ފީފާ ވޯލްޑް ކަޕުގެ ދެކުނު އެމެރިކާ ކޮލިފައިންގައި ހޮނިހިރު ދުވަހުގެ ފަތިހު ކުޅުނު މެޗުން އުރުގުއޭ ބަލިކޮށް އަންނަ އަހަރު ގަތަރުގައި ބޭއްވުމަށް ހަމަޖެހިފައިވާ ވޯލްޑް ކަޕަށް ކޮލިފައިވުމާ ގާތަށް އާޖެންޓީނާ ޖެހިލައިފިއެވެ.

ރަށުން ބޭރުގައި ކުޅުނު މެޗުން އާޖެންޓީނާ މޮޅުވީ އުރުގުއޭ އަތުން 1-0 ގެ ނަތީޖާއަކުންނެވެ.

މި މެޗު އާޖެންޓީނާއިން ފަށާފައިވަނީ އެ ޓީމުގެ ކެޕްޓަން ލިއޮނެލް މެސީ ބެންޗުގައި ބައިންދައިގެންނެވެ. އެކަމަކު މެޗުގެ ފަހުކޮޅު މެސީ ކުޅެން އެރިއިރު، އަނިޔާގެ ސަބަބުން ޕީއެސްޖީން އެންމެ ފަހުން ކުޅުނު ދެ މެޗުގައިވެސް އޭނާ ކުޅެފައެއް ނުވެއެވެ.

އުރުގުއޭއާ ދެކޮޅަށް ކުޅުނު މެޗު ފަށައިގެން އާޖެންޓީނާއިން ރަނގަޅު ކުޅުމެއް ދެއްކިއިރު، މި މެޗުގައި އެ ޓީމުން ލީޑު ނަގާފައިވަނީ މެޗު ފަށައިގެން ހަތްވަނަ މިނެޓުގައެވެ. ޕައުލޯ ޑިބާލާ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ އެންހެލް ޑި މާރިއާއެވެ. އޭގެ ފަހުން މި މެޗުގައި އުރުގުއޭއިން ގިނަ ހަމަލާތަކެއް އުފެއްދިއިރު، ނަތީޖާ އެއްވަރުކުރަން އެ ޓީމުގެ އިތުބާރު ފޯވާޑް ލުއިސް ސުއަރޭޒަށް ވަނީ ރަނގަޅު ފުރުސަތުތަކެއް ލިބި ބޭކާރުވެފައެވެ.

މި މޮޅާއެކު ކޮލިފައިންގެ ދެވަނައިގައި އާޖެންޓީނާ އޮތީ ކުޅުނު 12 މެޗުން ލިބުނު 28 ޕޮއިންޓާއެކުއެވެ. ތިންވަނައިގައި އޮތީ 13 މެޗުން 21 ޕޮއިންޓް ހޯދާފައިވާ އެކުއެޑޯއެވެ. އަދި ހަތަރުވަނައިގައި އޮތް ޗިލީ އާއި ފަސްވަނައިގައި އޮތް ކޮލަމްބިއާއަށް ވަނީ 13 މެޗުން 16 ޕޮއިންޓް ލިބިފައެވެ. އެހެންކަމުން ވޯލްޑް ކަޕުގެ ޖާގައެއް ހޯދަން އާޖެންޓީނާއަށް ކޮލިފައިންގައި ބާކީ އޮތް ހަ މެޗުން ދެން ބޭނުންވަނީ އެންމެ ދެ ޕޮއިންޓެވެ.

ދެކުނު އެމެރިކާ ކޮލިފައިންގެ ގަދަ ހަތަރު ޓީމަށް ވޯލްޑް ކަޕުގެ ޖާގަ ލިބޭއިރު، ކޮލިފައިންގެ އެއްވަނައިގައި އޮތް ބްރެޒިލް މިހާރު ވަނީ ވޯލްޑް ކަޕުގެ ޖާގައެއް ކަށަވަރުކޮށްފައެވެ. ކޮލިފައިންގެ އެއްވަނައިގައި ބްރެޒިލް އޮތީ ކުޅުނު 12 މެޗުން ލިބުނު 34 ޕޮއިންޓާއެކުއެވެ.