މޯލްޑިވްސް އިންޓަރގްރޭޓެޑް ޓުއަރިޒަމް ޑިވެލޮޕްމެންޓް ކޯޕަރޭޝަން (އެމްއައިޓީޑީސީ)އަށް ސަރުކާރުގެ އެއްވެސް ނުފޫޒެއް ނެތް ކަމަށާއި، އެ ކުންފުނި ހިނގަމުން އަންނަނީ ފުރިހަމަ މިނިވަންކަން މަތީގައި ކަމަށް އެ ކުންފުނީގެ މެނޭޖިންގ ޑިރެކްޓަރ މުޙައްމަދު ރާއިދު ވިދާޅުވެއްޖެއެވެ.
ރާއްޖެޓީވީގެ "ފަލަ ސުރުޚީ" ޕްރޮގްރާމްގައި ވާހަކަ ދައްކަވަމުން ރާއިދު ވިދާޅުވީ އެކުންފުނި ހިނގަމުން އަންނަނީ ސަރުކާރުގެ ނުފޫޒަކާ ނުލައި ފުރިހަމަ މިނިވަންކަން މަތީގައި ކަމަށާއި، އެކަމުގެ ޔަގީންކަން އެ ކުންފުނިން ދޭކަމަށެވެ.
އެކުންފުނި ހިނގަމުން އަންނަނީ ކުންފުނީގެ ބޯޑުން ނިންމާ އުސޫލުތަކާއި އެއްގޮތަށް ކަމަށާއި، ނަމަވެސް ޅަފަތުގައި އޮތް ކުންފުންޏަކަށް ވާތީ ވަރަށް ގިނަ ފަރާތްތަކުގެ އެއްބާރުލުން ބޭނުންވާނެ ކަމަށާއި، އެގޮތުން ފަތުރުވެރިކަމާބެހޭ ވުޒާރާއާއި ކަމާއި ގުޅުންހުރި އިދާރާތަކުގެ އެއްބާރުލުން ކުންފުނި ހިންގުމަށް ވަރަށް ބޮޑަށް ބޭނުންވާ ކަމަށް ރާއިދު ވިދާޅުވިއެވެ.
ރާއިދު ބުނީ ރާއްޖޭގެ ފަތުރުވެރިކަމަށް 50 އަހަރުވުމާ ގާތްވެފައިވާއިރު، ގެސްޓް ހައުސްގެ ވިޔަފާރިފުޅާ ވަމުން އަންނަ ކަމަށާއި، ނަމަވެސް ރާއްޖޭގެ އުތުރާއި ދެކުނުގައި ގެސްޓް ހައުސްގެ ވިޔަފާރި ކުރާ މިންވަރު ދަށްކަމަށެވެ.
އެކަމަކު ލާމަރުކަޒީ އުސޫލުގެ ދަށުން ކައުންސިލްތަކުން ލޭންޑް ޔޫސް ޕްލޭންތައް އެކުލަވާލާއިރު، ކައުންސިލްތަކާއެކު މަސައްކަތްކޮށް ގެސްޓް ހައުސްގެ ވިޔަފާރި ފުޅާކުރުމަށް މަސައްކަތް ކުރަމުން އަންނަ ކަމަށް ރާއިދު ވިދާޅުވިއެވެ.
