ފީފާ ވޯލްޑް ކަޕުގެ ދެކުނު އެމެރިކާ ކޮލިފައިންގައި ހުކުރު ދުވަހުގެ ފަތިހު ކުޅުނު މެޗުން ކޮލަމްބިއާ ބަލިކޮށް އަންނަ އަހަރު ގަތަރުގައި ބޭއްވުމަށް ހަމަޖެހިފައިވާ ވޯލްޑް ކަޕުގެ ޖާގައެއް ބްރެޒިލުން ކަށަވަރުކޮށްފިއެވެ.

ވޯލްޑް ކަޕް ބާއްވާ ގައުމުގެ ގޮތުން މީގެ ކުރިން ގަތަރަށް ވަނީ މި މުބާރާތުގެ ޖާގައެއް ލިބިފައެވެ. އޭގެ ފަހުން ވޯލްޑް ކަޕަށް ކޮލިފައިވީ ބްރެޒިލުގެ އިތުރުން ޔޫރަޕުގެ ދެ ގައުމު ކަމަށްވާ ޖަރުމަނާއި ޑެންމާކެވެ.

ބްރެޒިލުން ވޯލްޑް ކަޕުގެ ޖާގައެއް ހޯދީ އަމިއްލަ ގައުމުގައި ކުޅުނު މެޗުން ކޮލަމްބިއާ އަތުން 1-0 ގެ ނަތީޖާއަކުން މޮޅުވެގެންނެވެ. މި މެޗުގައި ބްރެޒިލުން ގިނަ ހަމަލާތަކެއް އުފެއްދިއިރު، މެޗުގައި ފެނިގެންދިޔަ ހަމައެކަނި ލަނޑު ބްރެޒިލުން ކާމިޔާބުކޮށްފައިވަނީ މެޗުގެ 72 ވަނަ މިނެޓުގައެވެ. ނޭމާ ތަނަވަސްކޮށްދިން ފުރުސަތަކުން މި ލަނޑު އެ ގައުމަށް ކާމިޔާބުކޮށްދިނީ ލޫކަސް ޕަކޭޓާއެވެ.

މި މޮޅާއެކު ވޯލްޑް ކަޕުގެ ޖާގައެއް ބްރެޒިލުން ކަށަވަރުކުރިއިރު، މި ފަހަރުގެ ކޮލިފައިންގައި އެ ގައުމު އަދި މިހާތަނަށް ބަލިވެފައެއް ނުވެއެވެ. އެގޮތުން ކުޅުނު 12 މެޗުގެ ތެރެއިން 11 މެޗުން ބްރެޒިލް މޮޅުވެފައިވާއިރު، އެ ގައުމު މޮޅުވިޔަނުދީ ހުއްޓުވީ މިދިޔަ މަހު ކޮލަމްބިއާއިން އެކަންޏެވެ.

ދެކުނު އެމެރިކާ ކޮލިފައިންގެ ގަދަ ހަތަރު ޓީމަށް ވޯލްޑް ކަޕުގެ ޖާގަ ލިބޭއިރު، އެއްވަނައިގައި ބްރެޒިލް އޮތީ ކުޅުނު 12 މެޗުން ލިބުނު 34 ޕޮއިންޓާއެކުއެވެ. ދެވަނައިގައި އޮތީ 11 މެޗުން 25 ޕޮއިންޓް ހޯދާފައިވާ އާޖެންޓީނާއެވެ. އަދި ތިންވަނައިގައި އޮތް އެކުއެޑޯއަށް 13 މެޗުން 20 ޕޮއިންޓް ލިބިފައިވާއިރު، ހަތަރުވަނައިގައި އޮތް ޗިލީ އާއި ފަސްވަނައިގައި އޮތް ކޮލަމްބިއާއަށް ވަނީ 13 މެޗުން ލިބިފައިވަނީ 16 ޕޮއިންޓެވެ.