އެމްޑީޕީ އޮފީހުގައި ބުރާސްފަތި ދުވަހުގެ މެންދުރެއް ހާއިރު ހިންގި މާރާމާރީއާ ގުޅިގެން މީހަކު ހައްޔަރުކޮށްފިއެވެ.

ފުލުހުން ބުނީ މާރާމާރީއާ ގުޅިގެން ހުކުރު ދުވަހު ކޯޓު އަމުރެއްގެ ދަށުން 39 އަހަރުގެ ފިރިހެނަކު ހައްޔަރުކޮށްފައިވާ ކަމަށެވެ.

މާރާމާރީ ހިންގިކަމުގެ ރިޕޯޓު ލިބިފައިވަނީ މިމަހުގެ 2ވީ ބުރާސްފަތި ދުވަހުގެ މެންދުރު 12:30 ހާއިރެވެ. މާރާމާރީގައި އަނިޔާވި މީހަކީ އުމުރުން 50 އަހަރުގެ މަރިޔަމް ޒުބައިރު (މަންދީ)އެވެ. އޭނާއަށް އޭޑީކޭ ހޮސްޕިޓަލުގައި ފަރުވާ ދިނުމަށްފަހު މިހާރު ވަނީ ދޫކޮށްލާފައެވެ.

ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަޙުމަދު ނަސީމްގެ މަންމަ، މަންދީއަށް ހަމަލާ ދިނުމާއި ގުޅިގެން، މީކާއިލް ވިދާޅުވީ ހަމަލާ ދިނީ ޓާގެޓް ކޮށްގެން ސިޔާސީ ބޭނުމަކު ނޫން ކަމަށެވެ. އަދި މިއީ މަސްތުގެ ހާލުގައި މީހަކު ހުރެގެން ދިން ހަމަލާއެއްކަމަށް ވެސް މީކާއިލް ތަހުމަތު ކުރައްވާފައިވެއެވެ.

ސޯޝަލް މީޑިޔާގައި އާންމުވެފައިވާ ފޮޓޯތަކަށް ބަލާއިރު އެމްޑީޕީ އޮފީސްތެރޭގައި މާރާމާރީ ހިންގާފައިވަނީ ޗޭނު ގަނޑަކުންނެވެ. މިހަމަލާގައި މަންދީގެ އިތުރުން އެއޮފީހުގައި މަސައްކަތްކުރާ އެހެން މީހަކަށްވެސް ވަނީ އަނިޔާ ލިބިފައެވެ. މައުލޫމާތު ލިބޭ ގޮތުގައި މަންދީގެ ބޮލުގެ ފުއްކިބައިން ވަނީ ފަޅައިގެން ގޮސްފައެވެ.

އަނިޔާވެރި މާރާމާރީގެ މިއަމަލު ކުށްވެރިކޮށް އެމްޑީޕީން ބުނީ، އެފަދަ އަމަލުތައް އެޕާޓީން ޓޮލަރޭޓް ނުކުރާނެ ކަމަށެވެ. މި މައްސަލައިގެ އަވަސް އަދި ފުރިހަމަ ޖިނާއީ ތަހުގީގެއް ކޮށްދިނުމަށް އެމްޑީޕީން ވަނީ ފުލުހުންނަށް ގޮވާލާފައެވެ. އަދި އެޕާޓީގެ ފަރާތުން ވެސް މައްސަލަ ވަނީ ފުލުހުންނަށް ހުށަހަޅާފައެވެ.

މައުލޫމާތު ލިބޭ ގޮތުގައި މަންދީ އަށް ހަމަލާދިން މީހާއަކީ އެމްޑީޕީ އޮފީހުގައި ޕިޔޯނަކަށް މަސައްކަތް ކުރާ އަހުމަދު ޖަޒީލެވެ.