ގައުމިއްޔަތު ހިމާޔަތްކުރުމުގެ އެންމެ މުހިންމު މަސައްކަތަށް ރާއްޖޭގެ ތިމާވެށި ހިމާޔަތްކުރުން ހަދަންޖެހޭ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވިއެވެ.
ގައުމީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ, ބައެއްގެ މެދުގައި ގައުމިއްޔަތެއް ދެމިއޮންނާނީ، އަދި އެގައުމިއްޔަތު ރައްކާތެރިކޮށް ކުރިމަގުގެ ޖީލުތަކަށް ފޯރުކޮށްދެވޭނީ ވެސް، އެގައުމެއް ބިންމަތީގައި ވުޖޫދުވެ އޮވެގެން ކަމަށެވެ. މި ހިތްގައިމު ރާއްޖެއަށް ކުރިމަތިވާ ތިމާވެށީގެ ނުރައްކާތަކާ މެދު މިއިން ޒަމާނެއްގައި ބިރުނުގަންނަ މިންވަރަށް ބިރުގަންކަން ފާހަގަކުރައްވައި ރައީސް ވިދާޅުވީ, މިއީ ތޯތޯ ވާހަކައެއް ނޫން ކަމަށާއި، އިލްމީ ހަގީގަތްތައް ސާފުކޮށް ކުރަހައިދޭ ބިރުވެރި މަންޒަރެއް ކަމަށެވެ.
ރައީސް ވިދާޅުވީ މޫސުމީ ބަދަލުތަކުން އެންމެ ބޮޑު ގެއްލުމެއް ލިބެނީ، ރާއްޖެ ފަދަ ކުދި އަދި ބިން ތިރި ޖަޒީރާ ގައުމުތަކަށް ކަމަށެވެ. ނަމަވެސް ޖައްވު ހޫނުވުމަށް މެދުވެރިވާ ކަންކަމުގައި ރާއްޖޭގެ ހިއްސާ ވަރަށް ކުޑަ ކަމަށެވެ. އެމަނިކުފާނު ވިދާޅުވީ ތިމާވެށީގެ ގެއްލުންތަކުން ސަލާމަތްވުމަށް އެންމެ ގިނަ މަސައްކަތްތަކާއި، އެންމެ ބޮޑު ޚަރަދެއް ކުރަންޖެހެނީ ވެސް ރާއްޖެ ފަދަ ކުދި ޖަޒީރާ ގައުމުތަކަށް ކަމަށެވެ.
ރައީސް ވިދާޅުވީ އިންސާނުންގެ އަމިއްލަ އަތްތަކުން ކުރާ ކަންކަމުގެ ސަބަބުން، ދުނިޔޭގެ ހޫނުމިން ދަނީ އިންތިހާއަށް މަތިވަމުން ކަމަށާއި، މޫސުމަށް އަންނަ ނުރަނގަޅު ބަދަލުތަކުގެ ސަބަބުން ކުރިމަތިވާ ގުދުރަތީ ކާރިސާތަކާ ހެދި، އެންމެ ބޮޑެތި ގައުމުތައްވެސް ގޮތް ހުސްވެފައިވާ ކަމަށެވެ.
ވީއިރު ރާއްޖެ ފަދަ، އަބަދުމެ ކަނޑުގެ ރާޅުތައް ވަށައިގެން ބިންދަމުންދާ ތިރި ޖަޒީރާތަކެއްގެ ކުރިމަގާ މެދު ނިކަން ވިސްނާވަޑައިގަންނަވާ!ރާއްޖޭގެ ތާރީޚު ލިޔަމުންދާއިރު އަޅުގަނޑުމެންނަށް މިއަދު ހުއްޓި މިތިބެވެނީ، ތިމާވެށީގެ ކުރިމަތީގައި ޖެހުނު މޫސުމީ ބަދަލުތަކުގެ ފުލްސްޓޮޕަކަށް. މިހާ ހިސާބުން ރާއްޖޭގެ ތާރީޚު އިތުރަށް ލިޔެ ފުރިހަމަކުރާނީތޯ، ނުވަތަ އެފުލްސްޓޮޕާއެކު ތިމާވެށީގެ ޝިކާރައަކަށްވެ ނިމިގެންދާން ދޫކޮށްލާނީތޯ، އެއީ މިޖީލުގެ ދިވެހިން ޖަވާބަކާ މެދު ވިސްނަންޖެހިފައިވާ އެންމެ ވަރުގަދަ ސުވާލު.ރައީސުލް ޖުމްހޫރިއްޔާ އިބްރާހީމް މުޙައްމަހު ޞާލިޙު
ތިމާވެށީގެ ގެއްލުންތަކުން ރާއްޖެ ސަލާމަތްކުރުމަށް، އެންމެން އެކުގައި މިހާރު މަސައްކަތް ނުފަށައިފިނަމަ، މޫސުމީ ބަދަލުތަކުން ރާއްޖެ ސަލާމަތްކުރުމުގެ ފުރުސަތު ލިބޭ އެންމެ ފަހު ޖީލަށްވުމަކީ އެކަށީގެންވާ ކަމެއްކަން ފާހަގަކުރައްވައި ރައީސް ވިދާޅުވީ, މިޖަޒީރާތައް ނެތި، ރާއްޖެ ނޯންނާނެ ކަމަށެވެ. އަދި ރާއްޖެ ނެތް ހިނދެއްގައި، ދިވެހިން ނުތިބޭނެ ކަމަށާއި، ދިވެހިން ނެތި ދިވެހި ގައުމިއްޔަތެއް ވެސް ނޯންނާނެކަން އެމަނިކުފާނު ފާހަގަކުރެއްވިއެވެ.
