ދިރިއުޅުމަށް ކުއްޔަށްދޭ ތަންތަން އިންސްޕެކްޓް ކުރުމަށް ފޯމް ހުށަހަޅާތާ 7 ދުވަސް ތެރޭގައި ކައުންސިލުން އިންސްޕެކްޓް ކުރަން ޖެހޭ ކަމަށް ގަވާއިދުގައި ބުނެފިއެވެ.

ދިރިއުޅުމަށްޓަކައި ކުއްޔަށްދޭ ތަންތަން އިންސްޕެކްޓް ކުރުމުގައި އަމަލުކުރާނެ ގަވާއިދުގައި ބުނެފައިވަނީ ގާނޫނާއި ގާނޫނުގެ ދަށުން ހަދައިފައިވާ ގަވާއިދާ އެއްގޮތަށް ކުއްޔަށް ދިނުމުގެ ހުއްދައަށް އެދި ރަށެއްގައި ނަމަ އެ ރަށެއްގެ ކައުންސިލް އިދާރާއަށް ނުވަތަ ސިޓީއެއްގައި ނަމަ ސިޓީ ކައުންސިލްގެ އިދާރާއަށް ހުށަހެޅުމުން، ކައުންސިލުގައި އެކަމަށް ޚާއްސަކޮށްފައިވާ ފަރާތުން ނުވަތަ ފަރާތްތަކުން ކުއްޔަށް ދޫކުރާ ތަނަށް ގޮސް އިންސްޕެކްޓް ކުރަން ޖެހޭ ކަމަށެވެ. ގަވާއިދުތަކާ ޚިލާފަށް ކުއްޔަށް ދީފައިވާކަން ނުވަތަ ގަވާއިދުތަކާއި ޚިލާފަށް އަމަލުކުރާކަމުގެ ޝަކުވާ އެއްވެސް ފަރާތަކުން، ރަށެއްގައި ނަމަ އެ ރަށެއްގެ ކައުންސިލް އިދާރާއަށް ނުވަތަ ސިޓީއެއްގައި ނަމަ ސިޓީ ކައުންސިލުގެ އިދާރާއަށް ހުށަހަޅައިފިނަމަ، ހުއްދަ ދިނުމުގެ ކުރިން، ކައުންސިލުގެ ފަރާތުން ކަނޑައަޅައިފައިވާ ފަރާތްތަކުން ކުއްޔަށް ދޫކުރާ ތަނަށް ގޮސް އެ ތަން އިންސްޕެކްޓް ކުރަން ޖެހޭ ކަމަށެވެ.

އިންސްޕެކްޓް ކުރުމަށް ކައުންސިލަށް ކުއްޔަށްދޭ ފަރާތުންނާއި ކުއްޔަށް ހިފައިފައިވާ ފަރާތުން އެއްބާރުލުން ދޭންޖެހޭކަން ފާހަގަކޮށްފައިވާއިރު، ދިރިއުޅުމުގެ ބޭނުމަށް ތަނެއް ކުއްޔަށް ދޫކުރުމުގެ ހުއްދަ ދޫކުރަންވާނީ، ގާނޫނާއި ގާނޫނުގެ ދަށުން ހަދައިފައިވާ ގަވާއިދުތަކުގައިވާ ކަންކަން ކަށަވަރު ކުރުމަށް ފަހު ކަމަށެވެ. އެގޮތުން ކުއްޔަށް ދޫކުރުމަށް ހުއްދަ އެދި ހުށަހަޅާ ފަރާތުގެ ފޯމު ކައުންސިލުގެ އިދާރާއިން ބަލައިގަންނަ ދުވަހުން ފެށިގެން، ގިނަވެގެން ރަސްމީ 7 ދުވަހުގެ ތެރޭގައި، ކުއްޔަށް ދިނުމަށް އެދި ހުށަހަޅާ ތަން އިންސްޕެކްޓް ކުރަންޖެހޭ ކަމަށް ގަވާއިދުގައި ބުނެފައިވެއެވެ. އަދި އިންސްޕެކްޓް ކުރަން ދިއުމުގެ ކުރިން ކުއްޔަށް ދިނުމުގެ ހުއްދައަށް އެދޭ ފަރާތަށް ލިޔުމުން އެކަން އަންގަން ޖެހޭ ކަމަށެވެ.

މީގެ އިތުރުން ގަވާއިދުގައި ބުނެފައިވަނީ ކުއްޔަށް ދިނުމުގެ ހުއްދަ ދޫކުރާނީ، ގާނޫނާއި ގާނޫނުގެ ދަށުން ހަދައިފައިވާ ގަވާއިދުގައި ބަޔާންކޮށްފައިވާ ކަންކަމާއި، "އިންސްޕެކްޝަން ޗެކްލިސްޓް" ފުރިހަމަކޮށް، ކުއްޔަށްދޭ ތަންތަނުގައި ހުންނަ ންޖެހޭ އަސާސީ މިންގަނޑުތައް ފުރިހަމަވާ ތަނެއްކަން ކައުންސިލުން ކަށަވަރު ކުރުމަށްފަހު ކަމަށެވެ. އިންސްޕެކްޓް ކުރުމަށްފަހު އިންސްޕެކްޝަން ޗެކްލިސްޓުގެ ރިކޯޑު ކައުންސިލުން ބަލަހައްޓަންޖެހޭ ކަމަށް ގަވާއިދުގައި ބުނެފައިވެއެވެ.

ކުއްޔަށް ދިނުމުގެ ހުއްދައަށް އެދި ހުށަހަޅައިފައިވާ ތަނަށް ކައުންސިލުން އިންސްޕެކްޓް ކުރުމަށް ދާއިރު، ކައުންސިލަށް އެ ތަނެއްގެ ހުރިހާ ބައިތަކަށް ވަދެ ބެލޭނެ އިންތިޒާމު، ކުއްޔަށް ދިނުމުގެ ހުއްދައަށް އެދޭ ފަރާތުން ހަމަޖައްސަންޖެހެއެވެ.