މަނީ ލޯންޑަރިން ގެ ކުށް ސާބިތުވެ، ޖަލު ޙުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބްދުﷲ ޔާމީނުގެ ފަރާތުން އެ މައްސަލައިގެ ޙުކުމް ތަންފީޒު ކުރުން ފަސްކޮށްދިނުމާއި، ކަފާލާތުގެ ދަށުން ދޫކޮށްލެއްވުމަށް އެދި ސުޕްރީމް ކޯޓަށް ހުށަހެޅުއްވި ހުށަހެޅުންތަކަށް ބަލާއިރު، އެފަދަ އަމުރެއް ނެރެދެވެން ނެތްކަމަށް ސުޕްރީމް ކޯޓުގައި މި މައްސަލަ ބެއްލެވި 3 ފަނޑިޔާރުންގެ ބެންޗުން ނިންމަވައިފިއެވެ.

ހެކިތަކާއި ގުޅޭގޮތުން ފަނޑިޔާރު މަހާޒް އަލީ ޒާހިރު ވަނީ ރައީސް ޔާމީނުގެ ފަރާތުން ހުށައަޅުއްވާފައިވާ ޝަފަހީ 2 ހެކިން ބަލައިގަންނަން ނުފެންނަކަމަށް ވިދާޅުވެފައެވެ.

އެންމެ ފުރަތަމަ ކަފާލާތާއި ގުޅޭގޮތުން ވާހަކަ ދައްކަވަމުން ފަނޑިޔާރު މަހާޒް އަލީ ޒާހިރު ވިދާޅުވީ، ކަފާލާތުގެ ދަށުން ރައީސް ޔާމީނު ދޫކޮށްލެވެން ނެތްކަމަށް ދެކިވަޑައިގަންނަވާ ކަމަށެވެ. އެގޮތުން ހަމަހަމަކަމާއި އިންސާފުން ޝަރީއަތް ކުރިއަށް ގެންދިއުމަށް ޤާނޫނުގައި ބަޔާންކޮށްފައިވާކަން ފަނޑިޔާރު ފާހަގަ ކުރެއްވިއެވެ. އަދި ޙުކުމެއް ތަންފީޒު ކުރަމުންދާ މީހަކަށް ކަފާލާތުގެ ދަށުން ދޫކޮށްލުމަކީ އަސާސީ ޙައްޤެއްގޮތުގައި ބެލެވެން ނެތްކަމަށް ފަނޑިޔާރު މަހާޒް ވިދާޅުވިއެވެ.

އޭގެ އިތުރުން، ޙުކުމް ތަންފީޒު ކުރުން ފަސްކޮށްދިނުމާއި ގުޅޭގޮތުންވެސް ފަނޑިޔާރު މަހާޒް ވަނީ އެމަނިކުފާނުގެ ރައުޔު އިއްވަވާފައެވެ. އެގޮތުން ފަނޑިޔާރު މަހާޒް ވިދާޅުވީ، 5 އަހަރުގެ ޖަލު ޙުކުމް ތަންފީޒު ކުރުން ފަސް ކުރާނެ ތަނެއް އޮތްކަމަށް ދެކިވަޑައިނުގަންނަވާ ކަމަށެވެ.

މި ރައުޔަށް ފަނޑިޔާރު ޑރ. އަޒްމިރަލްދާ ޒާހިރާއި، ފަނޑިޔާރު މުޙައްމަދު އިބްރާޙިމްވެސް ވަނީ ތާއީދު ކުރައްވާފައެވެ.

އެމްއެމްޕީއާރުސީގެ ހިޔާނާތުގައި ހިމެނޭ، ރިސޯޓެއްގެ ގޮތުގައި ތަރައްގީކުރުމަށް ކުއްޔަށް ދޫކުރި ގއ. ވޮޑުމުލާގެ އިކުއިޒިޝަން ކޮސްޓްގެ ގޮތުގައި ދައުލަތަށް ލިބެންޖެހޭ ފައިސާގެ ތެރެއިން އެއް މިލިއަން ޑޮލަރު އަމިއްލަފުޅު އެކައުންޓަށް ޖަމާކޮށް، އެފައިސާއިން މަނީ ލޯންޑަރ ކުރުމުގެ ކުށް، ރައީސް ޔާމީންގެ މައްޗަށް ސާބިތުވެ، އެމަނިކުފާނު ފަސް އަހަރަށް ޖަލަށްލުމާއެކު ފަސް މިލިއަން ޑޮލަރުން ޖޫރިމަނާކޮށް، އެފައިސާ ހަ މަސްދުވަހުގެ ތެރޭގައި މީރާއަށް ދެއްކުމަށް ކްރިމިނަލް ކޯޓުން ހުކުމްކުރީ 28 ނޮވެމްބަރު، 2019ގައެވެ. ކްރިމިނަލް ކޯޓުން ކުރި ހުކުމް ރަނގަޅު ނޫންކަމަށް ބުނެ، ރައީސް ޔާމީންގެ ފަރާތުން ހައިކޯޓުގައި އެ މައްސަލަ އިސްތިއުނާފްކުރިއެވެ.

ހައިކޯޓުގައި އިސްތިއުނާފްކުރި އެ މައްސަލާގައި މިދިޔަ ޖެނުއަރީ މަހުގެ 21 ވަނަ ދުވަހު ހައިކޯޓުން ވަނީ ކްރިމިނަލް ކޯޓުން ރައީސް ޔާމީންގެ މައްޗަށް އިއްވާފައިވާ ހުކުމަށް ތާއީދުކޮށް، ދަމަހައްޓާފައެވެ.

އެހެންކަމުން، ރައީސް ޔާމީންގެ ފަރާތުން، އެމަނިކުފާނުގެ ގާނޫނީ ޓީމުން އެ މައްސަލަ ސުޕްރީމް ކޯޓުގައި އިސްތިއުނާފު ކުރީއެވެ.

ޔާމީނުގެ ފަރާތުން ސުޕްރީމް ކޯޓަށް ހުށަހަޅުއްވާފައިވާ އިސްތިއުނާފީ މައްސަލައިގައި22 ނުކުތާއެއް ހިމެނެއެވެ. އެ ނުކުތާތައް ޔާމީނުގެ ފަރާތުން ވަކީލުންގެ ޓީމުން ތަފްސީލު ކޮށްދެއްވާފައިވާއިރު، ދައުލަތުން ވެސް ވަނީ ތަފްސީލީ ގޮތެއްގައި އެ ނުކުތާތަކަށް ރައްދު ދެއްވާފައެވެ.

ސުޕްރީމް ކޯޓުގައި މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް ޢަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ.