އިޔާދަކުރަނިވި ހަކަތައިގެ މަޝްރޫއުތައް ނިމުމުން، އަހަރަކު 908 މިލިއަން ރުފިޔާ ބަޖެޓުން ސަލާމަތް ކުރެވޭނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ވިދާޅުވެއްޖެއެވެ.

ދުނިޔޭގެ ތިމާވެށީގެ ދުވަސް 2023 ފާހަގަކުރުމުގެ ގޮތުން ބޭއްވެވި ޖަލްސާގައި ވާހަކަފުޅުއްދައްކަވަމުން ރައީސް ވިދާޅުވީ، ފާއިތުވި 4 އަހަރުގެ ތެރޭގައި އަވިން ހަކަތަ އުފައްދާ 36 މެގަވޮޓްގެ ނިޒާމުތައް އިތުރު ކުރެވިފައިވާ ކަމަށެވެ.

އޭގެ ސަބަބުން ކަރަންޓު އުފެއްދުމަށް ބޭނުންކުރާ ޑީސަލުން އަހަރަކު 17 މިލިއަން ލީޓަރު މަދުކުރެވިފައިވާކަމަށް ރައީސް ވިދާޅުވިއެވެ. އެމަނިކުފާނުގެ ވާހަކަފުޅުގައި ވިދާޅުވީ، 2030 ވަނަ އަހަރު އަންނައިރު ދިވެހިރާއްޖެއަކީ ނެޓްޒީރޯ ޤައުމަކަށް ވުމަށް ހިފާފައިވާ އަމާޒަށް ވާޞިލްވުމަށް އެކަށީގެންވާ މަސައްކަތްތަކެއް ކުރެވިފައިވާ ކަމަށެވެ.

ރައީސް ވިދާޅުވީ، އޭގެ ސަބަބުން ޑީސަލަށް ކުރާ ޚަރަދުން ގާތްގަނޑަކަށް 270 މިލިއަން ރުފިޔާ ސަލާމަތްވާ ކަމަށެވެ.

އޭގެ އިތުރުން، އޭގެ ސަަބަބުން ތެޔޮ އަންދައިގެން ޖައްވަށް ބޭރުކުރާ ކާބަންޑައިއޮކްސައިޑުން 42،000 ޓަނު މަދު ކުރެވޭކަމަށްވެސް ރައީސް ވިދާޅުވިއެވެ.

ރައީސް އިތުރަށް ވިދާޅުވީ، އިތުރު 113 ރަށެއްގައި 68.4 މެގަވޮޓް ގެ އަވިން ހަކަތަ އުފައްދާ ނިޒާމުތައް ޤާއިމު ކުރުމުގެ މަސައްކަތް އެކި މަރުޙަލާގައި މިހާރުވެސް ކުރިއަށްދާ ކަމަށެވެ.

އެ މަސައްކަތްތައް ނިމުމުން، އިޔާދަކުރަނިވި ހަކަތައިގެ ޤާބިލުކަން 121 މެގަވޮޓަށް އިތުރު ކުރެވި، ބަޖެޓުން އަހަރަކު 908 މިލިއަން ރުފިޔާ ސަލާމަތް ކުރެވޭނެކަމަށް ރައީސް ވިދާޅުވިއެވެ.

ރައީސް ވިދާޅުވީ، މި ކަންކަމުގެ ސަބަބުން ޖައްވަށް ބޭރުކުރާ ވިހަ ގޭހުގެ 140،000 ޓަނު ޖައްވަށް ބޭރުނުކޮށް ފަރު ޖެހޭނެ ކަމަށެވެ.