އެހެންކަމުން ގައުމިއްޔަތު ހިމާޔަތްކުރުމުގެ އެންމެ މުހިންމު މަސައްކަތަށް, ރާއްޖޭގެ ތިމާވެށި ހިމާޔަތްކުރުން ހަދަން ޖެހޭ ކަމަށާއި، ދިވެހިންގެ ދިރިއުޅުމާއި އިޤްތިޞާދު ވެސް އެމައްޗަށް ބިނާވެފައިވާ ކަމަށް ރައީސް ވިދާޅުވިއެވެ. ރާއްޖޭގެ މާހައުލީ ނިޒާމު، އޭގެ ޠަބީޢީ ހާލަތަށް އިއާދަކޮށްދިނުމަށް، އާ އާޒުމަކާއެކު އެންމެން އެކުގައި ތެދުވުމަށް، ރައީސް ވަނީ އިލްތިމާސްކުރައްވާފައެވެ.
އަޅުގަނޑުމެންގެ ދިގު ތާރީޚެއް އެބަ އޮތް. މުއްސަނދި ސަގާފީ ތަރިކައަކާއި، ފަޚުރުވެރި ޤައުމިއްޔަތެއް އެބަ އޮތް. ދިވެހިންނަކީ ޞުލްޙަޔާއި ހަމަޖެހުމާއި މަޑުމައިތިރިކަމުގައި، މުއައްރިޚުން މިސާލުޖަހައި އުޅުނު ބައެއް. ދިވެހިންނަކީ ހަމްދަރުދީއާއި އޯގާތެރިކަމާއި ކުލުނާއި ލޯބީގެ މަތީގައި ދިރިއުޅުން ބިނާކުރި ބައެއް. ނަމަވެސް، ނުރަނގަޅު ފިކުރުތައް އަޅުގަނޑުމެންގެ ތެރެއަށް ފަތުރައި، އިޖްތިމާއީ އަދަބު އަޚުލާގުގެ ހަފޮޅުން ބޭރުކޮށް ދިވެހިން ބައިބައިކުރުމަށް، ބަޔަކު ކެނޑިނޭޅި އެބަ މަސައްކަތްކުރޭ. މިފަދަ ފިކުރުތަކަށް ފާޅުގައި ނޫނެކޭ ބުނެ، އަޚުލާޤީ އެންމެ މަތީ މިންގަނޑުގައި ސާބިތުވެތިބޭ ބައެއްގެ ގޮތުގައި، ދަރިން ތަރުބިއްޔަތުކުރުމަކީ، އަޅުގަނޑުމެންގެ ޒިންމާއެއް.ރައީސް އިބްރާހީމް މުޙައްމަދު ޞާލިޙު
ރައީސް ވިދާޅުވީ ގައުމުގެ ފޯދެމުން އަންނަ ޖީލުގެ ހިތްތަކުގައި ގައުމިއްޔަތުގެ ރޫހު އުފައްދައި، ގައުމީ ލޯބި ދިރުވައި އާލާކުރަން ޖެހޭ ކަަމަށެވެ. އަދި ދިވެހިންގެ ގައުމިއްޔަތު ދިރުވައި އާލާކުރެވޭނީ، ގައުމީ ސިފަތަކަށާއި ގައުމިއްޔަތަށް ލޯބިކުރާ ޒުވާން ޖީލެއް އުފެދިގެންކަން ޔަގީންކަމަށް އެމަނިކުފާނު ވިދާޅުވިއެވެ.
