މާލެ ސަރަހައްދުން ނަގާ ސާމްޕަލްތަކުގެ އަދަދު ދަށްވެ، ރިޕޯޓް ކުރާ ކޭހުގެ އަދަދު ވެސް ދަށްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާންމުކޮށްފައިވާ ތަފާސް ހިސާބުތައް ދައްކާގޮތުން، ނިމިގެންދިޔަ 24 ގަޑިއިރު ތެރޭގައި މާލެ ސަރަހައްދުން ނަގާފައިވަނީ 1076 ސާމްޕަލްއެވެ. މާލެ ސަރަހައްދުން ޕޮޒިޓިވްވީ 155 މީހުންނެވެ. އޭގެ ކުރީ ދުވަހު 1274 ސާމްޕަލް ނަގާފައިވާއިރު, ޕޮޒިޓިވްވީ 206 މީހުންނެވެ. މާލެ ސަރަހައްދުން ނަގާ ސާމްޕަލްތަކުގެ އަދަދު ދަށްވެފައިވަނީ މި މަހުގެ 7 ވަނަ ދުވަހުން ފެށިގެންނެވެ. އެދުވަހުން ފެށިގެން މާލެ ސަރަހައްދުން ނަގާ ސާމްޕަލްތަކުގެ އަދަދު ވަނީ 2000ން ދަށްވެފައެވެ.

މާލެ ސަރަހައްދުން ރިޕޯޓްކުރާ ކޭހުގެ އަދަދު, ނަގާ ސާމްޕަލްތަކުގެ އަދަދާއެކު ދަށްވެފައިވާ އިރު، މަޑު މަޑުން ސާމްޕަލް ޕޮޒިޓިވިޓީ ރޭޓް ވެސް އަންނަނީ ދަށްވަމުންނެވެ. އެގޮތުން ހުކުރު ދުވަހުގެ ހަވީރު 6:00ން ހޮނިހިރު ދުވަހުގެ ހަވީރު 6:00ށް ނަގާފައިވާ ސާމްޕަލްތަކުގެ ޕޮޒިޓިވިޓީ ރޭޓް ހުރީ 14 އިންސައްތައިގައެވެ.

މި 24 ގަޑިއިރު ތެރޭގައި މާލެ ސަރަހައްދުން ނެގި 1076 ސާމްޕަލާއެކު ޖުމްލަ 4390 ސާމްޕަލް މުޅި ރާއްޖެއިން ނަގައި ޓެސްޓް ކޮށްފައިވެއެވެ. މީގެ ތެރެއިން ޕޮޒިޓިވްވީ 1128 މީހުންނެވެ. އެއީ މާލެ ސަރަހައްދުން ޕޮޒިޓިވްވި 155 މީހުންނާއި، ރަށްރަށުން ޕޮޒިޓިވްވި 806 މީހުންގެ އިތުރުން ރިސޯޓްތަކުން ޕޮޒިޓިވް 65 މީހުންނާއި ސަފާރީތަކުން ޕޮޒިޓިވްވި 4 މީހުންނެވެ. މި 24 ގަޑި އިރު ތެރޭގައި 98 މީހުން ޕޮޒިޓިވްވީ ކޮންތަނަކުން ކަމެއް ދެނެގަނެވިފައެއް ނުވެއެވެ.

ހޮނިހިރު ދުވަހުގެ އަދަދުތަކާއެކު މިހާތަނަށް ރާއްޖެއިން 158،031 މީހަކު ވަނީ ޕޮޒިޓިވްވެފައެވެ. މީގެ ތެރެއިން 141،569 މީހުން ވަނީ ބަލިން ރަނގަޅުވެފައެވެ. ހޮނިހިރު ދުވަހު 1193 މީހުން ވަނީ ބަލިން ރަނގަޅުވެފައެވެ.

އެކްޓިވް ކޭހުގެ ގޮތުގައި 16161 މީހަކު ރިޕޯޓްކޮށްފައިވާ އިރު، މީގެ ތެރެއިން 41 މީހަކަށް އަންނަނީ ހޮސްޕިޓަލުގައި ފަރުވާދެމުންނެވެ. 288 މީހަކު ބަލީގައި މިހާތަނަށް ނިޔާވެފައިވާއިރު، ޖެނުއަރީ މަހުގައި 15 މީހަކު ވަނީ މި ބަލީގައި ނިޔާވެފައެވެ. އަދި މި މަހުގެ މިހާތަނަށް 11 މީހަކު ވަނީ ނިޔާވެފައެވެ.