ކޮވިޑް-19ގައި އިތުރު މީހަކު ނިޔާވެފައިވާކަމަށް ހެލްތު ޕްރޮޓެކްޝަން އެޖެންސީއިން ހާމަކޮށްފިއެވެ.
އެޗްޕީއޭއިން ބުނީ ގދ. ކޮވިޑް މެނޭޖްމެންޓް ފެސިލިޓީގައި އެޑްމިޓުކޮށްގެން ފަރުވާދެމުންދިޔަ އުމުރުން 66 އަހަރުގެ ދިވެހި ފިރިހެނަކު ނިޔާވެފައިވާކަމަށެވެ. އޭނާ ނިޔާވީ ބުދަ ދުވަހުގެރޭ 10:50ގައި ކަމަށް އެޗްޕީއޭއިން ބުނެފައިވެއެވެ.
މިއާއެކު ރާއްޖެއިން ކޮވިޑް ބަލީގައި ނިޔާވި މީހުންގެ ޖުމްލަ ވަނީ 261އަށް އަރާފައެވެ.
އެޗްޕީއޭއިން އެންމެ ފަހުން އާންމުކޮށްފައިވާ މައުލޫމާތުގައިވާގޮތުން، ފާއިތުވި 24 ގަޑިއިރު 121 މީހަކު ވަނީ ކޮވިޑަށް ޕޮޒިޓިވްވެފައެވެ. އެއީ މާލެ ސަރަހައްދުން 37 މީހުންނާއި، އަތޮޅުތެރެއިން 50 މީހުންނާއި އަދި ހިންގަމުންދާ ރިސޯޓުތަކުން 34 މީހުންނެވެ.
މިވަގުތު 1927 އެކްޓިވް ކޭސް ހިމެނޭއިރު، 15 މީހަކަށް ހޮސްޕިޓަލްގައި އެޑްމިޓް ކޮށްގެން ފަރުވާ ދެމުން ދާކަމަށް އެޗްޕީއޭއިން ބުނެއެވެ.
