މޯލްޑިވްސް ނޭޝަނަލް ޕާޓީ (އެމްއެންޕީ)ގެ އުސޫލާއި، އާންމު މެމްބަރުންގެ ރުހުމާއި ނުލައި ޕާޓީގެ މެމްބަރެއްގެ ގޮތުގައި އެއްވެސް މީހަކަށް ނުހުރެވޭނެ ކަމަށް ތިމަރަފުށީ ދާއިރާގެ މަޖިލިސް މެންބަރު އަދި އެމްއެންޕީގެ އިންތިގާލީ ނާއިބުރައީސް އަބްދުﷲ ރިޔާޒް ވިދާޅުވެއްޖެއެވެ.
ރިޔާޒް މިހެން ވިދާޅުވީ އެމްއެންޕީ އުފެއްދުމަށް ހުކުރު ދުވަހުގެރޭ ބެއްވި ބައްދަލުވުމުގައި ވާހަކަފުޅު ދައްކަވަމުންނެވެ. އަބްދުﷲ ރިޔާޒް ވިދާޅުވީ އެމްއެންޕީ ވެގެންދާނީ އަމިއްލަ މަސްލަހަތަށްވުރެ ބޮޑަށް ގައުމީ މަސްލަހަތު އިސްކުރާނެ ޕާޓީއަކަށް ކަމަށެވެ.
ދެފަރާތް ފެންނަ ޒަމާނީ ޑިމޮކްރަސީއެއްގެ ރީތި އުސޫލުތައް އެ ޕާޓީން ހިފަހައްޓާނެ ކަމަށާއި، އެ ޕާޓީގެ ކައުންސިލްގައި އާންމު މެމްބަރުންގެ ރުހުމާއި ނުލައި އެއްވެސް މީހަކަށް ޕާޓީގައި ނުހުރެވޭނެ ކަމަށް ރިޔާޒް ވިދާޅުވިއެވެ. އަދި ތަބަކަށް ލާފައި ދޭނެ އެއްވެސް އެއްޗެއް އެ ޕާޓީގައި ނޯންނާނެ ކަމަށް ވަނީ ވިދާޅުވެފައެވެ.
ތައުލީމާއި ތަޖުރިބާއަށް ޚާއްސަކުރެވިފައިވާ އެޑްވައިޒަރީ ކައުންސިލެއް އެ ޕާޓީގައި އޮންނާނެ ކަމަށާއި، ޕާޓީގެ ސިޔާސަތުތައް ނިންމާނީ ތައުލީމާއި އަދި ތަޖުރިބާ ހުރި މީހުންގެ އަޑު އަހައިގެން ކަމަށް ރިޔާޒް ވިދާޅުވިއެވެ. އަދި ދެޖިންސަށް ހަމަހަމަ ފުރުސަތުތައްވެސް ކަށަވަރުކޮށްދެވިފައިވާނެ ކަމަށް ރިޔާޒް ވަނީ ވިދާޅުވެފައެވެ.
މީގެ އިތުރުން އެމްއެންޕީގެ އަސާސްތައް ބައްޓަންކޮށްފައިވާނީ ގައުމުގައި މިވަގުތު ހުރި ބޮޑެތި މައްސަލަތަކަށް އަވަސް ހައްލެއް ހޯދައިދެވޭނެ ފަދަ ގޮތަކަށް ކަމަށާއި، އެކަންކަން މިހާރު ވަރަށް ސާފުވާނެ ކަމަށް ރިޔާޒް ވިދާޅުވިއެވެ. ރިޔާޒް ވިދާޅުވީ މިއަދު މުޅި ގައުމު ގޮވަމުންދަނީ އަންނަ އޮތް ޖީލުތަކުގެ މަސްލަހަތު އިސްކޮށް ގައުމު އާރަސްތުކުރާނެ ބަޔަކަށް ކަމަށެވެ. ކޮވިޑުގެ ވަބާގެ ތެރެއިން ސިޔާސީ ޕާޓީއެއް އުފައްދަން ނިންމެވީ މިފަދަ ކަންކަމާއިމެދު ވަރަށް ފުންކޮށް ވިސްނުމަށްފަހު އެނޫން އެއްވެސް އިތުރު ގޮތެއް ނެތިގެން ކަމަށް އޭނާ ވިދާޅުވިއެވެ. މި މަސައްކަތުގައި އެއްވެސް މީހެއްގެ މޫނަކަށް ކަނދުރާކައަށް ނުބަލައި ކުރިއަށްދާނީ ގައުމީ މަސްލަހަތު އިސްކޮށްގެން ކަމަށް ވިދާޅުވިއެވެ.
ރިޔާޒް ވިދާޅުވީ އެމްއެންޕީއަކީ ގައުމީ ފިކުރުގެ ޕާޓީއެއް ކަމަށެވެ. އެ ޕާޓީން އިސްކަންދޭނީ ދިވެހިން އެދޭ ކަންކަން ހާސިލްކުރުމަށް ކަމަށާއި، ދިވެހި ބިމުގައި ދިވެހިން ބާރުވެރިކުރުވައި، ދިވެހިން ގެދޮރުވެރިކުރުވަން އެ ޕާޓީން މަސައްކަތްކުރާނެ ކަމަށެވެ. އަދި ގައުމުގެ ވަޒީފާތައް ދިވެހިންނަށް ކަށަވަރުކޮށްދީ، ޒުވާނުންނަށް ފަހި ފުރުސަތުތައް ހޯދއިދިނުމަކީ އެ ޕާޓީގެ އަމާޒެއް ކަމަށް ރިޔާޒް ވިދާޅުވިއެވެ.
އެމްއެންޕީ ސިޔާސީ ޕާޓީއެއްގެ ގޮތުގައި ރަޖިސްޓްރީކުރުމަށް އިލެކްޝަންސް ކޮމިޝަނަށް ވަނީ ހުށަހަޅާފައެވެ. އެ ޕާޓީ ސިޔާސީ ޕާޓީއެއްގެ ގޮތުގައި ރަޖިސްޓްރީކުރުމަށް ހުށަހަޅާފައިވަނީ ރާއްޖޭގެ އެކިކަންކޮޅުތަކުން 5000 މެންބަރުންނަށް ވުރެ ގިނަ ފޯމާއެކުއެވެ. އިލެކްޝަންސް ކޮމިޝަނުން މޯލްޑިވްސް ނެޝަނަލް ޕާޓީގެ ނަމުގައި ސިޔާސީ ޕާޓީއެއް އުފެއްދުމަށް މަސައްކަތް ކުރުމުގެ ހުއްދަ ދީފައިވަނީ 15 ޖުލައި 2021 ގައެވެ. އެގޮތުން މިދިޔަ މަދު މަސްދުކޮޅުގެ ތެރޭގައި އެމްއެންޕީއާ ގިނަ އަދަދެއްގެ މެންބަރުން ދިޔައީ ގުޅެމުންނެވެ.
