ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ރަސްމީ ދަތުރުފުޅެއްގައި ށ އަތޮޅަށާއި ރ އަތޮޅަށް ވަޑައިގަތުމަށް ހަމަޖެހިއްޖެއެވެ.
ރައީސް އޮފީހުގެ ތަރުޖަމާން މަބްރޫކް އަޒީޒު ކުރެއްވި ޓްވީޓެއްގައި ވިދާޅުވީ ރަސްމީ ދަތުރުފުޅެއްގައި އަންގާރަ ދުވަހު ފުރާވަޑައިގަތުމަށް ހަމަޖެހިފައިވާކަމަށެވެ. މިދަތުރުފުޅުގައި ށ އަތޮޅުން ފުނަދޫ، ޅައިމަގު، ފޯކައިދޫ އަދި މާއުނގޫދާއަށް ވަޑައިގަތުމަށް ވަނީ ހަމަޖެހިފައެވެ. ރ އަތޮޅުން ވާދޫ، އަލިފުށި، ރަސްގެތީމު އަދި އަނގޮޅިތީމަށް ވަޑައިގަތުމަށް ވަނީ ހަމަޖެހިފައެވެ.
ރައީސްގެ މިދަތުރުފުޅާ ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން މަބްރޫކް ވިދާޅުވީ ރައީސްގެ މިދަތުރުފުޅުގެ ބޭނުމަކީ ރަށްރަށުގެ ކައުންސިލްތަކާއި ބައްދަލުކޮށް ތަރައްޤީގެ މަޝްރޫޢުތައް ހިނގާ ނުހިނގާ ގޮތް ބައްލަވާލެއްވުމެވެ. މީގެއިތުރުން އެރަށްރަށުގެ އެމްޑީޕީ ގެ އާންމު މެމްބަރުން ރައީސް އާ ބައްދަލުކުރެއްވުމަށް އެދިފައިވާތީ އެމްޑީޕީގެ އާންމު މެމްބަރުންނާވެސް ރައީސް ބައްދަލުކުރެއްވުމަށް ވަނީ ހަމަޖެހިފައެވެ. އަދި ރަށްރަށުގެ ދަނޑުވެރިންނާއި މަސްވެރިންނާ މިނޫންވެސް އެކިއެކި މަސައްކަތްކުރާ ފަރާތްތަކާވެސް ރައީސް ބައްދަލުކުރެއްވުމަށް ހަމަޖެހިފައިވާކަމަށް މަބްރޫކް ވިދާޅުވިއެވެ.
ރައީސްގެ މިދަތުރުފުޅު ނިންމަވާލެއްވުމަށްފަހު މާލެ ވަޑައިގަތުމަށް ހަމަޖެހިފައިވަނީ ސެޕްޓެމްބަރ 9 ވާ ބުރާސްފަތި ދުވަހުއެވެ.
ރައީސުލްޖުމްހޫރިއްޔާ ވަނީ އޮގަސްޓް މަހު ތ އަތޮޅުގެ 7 ރަށަކަށް ވައިގަންނަވާފައެވެ.
