ބަޖެޓް ތަންދިން މިންވަރަކުން ތައުލީމީ ދާއިރާއަށް އެހީތެރިކަން ފޯރުކޮށްދޭނެ ކަމަށް އެމްޕީއެލްގެ ސީއީއޯ ޝާހިދު އަލީ ވިދާޅުވެއްޖެއެވެ.
އެމްޕީއެލްގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ގެ ދަށުން، ރަށްރަށުގެ ސްކޫލުތަކުގައި ބޭނުންކުރުމަށް ފަސް ކޮމްޕިއުޓަރ ސިސްޓަމް އާދީއްތަދުވަހު އެޑިއުކޭޝަން މިނިސްޓްރީއާ ވަނީ ހަވާލުކޮށްފައެވެ. މި ރަސްމިއްޔާތުގައި ވާހަކަދައްކަވަމުން ޝާހިދު ވިދާޅުވީ މީގެ ކުރިންވެސް އެމްޕީއެލްގެ ފަރާތުން މިނިސްޓްރީއަށް އެހީތެރިކަން ފޯރުކޮށްދީފައިވާ ކަމަށާއި، ކުރިއަށް އޮތްތަނުގައިވެސް ބަޖެޓް ތަންދިން މިންވަރަކުން އެހީތެރިކަން ފޯރުކޮށްދެމުންދާނެ ކަމަށެވެ.
ސްކޫލްތަކުގެ އެކިއެކި ކަންކަމުގައި ސީއެސްއާރުގެ ދަށުން އެމްޕީއެލްއިން އެހީތެރިކަން ދެމުން ގެންދޭ. އެގޮތުން ފާހަގަ ކޮށްލެވޭ ބައެއް ސްކޫލުތަކަށް ޓީވީ ފަދަ ތަކެތި ދިނުމުގެ އިތުރުން ބައެއް ސްކޫލްތަކުގެ ބެލެނިވެރިންގެ ހިޔާ ހެދުމުގައި ތަކެތި ދިނުމުގެ އިތުރުން މަސައްކަތްތަކުގައި އެމްޕީއެލްގެ މުވައްޒަފުން ވެސް ބައިވެރިވޭ.އެޑިއުކޭޝަން މިނިސްޓަރ ޑރ. އައިޝަތު އަލީ
މި ރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވީ އެމްޕީއެލްގެ ފަރާތުން މިނިސްޓްރީއަށް ހަމައެކަނި ލިބެނީ ތަކެތި ނޫން ކަމަށާއި، އެމްޕީއެލްގެ ފަރާތުން މިނިސްޓްރީއަށް ތަފާތު އެކި އެހީތައް ލިބެމުން އަންނަ ކަމަށެވެ. އަދި މިނިސްޓްރީން ބޭނުމެއް ޖެހިގެން ދަންނަވާލާ ކޮންމެ ފަހަރަކުވެސް އެމްޕީއެލްގެ ފަރާތުން ފުރިހަމަ އެއްބާރުލުން ލިބޭ ކަމަށް މިނިސްޓަރ ފާހަގަކުރެއްވިއެވެ.
