ޖާގައަށް ވުރެ އިތުރަށް 33 އިންސައްތަ ގައިދީން މާލޭ ޖަލުގައި އެބަތިބިކަމަށް މޯލްޑިވްސް ކަރެކްޝަނަލް ސަރވިސަސްއިން ބުނެފިއެވެ.

ކޮމިޝަނަރ އޮފް ޕްރިޒަންސް (ސީޕީ) އަހުމަދު މުޙައްމަދު ފުޅު ވަނީ މާލޭ ޖަލުގައި ތިބި ބަންދުމީހުންނާ ބައްދަލު ކުރައްވަައި ކަންބޮޑުވުންތައް އަޑުއައްސަވާފައެވެ. އެގޮތުން ސިއްހީ މައްސަލައަކީ މިވަގުތު ދިމާވެފައިއޮތް އެންމެ ބޮޑު ގޮންޖެހުންކަން ފާހަގަކުރައްވައި ސީޕީ ވިދާޅުވީ، ޖަލުގެ ޖާގައާ ނުބައްދަލު އަދަދަށް މީހުން ބަންދުކުރަން ޖެހިފައިވުމުން ޚިދުމަތް ފޯރުކޮށް ދިނުމަށް ގިނަ ދަތިތައް އެބަހުރި ކަމަށެވެ.

ސީޕީ ވިދާޅުވީ، މިވަގުތު ވެސް މާލޭ ޖަލުގައި ޖާގައަށްވުރެ 33 އިންސައްތަ އިތުރަށް ބަންދުގައި މީހުން އެބަތިބި ކަމަށެވެ. އަދި ޝަރީއަތްތައް މިހާރަށްވުރެ އަވަސްކުރަން ޖެހޭކަމަށް ސީޕީ ވިދާޅުވިއެވެ.

ކަރެކްޝަންސްއިން މައުލޫމާތު ދޭ ގޮތުގައި ޖަލުގެ ޖާގައަށްވުރެ މީހުން އިތުރުވެފައިވަނީ ޝަރީއަތް ނިމެންދެން ބަންދުގައި ތިބި މީހުންގެ އަދަދު އިތުރުވެ، ޝަރީއަތްތައް ނުނިމި ލަސްވަމުންދާތީއެވެ.

މައްސަލަތަކުގެ ޝަރީއަތްތައް އަވަހަށް ނިމެންޖެހޭކަން ސީޕީ ވެސް ފާހަގަކުރައްވާފައިވާއިރު، މައްސަލަތައް ނުނިމި ޝަރީއަތް ނިމެންދެން ބަންދުގައި ތިބި މީހުންގެ ތެރޭގައި 6 އަހަރު ދުވަހު ބަންދުގައި ތިބި މީހުން އެބަތިބިކަމަށް ޕްރޮސެކިއުޓަރ ޖެނެރަލްގެ އޮފީހުން ވެސް މީގެ ކުރިން ބުނެފައިވެއެވެ.

ޖިނާއީ މައްސަލަތަކުގައި ތަހުގީގަށް ބަންދުކުރެވޭ މީހުންނާއި، ޝަރީއަތް ނިމެންދެން ބަންދުކުރެވޭ މީހުންނާގުޅޭ ގޮތުން ޕްރޮސިކިއުޓަރ ޖެނެރަލްގެ އޮފީހުންކޮށްފައިވާ މަސައްކަތުގެ މައްޗަށް ތައްޔާރުކޮށް ރައްޔިތުންގެ މަޖިލީހަށް ހުށަހަޅާ ހާއްސަ ރިޕޯޓް އާންމުކޮށްފައިވާ އިރު، ޖިނާއީ އަދުލުގެ ނިޒާމަށް މިވަގުތު ދިމާވެފައިވާ އެންމެ ބޮޑު އެއް ގޮންޖެހުމަކީ، ޝަރީއަތް ނިމެންދެން ބަންދުގައި ގިނަ ބަޔަކު ތިބުން ކަމަށް ރިޕޯޓްގައި ވަނީ ބުނެފައެވެ. އެގޮތުން ބަންދުގައި ތިބި މީހުންގެ ތެރޭގައި މައްސަލަތައް ނުނިމި 6 އަހަރު ނުވަތަ 5 އަހަރު ވެފައި ތިބިމީހުން އެބަ ތިބިކަމަށާއި މިއީ ކަންބޮޑުވާ ކަމެއް ކަމަށް ވަނީ ބުނެފައެވެ.

އޭގެ ތެރޭގައި ރިމާންޑް ޖަލުތަކުގެ ޖާގައިގެ ދަތިކަމާހެދި ރިމާންޑްޖަލަކަށް ބަދަލު ނުކުރެވި ތިބި މީހުން ވެސް ހިމެނޭކަމަށް ޕީޖީ އޮފީހުން މައުލޫމާތު ދެއެވެ.

ޖަލުތަކުގެ ޖާގައިގެ ދަތިކަން ޙައްލުކުރުމަށް މި ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މި ސަރުކާރުން ޖަލުތަކުގެ ހާލަތު ބެލުމަށްފަހު ޖަލު އޮޑިޓް ރިޕޯޓެއް ނެރެފައިވެއެވެ. ޖަލުތަކުގައި މީހުން ބޭތިއްބުމަށް ކަނޑައަޅާފައިވާ އަދަދަށް ވުރެ އިތުރަށް މީހުން ބަންދުގައި ބޭތިއްބުމާއި، އިންސާނީ އަދި އެހެނިހެން ވަސީލަތްތައް އެކަށީގެންވާ ވަރަށް ނެތުމުގެ މައްސަލަ ރިޕޯޓުގައި ފާހަގަކޮށްފައިވެއެވެ.

މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށުން ގައިދީން ބަލަހައްޓަމުން ދަނީ ހަތަރު ޖަލެއްގައި ކަމަށާއި އެ ޖަލުތަކުގެ ޖުމްލަ ޖާގައަކީ 1300 ކަމަށް ހޯމް މިނިސްޓަރ މީގެ ކުރިން ވިދާޅުވެފައިވެއެވެ. ނަމަވެސް ޖަލުތަކުގެ އާބާދީ ކެޕޭސިޓީއަށްވުރެ އިތުރުކަމަށް މިނިސްޓަރ ވަނީ ވިދާޅުވެފައެވެ.

ކަރެކްޝަންސްއިން ބަލަހައްޓަމުންދާ ޖަލުތަކުގައި ތިބި ޤައިދީންގެ 70 އިންސައްތަ އަކީ މަސްތުވާތަކެއްޗާ ގުޅުންހުރި މައްސަލަތަކުގައި ބަންދުކޮށްފައި ތިބި މީހުންކަމަށް ކަރެކްޝަންސް ގެ ތަފާސްހިސާބުތަކުން ދައްކައެވެ.