އަންނަ މަހުގެ އެއްވަނަ ދުވަހު ރާއްޖޭގައި ފެށުމަށް ހަމަޖެހިފައިވާ ސާފް ޗެމްޕިއަންޝިޕާ ގުޅޭ ގޮތުން ރާއްޖޭގައި ރަސްމީކޮށް ކުރިއަށް ގެންދިޔުމަށް ހަމަޖެހިފައިވާ ކެމްޕެއިން އިފްތިތާހުކުރުން މިރޭ ގަލޮޅު ދަނޑުގައި އޮންނާނެއެވެ. މި ކެމްޕެއިނަކީ މުޅި ރާއްޖެއަށް ފުޅާކުރުމަށް ހަމަޖެހިފައިވާ ކެމްޕެއިނެކެވެ.
ކުރިޔަށް އޮތް ސާފް ޗެމްޕިއަން ޝިޕްގެ ހުރިހާ މެޗެއް ކުޅެން ހަމަޖެހިފައިވަނީ ރާއްޖޭގައެވެ. ސާފް ޗެމްޕިއަންޝިޕަށް ތައްޔާރުވާ ދިވެހި ގައުމީ ޓީމު މިހާރު ވަނީ ފަރިތަކުރުންތަކަށް ގަތަރަށް ދަތުރުކޮށްފައެވެ. ގަތަރުގައި ކުރިޔަށް ގެންދާ ޓްރެއިނިންގ ކޭމްޕަށް ފަހު ޓީމް އެނބުރި ރާއްޖެ އަންނާނީ މި މަހުގެ 28 ވަނަ ދުވަހުއެވެ.
ރާއްޖޭގައި ސާފް ޗެމްޕިއަންޝިޕް މީގެ ކުރިން 2008 ގައި ބޭއްވީ ސްރީލަންކާއާ ގުޅިގެންނެވެ. ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް މީގެ ކުރިން ވަނީ މިއީ ފުޓްބޯޅައިގެ ގެއްލިފައިވާ ފޯރި އަލުން ގެނައުމަށް ދިވެހިންނަށް ލިބުނު ރަނުގެ ފުރުސަތެއް ކަމަށް ބުނެފައެވެ. އަދި ފުޓްބޯޅައަކީ ގައުމު އެއްބައިވަންތަ ކުރުވާ ކުޅިވަރެއް ކަމަށާއި، މީގެ ކުރިންވެސް އެކަން ދިވެހީން ސާބިތުކޮށްދީފައިވާ ކަމަށް ވަނީ ބުނެފައެވެ.
