21 އަހަރުގެ އަންހެން ކުއްޖަކަށް ގެވެށި އަނިޔާކުރި މައްސަލައެއް ފުލުހުން ތަހުގީގުކުރަން ފަށައިފިއެވެ.
ފުލުހުން ބުނީ ހުޅުމާލޭގައި 21 އަހަރުގެ އަންހެން ކުއްޖަކަށް ގެވެށި އަނިޔާކުރި މައްސަލަ އާދިއްތަ ދުވަހުގެ މެންދުރު ފުލުހުންނަށް ރިޕޯޓްކޮށްފައިވާކަމަށެވެ. އެކުއްޖާއަށް ޓްރީޓޮޕް ހޮސްޕިޓަލުން ފަރުވާ ދެމުންދާކަމަށް ފުލުހުން ބުނެފައިވެއެވެ.
ޖެންޑަރ މިނިސްޓްރީއާ ގުޅިގެން ފުލުހުން ގެންދަނީ މި މައްސަލަ ތަހުގީގުކުރަމުންނެވެ.
މިކަމާއި ގުޅިގެން ފުލުހުން އިތުރު މައުލޫމާތެއް ހާމަކޮށްފައިނުވިނަމަވެސް ރާއްޖެއެމްވީއަށް އެނގިފައިވާގޮތުގައި 21 އަހަރުގެ ކުއްޖާއަށް އަނިޔާކޮށްފައިވަނީ އޭނާގެ ބައްޕައެވެ. އޭނާގެ މޭ ކަށިގަނޑުގައި ރެނދު ލާފައިވާކަމަށް މައުލޫމާތުލިބެއެވެ.
އޭނާއަށް ފަރުވާ ދިނުމަށް އެންމެ ފުރަތަމަ ގެންގޮސްފައިވަނި އައިޖީއެމްއެޗް އަށެވެ. އައިޖީއެމްއެޗުން ކަމާ ގުޅުންހުރި އިދާރާތަކަށް މިކަން އަންގާފައެެއް ނުވެއެވެ. އެއަށްފަހު އިތުރު ފަރުވާއަށް ޓްރީޓޮޕް ހޮސްޕިޓަލަށް ގެންދިއުމުން އެ ހޮސްޕިޓަލުން ވަނީ ކަމާ ގުޅުންހުރި އިދާރާތަކަށް މިކަން އަންގާފައެވެ.
