ހަވާސާއިން ބޭރުގައި ތިބޭ ފަރާތްތަކަށް ބޭނުންވާ ޚިދުމަތްތައް ލާމަރުކަޒީ އުސޫލުން ހަމަޖެހުމުން ނޫނީ އެދެވޭ ޚިދުމަތެއް ފޯރުކޮށެއް ނުދެވޭނެ ކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އާއިޝަތު މުޙައްމަދުދީދީ ވިދާޅުވެއްޖެ އެވެ.
މިނިސްޓަރ މިހެން ވިދާޅުވީ ވ.ފެލިދޫގައި ''އިބަމަ'' އިފްތިތާޙް ކުރުމާއި އިނިޝިއޭޓިވް ޓްރެއިނިން ޕްރޮގްރާމް ފެއްޓުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރު ވިދާޅުވީ އިނިޝިއޭޓިވް ޓްރެއިނިން ޕްރޮގްރާމަކީ ވ. އަތޮޅުގެ، މުއައްސަސާތައް ގުޅިގެން މަސައްކަތްކުރުމަށް އެޅޭ ބިންގާގެ ފެށުން ކަމަށާއި، މި ލިބުނު ފުރުސަތުގެ ބޭނުން ހެޔޮގޮތުގައި ހިފައި، ޤައުމަށް އުފާވެރިކަން ގެނެސްދޭނެ، އުފެއްދުންތެރި ބަޔަކަށްވުމަށް މަސައްކަތްކުރަން ޖެހޭ ކަމަށެވެ.
އިބަމަ ނުވަތަ އިޖްތިމާއީ ބަދަހި މަދަދުވެރިންނަށް ޚާއްސަކޮށްގެން ޖެންޑަރ މިނިސްޓްރީން ތައާރަފްކުރި ޚާއްސަ ޕްރޮގްރާމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އިސް ނެންގެވުމުގެ މަތިން ފެއްޓެވި ޕްރޮގްރާމެކެވެ. އަދުގެ ސިޔާސަތަކީ، ކޮންމެ ރައްޔިތަކީ ވެސް ރައްކާތެރިކަމާއި އަމާން މާހައުލެއްގައި އުޅެވޭނެ ބަޔަކަށް ހެދުން ކަމަށްވާއިރު، ރައީސްގެ ދުރު ވިސްނުންފުޅާ އެއްގޮތަށް ގިނަ ބަޔަކަށް އެކަމުގެ މަންފާ ކުރާނެ ކަމާމެދު ޝައްކެއް ނުކުރާ ކަމަށް މިނިސްޓަރު ވިދާޅުވިއެވެ.
އިބަމަ ނުވަތަ އިޖްތިމާއީ ބަދަހި މަދަދުވެރިންނަކީ އެރަށެއްގެ ރައްޔިތުން ކަމަށްވާއިރު، އެރަށެއްގެ އިޖުތިމާއީ މައްސަލަތައް ދެނެގަތުމާއި، އެކަންކަމަށް ބޭނުންވާ ހައްލު އެންމެ ރަނގަޅަށް އެނގޭނީ އެރަށެއްގައި ދިރިއުޅެމުންދާ ރައްޔިތުންނަށް ކަމަށްވާތީ އެފަރާތްތަކަށް ވާޞިލްވެ، އެ ފަރާތްތަކުގެ ހާލަތު އެންމެ ގާތުން ބެލުމަށް މިނިސްޓަރު އިިލްތިމާސްކުރެއްވިއެވެ.
އަޅުގަނޑުމެންނާ ހަމައަށް ކަމެއް ހިނގިކަން މިއަންނަނީ އެކަމެއް ހިނގާ ފަހުން. ދެން އަޅުގަނޑުމެން ފޯރުކޮށް ދޭން މިޖެހެނީ ރައްކާތެރިކަން. އަޅުގަނޑު ބޭނުންވަނީ މިކަން ބަދަލުކުރަން. ކަމެއް ދިމާވުމުގެ ކުރިން އެކަމަށް އަޅަން ޖެހޭ ރައްކާތެރިކަމުގެ ފިޔަވަޅުތައް އަޅަން. މިކަން އަޅުގަނޑުމެންނަށް ކުރެވޭނީ ރައްޔިތުންނާއި ގާތުން، އެންމެހާ މުއައްސަސާތައް ގުޅިގެން މަސައްކަތްކޮށްގެން. އެހެންކަމުން، އިބަމަގެ ބައިވެރިން ވެގެންދާނީ މިފަދަ އިޖްތިމާޢީ ޙާލަތުތައް މެޕް ކުރަން ތަމްރީންކުރެވޭ ފަރާތްތަކަކަށް. ތިބޭފުޅުން ވެގެން ދާނީ މުޖުތަމަޢުގައި ހުރި މިފަދަ ކަންކަން ދެނެގަންނަން ލޯހުޅުވޭ އަދި އެކަމަށް އެދެވިގެންވާ ހައްލު ހޯދަންކަމާއި ގުޅުން ހުރި މުއައްސަސާތަކުގެ މެދުގައި އެކުލަވާލެވޭ، ރަށުފެންވަރުގެ ޓީމަކަށް. ތަރުބަވީ މުޖުތަމަޢެއް ބިނާކުރުމަށް، މި ސަރުކާރުން ކުރަމުންގެންދާ މިމަސައްކަތް ކާމިޔާބު ކުރެވޭނީ ތިބޭފުޅުންގެ މަސައްކަތުން.ޖެންޑަރ މިނިސްޓަރު އާއިޝަތު މުޙައްމަދުދީދީ
ރައްޔިތުންނާއި ގާތުން މަސައްކަތް ކުރާ ކަމެއް ބޮޑުވެގެން ދިއުމުގެ ކުރިން އެކަމަކަށް ހައްލު ގެނެސްދޭ ބަޔަކަށް އިބަމައިގައި ތިބޭ މީހުން ވާންވާނެކަން ފާހަގަކުރައްވައި މިނިސްޓަރު ވިދާޅުވީ ރައްޔިތުންގެ ހާލަތު ދެނެގަނެ، ރައްޔިތުންގެ އިހްސާސްތައް ފުރިހަމަކޮށްދޭ ބަޔަކީ އިބަމަ ކަމަށެވެ. މިހާތަނަށް އައިއިރު ރާއްޖޭގެ 3 ރަށެއްގައި 73 ފަރާތެއް ވަނީ އިބަމަ ޓްރެއިނިން ފުރިހަމަކޮށްފައެވެ.
ރައްކާތެރިކަން ދުރާލާ ކަށަވަރު ކުރުމަށާއި، މިހާރާއި ކުރިމަގުގެ ޖީލުތަކުގެ ދުޅަހެޔޮކަމަށް މިފެށުނު ޕްރޮގްރާމްގެ ސަބަބުން ރައްޔިތުންނާއި ގާތުން މަސައްކަތް ކުރުމުގެ ފުރުސަތު ހުޅުވިގެން ދާއިރު، މިކަމުގައި ރައީސުލްޖުމްހޫރިއްޔާގެ ނައިބު ފައިސަލް ނަސީމް ވެދެއްވި އެހީތެރިކަން ޖެންޑަރ މިނިސްޓަރު ވަނީ ފާހަގަކުރައްވާފައެވެ.
