ކުރިއަށް އޮތް ރާއްޖޭގެ ފުޓްބޯޅަ ސީޒަން ޕްރެޒިޑެންޓްސް ކަޕުން ފަށާ ގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.

އާންމު ގޮތެއްގައި ރާއްޖޭގެ ފުޓްބޯޅަ ސީޒަން ފަށަނީ ޗެރިޓީ ޝީލްޑް މެޗުންނެވެ. އަދި ޕްރެޒިޑެންޓްސް ކަޕަކީ ސީޒަން ނިންމަން ކުޅޭ މުބާރާތެކެވެ. އެކަމަކު އެފްއޭއެމުން އާދީއްތަ ދުވަހު ނެރުނު ކަލަންޑަރުގައިވާ ގޮތުން ސީޒަން ހުޅުވުމަށް ކުޅޭ ޕްރެޒިޑެންޓްސް ކަޕް އޮންނާނީ މި އަހަރުގެ ޑިސެމްބަރު މަހުއެވެ.

އެހެން އަހަރުތަކާ ޚިލާފަށް މި ސީޒަނުގެ ޕްރެޒިޑެންޓްސް ކަޕް ލީގު ފޯމެޓަށް ކުޅުމަށް ނިންމާފައިވާއިރު، މުބާރާތް ކުރިއަށްދާނީ ޑިސެމްބަރު މަހުގެ 15 ވަނަ ދުވަހުން ފެށިގެން އަންނަ އަހަރުގެ ޖެނުއަރީ މަހުގެ 19 ވަނަ ދުވަހުގެ ނިޔަލަށެވެ. އެއަށްފަހު ޗެރިޓީ ޝީލްޑް މެޗު ކުޅުމަށް ތާވަލުކޮށްފައިވަނީ އަންނަ އަހަރުގެ ފެބްރުއަރީ މަހުގެ ހަތްވަނަ ދުވަހެވެ. 

މި އަހަރު ޕްރެޒިޑެންޓްސް ކަޕް ބާއްވާއިރު، މި މުބާރާތް އެންމެ ފަހުން ބާއްވާފައިވަނީ 2017 ވަނަ އަހަރެވެ. އޭގެ ފަހުން ފާއިތުވި ތިން ސީޒަނުގައިވެސް އެކި ސަބަބުތަކާ ހުރެ ޕްރެޒިޑެންޓްސް ކަޕް ބާއްވާފައެއް ނުވެއެވެ. އެގޮތުން 2019-2020 ވަނަ އަހަރުގެ ސީޒަނުގައިވެސް ޕްރެޒިޑެންޓްސް ކަޕް ބާއްވަން ތާވަލުކުރިއިރު، އެ ފަހަރު މުބާރާތް ކެންސަލް ކުރަން ޖެހުނީ ކޮވިޑް-19 އާ ގުޅިގެންނެވެ. އަދި އެފްއޭ ކަޕުގެ މެދުތެރެއިން އެ ފަހަރުގެ މުބާރާތް ކެންސަލް ކުރިއިރު، މިދިޔަ ސީޒަނުގައިވެސް ކޮވިޑާ ގުޅިގެން ޕްރެޒިޑެންޓްސް ކަޕާއި އެފްއޭ ކަޕް ބާއްވާފައެއް ނުވެއެވެ.

ހަތަރު ވަރަކަށް އަހަރު ތެރޭ ފުރަތަމަ ފަހަރަށް ޕްރެޒިޑެންޓްސް ކަޕް މި އަހަރު ބާއްވާއިރު، މި މުބާރާތުގެ އެންމެ ފަހުގެ ޗެމްޕިއަނުންނަކީ ރާއްޖޭގެ އެންމެ ކާމިޔާބު ޓީމު ކަމަށްވާ ނިއު ރޭޑިއަންޓް ސްޕޯޓްސް ކުލަބެވެ. އެގޮތުން 2017 ވަނަ އަހަރުގެ ޑިސެމްބަރު މަހު ކުޅުނު އެ މުބާރާތުގެ ޗެމްޕިއަންކަން ނިއު ރޭޑިއަންޓުން ހޯދާފައިވަނީ ފައިނަލް މެޗުގައި ޓީސީ ސްޕޯޓްސް ކުލަބު ބަލިކުރުމަށްފަހުއެވެ.

މީގެ އިތުރުން އާދީއްތަ ދުވަހު ނެރުނު ކަލަންޑަރުގައިވާ ގޮތުން މި ސީޒަނުގެ އެފްއޭ ކަޕް ކުޅުމަށް ތާވަލުކޮށްފައިވަނީ އަންނަ އަހަރުގެ ޖޫން މަހާއި އޮގަސްޓް މަހުގައެވެ.