އެމްޑީޕީ ގައުމީ މަޖިލިސް އިންތިޚާބުގެ ނަތީޖާތައް އާންމުވެގެން އައިއިރު، މި އިންތިޚާބުގައި، އެ ޕާޓީގެ ރައީސް މުހައްމަދު ނަޝީދުގެ ތާއީދު އޮތް ގިނަ ކެނޑިޑޭޓުންނަށް އިންތިޚާބުގައި ނާކާމިޔާބީއާއި ކުރިމަތިލައްވަން ޖެހިވަޑައިގެންފިއެވެ.

ރައީސް ނަޝީދަށް ތާއީދު ކުރައްވާ ކެންޑިޑޭޓުން ކެމްޕެއިން ސްލޯގަންއެއްގެ ގޮތުގައި ބޭނު ކުރެއްވީ ބަރުލަމާނީ ނިޒާމެވެ. އެމްޑީޕީގެ މި ވާދަވެރި އިންތިޚާބުގެ ނަތީޖާތައް ނިއުޅެމުން އައިއިރު ފެނިގެންދިޔައި ރައީސް ސާލިހު ތާއީދު ކުރެއްވި ކެންޑިޑޭޓުންނާއި، ރައީސް ނަޝީދު ތާއީދު ކުރެއްވި ކެންޑިޑޭޓުންގެ މެދުގައި އޮތް ވާދަވެރިކަމެވެ.

ގައުމީ މަޖިލިސް އިންތިޚާބުގައި ވާދަކުރެއްވި ވަޒީރުންނާއި އަދި ކުންފުނިތަކުގެ އެމްޑީންވެސް ވަނީ ރައީސް ސާލިހުގެ ތާއީދާއެކީ ގައުމީ މަޖިލިސް އިންތިޚާބު ކާމިޔާބު ކުރައްވާފައެވެ. މީގެ ތެރޭގައި، އިންތިޚާބުގައި އެންމެ ފަހު ވަގުތު ވާދަކުރައްވަން ފުރުސަތު ލިބިވަޑައިގެންނެވި ޔޫތު މިނިސްޓަރ އަހުމަދު މަހުލޫފް ވަނީ ބޮޑު ތަފާތަކުން ގޮނޑި ކާމިޔާބު ކުރައްވާފައެވެ. މަހުލޫފްއަކީ މިފަހަރުގެ އިންތިޚާބު އެންމެ ބޮޑު ތަފާތަކުން ކާމިޔާބު ކުރެއްވި އެއް ކެންޑިޑޭޓްވެސްމެއެވެ. މަހުލޫފްގެ އިތުރުން ވަޒީރުންގެ ތެރެއިން ދެން އިންތިޚާބު ވެގެން ދިޔައީ އިކޮނޮމިކް މިނިސްޓަރ ފައްޔާޒު އިސްމާއިލެވެ. އޭނައަކީ، ރައީސް ނަޝީދު އިސްވެ ހުންނަވައިގެން މަގާމުން ދުރުކުރުމަށް ފާއިތުވެދިޔަ އަހަރު މަޖިލިސް ތެރޭގައި ގިނަ މަސައްކަތްތަކެއް އޭނާއާއި ދެކޮޅަށް ކުރިޔަށް ގެންދެވުނު ވަޒީރެކެވެ. އޭނާގެ އިތުރުން ދެން އިންތިޚާބު ކާމިޔާބު ކުރައްވާފައިވަނީ ފިނޭންސް މިނިސްޓަރު އިބުރާހިމް އަމީރެވެ.

މި އިންތިޚާބުގައި ރައީސް ނަޝީދަށް ތާއީދުކުރައްވާ އަދި ޒަމާނުއްސުރެ އެމްޑީޕީގައި ރައީސް ނަޝީދުގެ ވިސްނުންފުޅު ކުރިޔަށް ނެރުއްވައިގެން ތިއްބެވި ކެންޑިޑޭޓުންނަށް ވަނީ ނާކާމިޔާބީއާއި ކުރިމަތިލައްވަން ޖެހިވަޑައިގެންފައެވެ.

މީގެތެރޭގައި، އައްޑު އަތޮޅު ހިތަދޫ ދެކުނު ދާއިރާގެ ރައީސްކަމަށް ވާދަކުރެއްވި އިބްރާހިމް ނާޒިލްގެ މައްޗަށް ކުރި ހޯއްދާފައިވަނީ އެދައިރާއިން އޭނާއާއި ވާދަކުރެެއްވި އަންސަރު މޫސާއެވެ. ވާދަވެރި ދާއިރާއެއްގެ ގޮތުގައި ފާހަގަވެގެންދިޔަ އަލިފުށީ ދާއިރާގެ ރައީސްކަން އިނގުރާދޫ ދާއިރާގެ މެމްބަރު ހަސަން އަހުމަދު (ހަސަންޓޭ) އާއި ވާދަކޮށް އަލިފުށި ދާއިރާގެ މެމްބަރު މުހައްމަދު ރަޝީދު ޙުސައިން (ބިގޭ) ވަނީ ކާމިޔާބު ކުރައްވާފައެވެ.

