ރަށްގިރުމުގެ މައްސަލަ ކުރިމަތިވަމުންދާތީ އެކަމަށް ހައްލެއް ހޯދުމަށް ސަރުކާރުން ރ. ފައިނުގައި ކުރިއަށްގެންދާ ގޮނޑުދޮށް ހިމާޔަތްކުރުމުގެ މަޝްރޫޢު ނިމުމުން ރައްޔިތުން ތިބީއުފަލުންނެވެ. ރ. ފައިނުގައި ގިރަމުން ދަނީ އެރަށު އިރުމަތީ ފަރާތުންނެވެ.

ގޮނޑުދޮށް ހިމާޔަތްކުރުމުގެ މަސައްކަތް ފެށިއިރު އެސަރަހައްދު ގިރަމުންގޮސް މީހުން ދިރިއުޅޭ ސަރަހައްދާ 70 ވަރަކަށް ފޫޓަށް ގިރާފައިވާ ކަމަށް އެރަށު ކައުންސިލުން މައުލޫމާތުދެއެވެ.

މި މަސައްކަތުގެ ކޮންޓްރެކްޓަރ، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ން ބުނީ ރ. ފައިނު ގޮނޑުދޮށް ހިމާޔަތް ކުރުމުގެ މަޝްރޫއު ނިމުނީ މި މަހުގެ 12 ވަނަ ދުވަހު ކަމަށެވެ.

މި މަޝްރޫއުގެ ދަށުން 8100 ކިއުބިކް މީޓަރުގެ ސަރަހައްދަކަށް ވެލި ބެކްފިލްކޮށް 250 މީޓަރުގެ ސަރަހައްދެއްގައި ރިވެޓްމަންޓް ވަނީ ޖަހާފައެވެ.

ފައިނަށް ރަށް ގިރުމުގެ މައްސަލަ ކުރިމަތިވާން ފެށީ އެރަށު ބަނދަރުހެދި ފަހުން ކަމަށް އެރަށު ކައުންސިލުން ބުނެއެވެ. ސަރުކާރުން އެރަށުގައި ކުރިއަށްގެންދާ މަޝްރޫއުތަކަކީ ރައްޔިތުންނަށް އެންމެ މުހިންމު، އަދި މިހާރުން މިހާރަށް ހައްލުންކުރަންޖެހޭ ކަންތައްތަކެެއް ކަމަށް އެރަށު ކައުންސިލުން ބުނެއެވެ.

ފައިނު ގޮނޑުދޮށް ހިމާޔަތްކުރުމުގެ މަޝްރޫއަކީ 8.9 މިލިއަން ރުފިޔާގެ މަޝްރޫއެކެވެ.