މިއަދުގެ އެންމެ އިސް ގައުމީ ވާޖިބަކީ، ރާއްޖޭގެ އެންމެ މަތީ މަސްލަހަތު ރައްކާތެރިކުރުން ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
ގައުމީ ދުވަހުގެ ރަސްމީ ޖަލްސާގައި ރައީސް ވިދާޅުވީ ސަރުކާރުގެ އެންމެ އިސް ސިޔާސަތަކީ ވެސް ރާއްޖޭގެ އެންމެ މަތީ މަސްލަހަތު ރައްކާތެރިކުރުން ކަމަށެވެ. އެގޮތުން ގައުމީ ތަރައްގީއަށްޓަކައި ކުރާ ކޮންމެ ކަމެއް، އަދި ބައިނަލްއަގުވާމީ މުޖްތަމައާއެކު ގާއިމުކުރާ ކޮންމެ ގުޅުމެއް، ބިނާކުރަނީ ވަރަށް ވަރުގަދަ ތަރަހައެއްގެ މަތީގައި ކަމަށް އެމަނިކުފާނު ވިދާޅުވިއެވެ.
އެއީ، ދިވެހި ގައުމިއްޔަތުގެ އަސާސީ ބަހާތައް ނަގަހައްޓައި ދެމެހެއްޓުން. އެއީ ދިވެހިރާއްޖޭގެ މިނިވަންކަން ދިފާއުކޮށް ރައްކާތެރިކުރުމާއި، ދިވެހިރާއްޖެއާއި ދިވެހީންގެ ސަލާމަތާއި ރައްކާތެރިކަން ކަށަވަރުކުރުން. ހަމައެފަދައިން ދިވެހިންގެ ހިތްތަކުގައިވާ އިސްލާމީ ޢަޤީދާ ހަރުދަނާ ކުރުމާއެކު، އިންސާނީ ޙައްޤުތައް ރައްކާތެރިކުރުމާއި، ޑިމޮކްރަސީގެ ހަމަތައް ދިރުވައި އާލާކުރުން.ރައީސް އިބްރާހީމް މުޙައްމަދު ޞާލިޙު
ދުނިޔެ ދަންނަނީ ސުލްހަޔާއި މިނިވަންކަމުގެ ބަސްމަގުކަން ފާހަގަކުރައްވައި ރައީސް ވިދާޅުވީ, ދުނިޔެ ގޮވައިލަނީ އެކުވެރިކަމާއެކު ލާމެހިގެން އުޅެން ކަމަށެވެ. އެކަހެރިވުމާއި ވަކިވަކިވެގެން އުޅުމަށް، މިއަދުގެ ވިސްނުން ތަނެއް ނުދޭ ކަމަށާއި، އަޅުވެތިކުރުމާއި ގަދަބާރުން ކަންކަން ކުރުމަކީ ބައިނަލްއަގުވާމީ މުޖްތަމައާ ބީރައްޓެހި ކަންކަން ކަމަށް ރައީސް ވިދާޅުވިއެވެ. އަދި ވިދާޅުވީ ބާރާއި ނުފޫޒަކީ، ސުލްހަޔާއި ހަމަޖެހުން ގާއިމުކުރެވޭނެ ވަސީލަތެއް ނޫން ކަމަށާއި، މިއަދު ރާއްޖެއަކީ ދުނިޔެ ގަބޫލުކުރާ އުސޫލުތަކާއި ހަމަތައް ފުރިހަމައަށް ގަބޫލުކުރާ ގައުމެއް ކަމަށެވެ.
މީގެ އަހަރުތަކެއް ކުރިން ރާއްޖެ ބައިނަލްއަގުވާމީ މުޖްތަމައާ މުޅިން އެކަހެރިވެފައި އޮތް ފާހަގަކުރައްވައި ރައީސް ވިދާޅުވީ މިއަދު ރާއްޖެއަކީ، ބައިނަލްއަގުވާމީ މުޖްތަމައުގެ އިތުބާރާއި ލޯތްބާއި އިހުތިރާމް ލިބިފައިވާ ގައުމެއް ކަމަށެވެ.
