ޕާކިސްތާނުން ވައިގެ މަގުން ރާއްޖެ އެތެރެކުރި ގިނަ އަދަދެއްގެ މަސްތުވާތަކެއްޗާ ހަވާލުވި ދިވެހި މީހާ ހައްޔަރުކޮށްފިއެވެ.

ޑިސެންބަރު މަހުގެ 8 ވަނަ ދުވަހު ރާއްޖެއަށް މަސްތުވާތަކެތި އެތެރެކުރަން މަސައްކަތްކުރި ޕާކިސްތާނުގެ ތިން މީހަކު ހައްޔަރުކޮށްފައިވެއެވެ. އެއީ 36 އަހަރުގެ، ބުސްރާ އަނީސްއާއި 41 އަހަރުގެ މުނީރު އަޒީޒްގެ އަދި 49 އަހަރުގެ މުހައްމަދު ޔަސީންއެވެ. އެމީހުން މަސްތުވާތަކެތި އެތެރެ ކުރުމަށް މަސައްކަތް ކޮށްފައިވަނީ ފައިވަނާއި ފުރަގަސް ފަރާތުގައި ރައްކާކޮށްގެންނެވެ.

މިމައްސަލައާ ގުޅިގެން ފުލުހުން ބުނީ މި މީހުން ރާއްޖެއަށް މަސްތުވާތަކެތި އެތެރެކޮށްފައިވަނީ ދިވެއްސަކާ ގުޅިގެންކަން ތަހުގީގަށް އެނގިފައިވާ ކަމަށެވެ. އަދި ޏ. ފުވައްމުލައް، ބީޗްވޭ، އުމުރުން 31 އަހަރުގެ އަބްދުﷲ އާމިރަށް ތަހުމަތު ކުރެވޭ ކަމަށް ފުލުހުން ބުނެއެވެ.

ޕާކިސްތާނު ތިން މީހުންގެ އަތުން ފެނުނު މަސްތުވާތަކެތީގެ ބަރުދަނުގައި 2445 ގުރާމު ހުރިއިރު، މީގެ ކުރިން ވެސް މި މީހުން ރާއްޖެއަށް މަސްތުވާތަކެތި އެތެރެ ކުރުމަށް މަސައްކަތް ކޮށްފައިވެއެވެ. މި މައްސަލައިގައި ހައްޔަރުކުރި މުނީޒު އަޒީޒަކީ މީގެ ކުރިން ދެ ފަހަރެއްގެ މަތީން ރާއްޖެއަށް މަސްތުވާތަކެތި އެތެރެކުރަން މަސައްކަތް ކޮށްފައިވާ މީހެއް ކަމަށް ފުލުހުން ބުނެއެވެ.

މި މައްސަލައިގައި ހައްޔަރުކުރި މީހުން ޝަރީއަތް ނިމެންދެން ބަންދުކޮށްދިނުމަށް ފުލުހުން ކޯޓުގައި އެދިފައިވެއެވެ. ނަމަވެސް ބުރާސްފަތި ދުވަހު ކްރިމިނަލް ކޯޓަށް ހާޒިރު ކުރުމުން ޕާކިސްތާނު ތިން މީހުންގެ ބަންދަށް އިތުރު 15 ދުވަސް އަދި އަބްދުﷲ އާމިރުގެ ބަންދަށް ވެސް 15 ދުވަސް ކޯޓުން ޖަހާފައިވެއެވެ.