ނޮވެމްބަރު ތިނެއްގެ ހަމަލާ ރޭވި ދިވެހިންނަކީ ބާޣީން ކަމުގައި ދަރިވަރުންނަށް ކިޔައި ނުދޭން އަންގައިފައި ނުވާކަމަށް އެޑިޔުކޭޝަން މިނިސްޓްރީން ބުނެފިއެވެ.

ސޯޝަލް މީޑިއާގައި ދައުރުވަމުންދާ ޕޯސްޓަކާ ގުޅިގެން އެޑިޔުކޭޝަން މިނިސްޓްރީން ބުނީ އެ ޚަބަރަކީ އެއްވެސް އަސްލެއް ނެތް، ކަނޑައެޅިގެން ދޮގު ޚަބަރެއް ކަމަށެވެ.

މިފަދަ އެއްވެސް ކަމެއް ހިނގާފައެއް ނުވާކަން ފާހަގަކުރައްވައި އެޑިޔުކޭޝަން މިނިސްޓްރީން ބުނީ, ގައުމީ ގޮތުން ފާހަގަކުރެވޭ މިފަދަ ދުވަސްތަކުގައި ދަރިވަރުންނާ ގުޅުވައި ސިޔާސީ މަންފާ ހޯދުމަކީ މިނިސްޓްރީން ކުށްވެރިކުރާ ކަމެއް ކަމަށެވެ.

ޓެރަރިސްޓް ޖަމާއަތެއް ކަމަށްވާ، ތަމަޅަ ޓައިގަރުންގެ ބަޔަކާ ގުޅިގެން ދިވެހިންގެ ބަޔަކު މާލެއަށް ހަތިޔާރާއެކު އަރައި، ދިވެހިންގެ ތެރެއިން އެތައް ބަޔަކު ޝަހީދުކޮށްލާފައި ވަނީ 1988 ވަނަ އަހަރުގެ ނޮވެމްބަރުމަހުގެ 3 ވަނަ ދުވަހުއެވެ.

ނޮވެމްބަރ 3، ނަސްރުގެ ދުވަހުގެ ގޮތުގައި ފާހަގަކުރަނީ 1988 ވަނަ އަހަރު ދިވެހިންގެ ބަޔަކު ތަމަޅަ ޓައިގަރުންގެ ބަޔަކާއެކު ރާއްޖެ އަރައި ދިން އުދުވާނީ ހަމަލާއިން ދިވެހިންނަށް ލިބުނު ނަސްރު ފާހަގަކުރުމުގެ ގޮތުންނެވެ.

ނަސްރުގެ ދުވަހުގެ ގޮތުގައި ނޮވެމްބަރު 3 ފާހަގަކުރާއިރު، އެ ހަނދާންތައް އާކުރަން ޖެހެއެވެ.