ފިޔަވަތިން އަމާންވެއްޓަށް ކުދިން ބަދަލުކުރުމުގެ މަސައްކަތް ޖެންޑަރ މިނިސްޓްރީން ފަށައިފިއެވެ.
އެ މިނިސްޓްރީން ބުނީ އަމާންވެށިތަކުން ކުދިންނަށް އާއިލީ މާހައުލެއް ފޯރުކޮށްދިނުމުގެ ގޮތުން އިތުރު ކުދިންތައް ބަދަލު ކުރުމުގެ މަސައްކަތް ފަށާފައިވާ ކަމަށެވެ. އަދި ފިޔަވަތީގައި މިހާރު ތިބި ކުދިންނަށް ލައިފް ކޯޗިން އަދި މެންޓަލް ހެލްތު ޕްރޮގްރާމުތައް ފަށަންވެސް ނިންމާފައިވާ ކަަމަށެވެ.
މިނިސްޓްރީން މިހެން ބުނެފައިވާއިރު ހުޅުމާލޭގައި ހުންނަ ފިޔަވަތީގައި މިދިޔަ ހުކުރު ދުވަހުގެ ރޭގެ ވަގުތެއްގައި ވަނީ އަލިފާނުގެ ހާދިސާއެއް ހިނގާފައެވެ. އަދި ބުރާސްފަތި ދުވަހާއި ހުކުރު ދުވަހުވެސް އެތަނުގައި ބަލަހައްޓާ ކުދިންތަކެއް ތަނުގެ ފުރާޅުމައްޗަށް އަރައިގެން އުޅޭ މަންޒަރު ފެންނަ ވީޑިއޯތައް ސޯޝަލް މީޑިއާގައި ވަނީ އާންމުވެފައެވެ. އަދި ފިޔަވަތީގެ ކުޑަދޮރުތަކަށް އެކުދިން ގެއްލުންދޭ މަންޒަރު ފެންނަ ވީޑިއޯތަކެއްވެސް ވަނީ އާންމުވެފައެވެ.
ޖެންޑަރ މިނިސްޓްރީން މިކަމާއި ގުޅިގެން ނެރުނު ބަޔާނެއްގައި ބުނެފައިވަނީ ހާދިސާގައި ހިމެނޭ ހުރިހާ ކުދިންގެ ހާލުވެސް ރަނގަޅު ކަމަށެވެ. އަދި ވޭދުވެދިޔަ ދުވަސްތަކުގައި އެ މަރުކަޒުގައި ބައެއްކުދިންގެ ފަރާތުން ފެނުނު ކަންތަކާއި ގުޅިގެން މިނިސްޓްރީ އޮފް ޖެންޑަރ، ފެމެލީ އެންޑް ސޯޝަލް ސަރވިސްއާއި ޗައިލްޑް އެންޑް ފެމިލީ ޕްރޮޓެކްޝަން ސަރވިސްގެ ޓީމެއް ގުޅިގެން މަސައްކަތް ފަށާފައިވާ ކަމަށެވެ. އަދި މިނިސްޓްރީ އާއި ޗައިލްޑް އެންޑް ފެމިލީ ޕްރޮޓެކްޝަން ސަރވިސްގެ މުވައްޒަފުން އެމަރުކަޒުގެ ކުދިންނާއި މުވައްޒަފުންނާއި އެކު މަސައްކަތްކުރަމުންދާ ކަމަށްވެސް މިނިސްޓްރީން ބުނެއެވެ.
ޢާއިލީ ވެއްޓެއްގައި ކުޑަކުދިންނަށް ބޭނުންވާ ރައްކާތެރިކަން ކަށަވަރު ނުކުރެވޭ ހާލަތްތަކުގައި އެ ކުދިންނަށް ރައްކާތެރިކަން ފޯރުކޮށްދިނުން ދައުލަތުގެ މައްޗަށް ލާޒިމުކަން ފާހަގަކޮށް ޖެންޑަރ މިނިސްޓްރީން ބުނީ ދައުލަތުގެ ބެލުމުގެ ދަށަށް ގެނެވޭ މިފަދަ ކުދިން ފާއިތުވެދިޔަ މުއްދަތުތަކުގައި ދިރިއުޅެމުން ދިޔައީ މާލޭ ސަރަޙައްދުގައި ގާއިމުކުރެވިފައިވާ މަރުކަޒެއްގައި ކަމަށެވެ. އެހެންނަމަވެސް، ދައުލަތުގެ ބެލުމުގެ ދަށުގައި ދިރިއުޅޭ ކުދިންވެސް ބާކީވުމުގެ އިހުސާސްވިޔަ ނުދީ، އެހެން ކުދިންނެކޭ އެއްފަދައިން މުޖުތަމައުގެ ތެރޭގައި ހެދިބޮޑުވުމުގެ ފުރުސަތު ތަނަވަސްކޮށްދިނުމުގެ ގޮތުން އަތޮޅުތެރޭގައި އެ ކަމަށް ޚާއްސަކުރެވިގެން ގާއިމުކުރެވޭ "އަމާން ވެށި"ތަކަށް ބަދަލުކުރުމުގެ މަސައްކަތް މިނިސްޓްރީން ފެށި ކަމަށެވެ.
މިފަދަ މަސައްކަތެއް މިހާ ފުޅާ ދާއިރާއެއްގައި ކުރެވެމުންދާއިރު، އެމަސައްކަތުގައި ހުރި ގޮންޖެހުންތައް ދެނެގަނެ، އެ ކަންކަން ހައްލުކުރުމުގައި ގުޅުންހުރި ފަރާތްތަކާއެކު މިނިސްޓްރީން މަސައްކަތް ކުރަމުންދާ ކަމަށާއި އެހެންނަމަވެސް، އެފަދަ ގޮންޖެހުންތަކަށް ރިއާޔަތްކުރުމެއްނެތި ބައެއް ފަރާތްތަކުން ދައްކާ ހަގީގަތާއި ޚިލާފު ވާހަކަތަކުގެ ނޭދެވޭ އަސަރު، އ ކުދިންނަށް ފޯރާ ހާލަތްތައް އަންނަ ކަަމަށް މިނިސްޓްރީން ބުންޏެވެ.
