އައްޑޫ ސިޓީން އިތުރު 18 މީހަކު ކޮވިޑް-19ށް ޕޮޒިޓިވްވެއްޖެއެވެ.

އައްޑޫ އިކުއެޓޯރިއަލް ހޮސްޕިޓަލް (އޭއީއެޗް)ން ބުނީ ބުދަ ދުވަހުގެ އިރުއޮއްސި 6:00ން ބުރާސްފަތި ދުވަހުގެ އިރުއޮއްސި 6:00ށް 301 ސާމްޕަލް ނަގާފައިވާ ކަމަށެވެ. އޭގެ ތެރެއިން 18 މީހަކު ޕޮޒިޓިވްވެފައިވާ ކަމަށް އޭއީއެޗްއިން ބުނެއެވެ.

އޭއީއެޗްއިން ބުނީ މިހާތަނަށް 1726 މީހުން ޕޮޒިޓިވްވެފައިވާ ކަމަށާއި، 1471 މީހުން ބަލިން ރަނގަޅުވެފައިވާ ކަމަށެވެ. އަދި 252 އެކްޓިވް ކޭސް ހިމެނޭއިރު، އެއީ ހިތަދޫއިން 148 މީހުން، މަރަދޫއިން 16 މީހުން، މަރަދޫ-ފޭދޫއިން 29 މީހުން، ފޭދޫއިން 56 މީހުން، ހުޅުދޫއިން އެކަކު އަދި މީދޫއިން 2 މީހުން ކަމަށް ތަފާސްހިސާބުތަކުން ދައްކައެވެ.

އޭއީއެޗްއިން ބުނީ މިހާރު ވެސް ދެމީހަކަށް ހޮސްޕިޓަލްގައި އެޑްމިޓްކޮށްގެން ފަރުވާ ދެމުންދާ ކަމަށެވެ. އަދި 4 މީހަކު މިހާތަނަށް މިބަލީގައި ނިޔާވެފައިވާ ކަމަށެވެ.

ކޮވިޑް-19 ކޮންޓްރޯލް ކުރުމަށް ގިނަ ފިޔަވަޅުތަކެއް އައްޑޫ ސިޓީގައި އަޅާފައިވެއެވެ. ސާމްޕަލިންގެ މަސައްކަތްތަކަށް ޚާއްސަ އިސްކަމެއްދީގެން ކުރަމުންދާއިރު، މިހާތަނަށް 26146 ސާމްޕަލެއް ނަގާފައިވެއެވެ. އަދި ރޯގާގެ އެއްވެސް އަލާމާތެއް ފެނިއްޖެ ނަމަ ލަސްނުކޮށް ޓެސްޓު ކުރުމަށް އިލްތިމާސްކޮށްފައިވެއެވެ. މިދުވަސްވަރު ހުމާއި، އަރިދަފުސްރޯގާ ހަލުހި މިނެއްގައި ފެތުރެމުންދާތީ އެކަމަށް ވެސް ސަމާލުވުމަށް އެދިފައިވެއެވެ. އަދި ކޮންމެހެން ބޭރަށް ނުކުންނަން ޖެހިގެން މެނުވީ ބޭރަށް ނުނިކުތުމަށާއި، ބަލިން ރައްކާތެރިވުމަށް އަޅާފައިވާ ފިޔަވަޅުތަކާއި އެއްގޮތަށް އަމަލުކުރުމަށް އޭއީއެޗްއިން ނަސޭހަތްތެރިވެފައިވެއެވެ.