ރައީސް ސާލިހުގެ ތާއީދު އޮތް އެމްޑީންގެ ތެރޭގައި ހިމެނިވަޑައިގަންނަވާ އާރްޑީސީގެ އެމްޑީ މޫސާ އަލިމަނިކު، މޫކޭއާއި، ފެނެކައިގެ އެމްޑީ އަހުމަދު ސައީދުވެސް އިންތިޚާބު ކާމިޔާބު ކުރެއްވިއެވެ. އަދި މީގެ އިތުރުން ރީޖަނަލް އެއަރޕޯޓްސް ކުންފުނީގެ އެމްޑީ މުހައްމަދު ރިޒްވީ ވެސް ވަނީ އިންތިޚާބު ކާމިޔާބު ކުރައްވާފައެވެ. ރިޒްވީ މަގާމަށް އައްޔަން ކުރެއްވީ 2020ވަނަ އަހަރުއެވެ. ގައުމީ މަޖިލިސް އިންތިޚާބުގައި ފ. ބިލެތްދޫ ދާއިރާގެ ރައީސްކަމަށް ވާދަކުރައްވާ ރިޒްވީވެސްވަނީ އިންތިޚާބު ކާމިޔާބު ކުރައްވާފައެވެ.

ރާއްޖޭގެ ގިނަ ހިސާބުތަކުގައި، ރައީސް ނަޝީދުގެ ބަރުލަމާނީ ވިސްނުމަށް ތާއީދުކުރަމުން އައި ގިނަ ކެންޑިޑޭޓުންނަށް ގައުމީ މަޖިލިސް އިންތިޚާބުގައި ނާކާމިޔާބީއާއި ކުރިމަތިލައްވަން ޖެހިވަޑައިގެންނެވިއިރު، މާލޭ ދާއިރާއިން ނަޝީދުގެ ބަރުލަމާނީ ވިސްނުމުގައި ކެންޕޭން ކުރެއްވި ބައެއް ކެނޑިޑޭޓުން ވަނީ އިންތިޚާބު ކާމިޔާބު ކުރައްވާފައެވެ. މާލޭ ދާއިރާގެ ރައީސް ކަމަށް ވާދަކުރެއްވި، މާލޭ ސިޓީގެ ކުރީގެ މޭޔަރު ސިފާ މުހައްމަދު ވަނީ އިންތިޚާބު ކާމިޔާބު ކުރައްވާފައެވެ.

އިންތިޚާބުގެ ނަތީޖާއަށް ބާލާއިރު އެމްޑީޕީގެ އެންމެ ބާރުގަދަ ގުނަން، ގައުމީ މަޖިލީހަށް އަލަށް އިންތިޚާބުވި ގިނަ މެމްބަރުންނަކީ ރައީސް ސާލިހު ތާއީދު ކުރެއްވި ކެންޑިޑޭޓުންނެވެ. ކުރިޔަށް އޮތީ 2023ގެ ރިޔާސީ އިންތިޚާބެވެ. އެހެންކަމުން މި ނަތީޖާއަކީ މި އިންތިޚާބަށް މުހިއްމު ނަތީޖާއެކެވެ. އަދި ރިޔާސީ އިންތިޚާބަށް 2 އަހަރެއްހާ ދުވަސް ބާކީ އޮތްއިރު، ރާއްޖޭގައި މިވަގުތު އޮތް ރިޔާސީ ނިޒާމް އުވާލާ، ބަރުލަމާނީ ނިޒާމް ގެނައުމަށް އެމްޑީޕީގެ ރައީސް މުހައްމަދު ނަޝީދު ގެންދަވަނީ މަސައްކަތްޕުޅުތަކެއްވެސް ކުރައްވަމުންނެވެ. ކުރިޔަށް އޮތް 2023ގެ ރިޔާސީ އިންތިޚާބުގައި ވާދަކުރައްވާނޭކަން ރައީސް ނަޝީދު އިއުލާން ކުރައްވާފައިވާއިރު، ރިޔާސީ ޓިކެޓަށް ގޮތެއް ނިންމުމަށް މިއީ މުހިއްމު އިންތިޚާބެކެވެ.

އެމްޑީޕީގެ މިހާރުގެ އަސާސީ ގަވާއިދު އޮތްގޮތަށް ބަލާއިރު ކުރިޔަށް އޮތް 2023ގެ ރިޔާސީ އިންތިޚާބުގައި އެ ޕާޓީގެ ޓިކެޓުގައި ވާދަކުރާނޭ ބޭފުޅަކު އިންތިޚާބު ކުރުމަށްޓަކާ ޕާޓީގެ އެތެރޭގެ އިންތިޚާބެއް ބޭއްވުން ލާޒިމްވާނެއެވެ. އެހެންކަމުން، ހުރިހާ ގޮތަކުން ބެލިކަމުގައި ވިނަމަވެސް، އެމްޑީޕީގެ ގައުމީ މަޖިލިސް އިންތިޚާބަކީ އެޕާޓީގެ އެތެރޭގައި މިވަގުތު އޮތް ސިޔާސީ ވާދަވެރިކަމަށް ވަރަށްވެސް މުހިންމު އިންތިޚާބެކެވެ. އަދި މިއިންތިޚާބު ގުޅިފައިވަނީ، 2023 ގެ ރިޔާސީ އިންތިޚާބާ ކަމީވެސް، ޝައްކެއް އޮތް ކަމެއް ނޫނެވެ.