު ގާއިމްކުރުމާއި ގުޅޭ އިތުރު ކޯސްތައް ފެށުމަށް ކަމަށެވެ.

ސައީދު ވިދާޅުވީ ފެނަކަ އިންސްޓިޓިއުޓް އޮފް ރިސަރޗް އެންޑް ޓެކްނޮލޮޖީ އުފެއްދުމާއި އެކު ގިނަ ބައެއްގެ ފާޑު ކިޔުން އަމާޒުވި ކަމަށާއި، ޒުވާނުންތަކެއް ތަމްރީންކޮށް އަމަލީ މައިދާނަށް ނެރެވޭނެ ކަމާއިމެދު ސުވާލު ވެސް އުފެއްދި ކަމަށެވެ. ނަމަވެސް ގިނަ ގޮންޖެހުންތާއެކު މަސައްކަތް ފަށައި، ވަރަށް ކާމިޔާބު ކަމާއެކު ޕްރޮގްރާމްތައް ކުރިއަށް ގެންދެވޭ ކަމަށް އޭނާ ވިދާޅުވިއެވެ. މިއަދު މި ޕްރޮގްރާމްތަކަށް ރައްޔިތުން އިތުބާރު ކުރާކަން ފާހަގަކުރައްވައި ސައީދު ވިދާޅުވީ 2021 ވަނަ އަހަރު ފެނާއި ނަރުދަމާ އަދި ކަރަންޓުގެ ޚިދުމަތް ދިނުމުގެ ދާއިރާއިން މީހުން ތަމްރީން ކުރުމުގެ މަސައްކަތާއެކު މިހާތަނަށް 113 މީހުން ތަމްރީން ކުރެވިފައިވާ ކަމަށެވެ. އަދި މިއީ ދާއިރާއަށް ލިބުނު ކުރިއެރުމެއް ކަމަށް ސައީދު ވިދާޅުވިއެވެ.

މީގެ އިތުރުން ސައީދު ވިދާޅުވީ މިހާރު މަސައްކަތް ކުރަމުންދަނީ އިތުރު ޒުވާނުން މިދާއިރާއަށް ނެރި، ބައިނަލްއަގުވާމީ ފެންވަރުގައި ޕްރޮގްރާމްތައް ކުރިއަށް ގެންދިއުމަށް ކަމަށެވެ. އެގޮތުން ރާއްޖެއިން ބޭރުގެ ގައުމުތަކުން ފާހަގަކޮށްލެވޭ ޔުނިވާސިޓީތަކާއި މަޝްވަރާކުރަމުންދާ ކަމަށް ސައީދު ވިދާޅުވިއެވެ.

ފެނަކައިގެ މަސައްކަތްތައް ފުޅާކުރުމުގެ މަސައްކަތް ކުރަމުންދާއިރު، ޒަމާނާ އެއްގޮތަށް ފެންވަރު ރަނގަޅު ޚިދުމަތްތައް ފޯރުކޮށްދިނުމަށް ފެނަކައިން ދަނީ މަސައްކަތް ކުރަމުންނެވެ.

ހޮނިހިރު ދުވަހުގެ ރޭ ބޭއްވި އިންޖީން ރިޕެއަރ އެންޑް މެއިންޓެނެންސްގެ ދަރިވަރުން ދަސްވެނިވުމުގެ ރަސްމިއްޔާތުގައި 23 ދަރިވަރުން ވަނީ ދަސްވެނިވިފައެވެ.