އިންފޮމޭޝަން ކޮމިޝަނަރުގެ އޮފީހުން ނިންމާ ނިންމުންތަކުގެ މައްސަލަތައް ހައި ކޯޓަށް ނުބެލޭނެ ކަމަށް އެ ކޯޓުން ނިންމީ ގާނޫނާއި ހިލާފަށް ކަމަށް ކަނޑައަޅައި، އެފަދަ މައްސަލަތައް އެ ކޯޓުން ބަލަންޖެހޭނެ ކަމަށް ސުޕްރީމް ކޯޓުންހުކުމްކޮށްފިއެވެ.

ސުޕްރީމް ކޯޓުން މިގޮތަށް ހުކުމްކޮށްފައިވަނީ އެމްޑަބްލިއުއެސްސީގެ ފަރާތުން ހުށަހަޅާފައިވާ މައްސަލައަކީ އެ މައްސަލަ އިސްތިއުނާފުން ބެލުމުގެ އިހްތިސާސް ގާނޫނުން ހައިކޯޓަށް ލިބިދީފައި ނުވާ މައްސަލައަކަށްވާތި، އެ މައްސަލައަކީ ހައިކޯޓަށް ބެލޭނެ މައްސަލައެއް ނޫންކަމަށް ހުކުމް ކުރުމާއި ގުޅިގެން އެ ހުކުމް ސުޕްރީމް ކޯޓުގައި އިސްތިއުނާފްކުރުމާއި ގުޅިގެންނެވެ. ހައިކޯޓުން މިދިޔަ އަހަރު ނިންމާފައިވަނީ މައުލޫމާތު ހޯދާ ލިބިގަތުމުގެ ހައްގުގުގެ ގާނޫނުގެ ދަށުން އިންފޮރމޭޝަން ކޮމިޝަނަރު ނިންމާ ނިންމުންތައް ހައިކޯޓަށް ނުބެލޭނެ ކަމަށެވެ.

މި މައްސަލަ އެމްޑަބްލިއުއެސްސީގެ އިތުރުން އެޓަރނީ ޖެނެރަލްގެ އޮފީހުން ސުޕްރީމް ކޯޓުގައި އިސްތިއުނާފްކޮށްފައިވެއެވެ. މި މައްސަލަ އިސްތިއުނާފްކޮށްފައިވާ އިރު، އިންފޮމޭޝަން ކޮމިޝަނަރަކީ މުއައްސަސާއަކަށް ނުވާތީ އިންފޮރމޭޝަން ކޮމިޝަނަރު ނިންމި މައްސަލަ ހައިކޯޓުން ނުބެލޭނެ ކަމަށް ނިންމާ، އޭގެ ފަހުން އައިކޮމްގެ ނިންމުންތަކުގެ މައްސަލަ ހައިކޯޓުން ބަލައިގަނެފައި ނުވެއެވެ.

ހައިކޯޓުގެ ގަޒިއްޔާ އިސްތިއުނާފުކުރުމަށް އެމްޑަބްލިއުއެސްސީގެ ފަރާތުންނާއި ހައިކޯޓުގެ ގަޒިއްޔާގައި ހަސްމެއްގެ ގޮތުގައި ނުހިމެނޭ އެޓަރނީ ޖެނެރަލްގެ އޮފީހުގެ ފަރާތުން ސުޕްރީމް ކޯޓަށް ހުށަހެޅިއެވެ. އެޓަރނީ ޖެނެރަލްގެ އޮފީހާއި، އެމްޑަބްލިއުއެސްސީ އަދި އައިކޮމްއިން ވެސް ހައިކޯޓުގެ ގަޒިއްޔާ ނިންމާފައިވަނީ ގާނުނާއި ހިލާފަށް ކަމަށް އިއްތިފާގުވެފައިވެއެވެ. އަދި މި ތިން ފަރާތުން ވެސް އެއްފަރާތުން އަނެއް ފަރާތުން ދައްކާފައިވާ ވާހަކައަށް ތާއީދުކޮށްފައިވެއެވެ.

އަދި މި ތިން ފަރާތުން ވެސް ވަނީ ހައިކޯޓުގެ ނިންމުމަކީ އަސާސީ ހައްގުތަކާ ފުށުއަރާ ނިންމުމެއް ކަމަށް ބުނެފައެވެ. މީގެ އިތުރުން އައިކޮމްގެ ނިންމުންތައް ހައިކޯޓުގައި އިސްތިއުނާފު ނުކުރެވޭނެކަމަށް ކަނޑައެޅުމުގެ ނަތީޖާއަކީ ދައުލަތުގެ އިދާރާއަކުން މައުލޫމާތު ނުލިބިގެން އުޅޭ މީހަކަށް މައުލޫމާތު ހޯދައި ލިބިގަތުމުގެ ހައްގާއި އިސްތިއުނާފުކުރުމުގެ ހައްގު ގެއްލިގެން ދިއުން ކަމަށެވެ.

މި މައްސަލައިގައި ހައިކޯޓުގެ ނިންމުން ބާތިލްކޮށް ކުރި ހުކުމުގައި ބުނެފައިވަނީ ހައިކޯޓުގެ ގަޒިއްޔާގައި މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 64 ވަނަ މާއްދާގެ ހ ގެ ދަށުން އެމްޑަބްލިއުއެސްސީން ހައިކޯޓަށް ހުށަހަޅާފައިވާ މައްސަލައަކީ އެ މައްސަލަ އިސްތިއުނާފުން ބެލުމުގެ އިހްތިސާސް ގާނޫނުން ހައިކޯޓަށް ލިބިދީފައިނެތް މައްސަލައެއް ކަމަށް ހައިކޯޓުން ކަނޑައަޅާފައިވަނީ ގާނޫނާއި ހިލާފަށްކަމުން، ހައިކޯޓުގެ ހުކުމް ބާތިލް ކަމަށް މައްސަލަ ބެލި ފަނޑިޔާރުންގެ އިއްތިފާގުން ކަނޑައަޅާ ކަމަށެވެ.

އަދި މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 64 ވަނަ މާއްދާގެ ހ ގެ ދަށުން ހުށަހެޅޭ މައްސަލަތަކަކ އެ މާއްދާގެ ސަރީހަ އިބާރާތުން ހައިކޯތަށް އިސްތިއުނާފުން ބެލުމުގެ އިހްތިސާސް ލިބިދެވިފައިވާ މައްސަލަތަކެއް ކަނޑައަޅައި، އެމްޑަބްލިއުއެސްސީގެ ފަރާތުނ ހުށަހެޅި އައިކޮމްގެ މައްސަލައިގައި ފައިސަލާކުރަނިވި ހުކުމެއް ކުރުމަށް ދިވެހިރާއްޖޭގެ ކޯޓުތަކުގެ ގާނޫނުގެ 18 ވަނަ މާއްދާގެ ށ ގެ ދަށުން މި މައްސަލަ ދިވެހިރާއްޖޭގެ ހައިކޯޓަށް ތަހުވީލުކޮށް މައްސަލަ ބެލި ފަނޑިޔާރުންގެ އިއްތިފާގުން ހުކުމް ކުރާ ކަމަށެވެ.

މި މައްސަލަ ބެލި ފަނޑިޔާރުންގެ ބެންޗުގައި ތިއްބެވީ ފަނޑިޔާރު މަހާޒު އަލީ ޒާހިރާއި، ފަނޑިޔާރު މުހައްމަދު އިބްރާހިމްގެ އިތުރުން ރިޔާސަތު ބެލެހެއްޓި ފަނޑިޔާރު އަޒްމިރަލްދާ ޒާހިރެވެ.